ក្រសួងកសិកម្មចាប់ផ្ដើមរឹតត្បិតការនាំចូលសាច់សត្វគ្រប់ប្រភេទ
ក្រសួងកសិកម្មរុក្ខាប្រមាញ់ និងនេសាទ បានដាក់ដេញចេញវិធានការថ្មីស្ដីពីការរឹតត្បិតការនាំចូលសត្វ និងសាច់សត្វគ្រប់ប្រភេទពីក្រៅប្រទេស។ ជាវិធានការមួយដើម្បីជួយទប់ស្កាត់សត្វមានជំងឺ និងសាច់សត្វខូចគុណភាពគ្រប់ប្រភេទ ដែលនាំឲ្យប៉ះពាល់ដល់សុខភាពរបស់អ្នកប្រើប្រាស់ក្នុងស្រុក។
ចុះផ្សាយនៅថ្ងៃ៖
ស្តាប់ - ០២:០២
វិធានការថ្មីនេះ សំដៅពង្រឹងចំពោះក្រុមហ៊ុន និងអាជីវករ ដែលទទួលបានគោលការណ៍អនុញ្ញាតនាំចូលសត្វរស់ សាច់សត្វ រួមនិងផលិតផលសត្វ ដើម្បីផ្គត់ផ្គង់ទីផ្សារនៅកម្ពុជា។ នៅក្នុងសេចក្ដីជូនដំណឹងរបស់ក្រសួងកសិកម្ម ចុះថ្ងៃទី ២៥មេសា និងទើបតែត្រូវបានផ្សព្វផ្សាយជាសាធារណៈ នៅថ្ងៃនេះ បានបញ្ជាក់ច្បាស់ៗថា ដើម្បីធានាដល់ការនាំចូលសាច់សត្វឲ្យមានគុណភាព គឺក្រុមនាំចូលសាច់ត្រូវតែជាក្រុមស្របច្បាប់ដែលបានចុះបញ្ជីពាណិជ្ជកម្ម និងមានប័ណ្ណប៉ាតង់នៅមានសុពលភាព។
បន្ថែមពីលើនេះទៀត ត្រូវមានទីតាំងប្រមូលផ្តុំសត្វនៅចំណុចដើមទី និងចំណុចចុងទី ដែលទទួលស្គាល់ដោយសមត្ថកិច្ចជំនាញ នៃក្រសួងកសិកម្ម រុក្ខាប្រមាញ់ និងនេសាទ។ ក្នុងនោះក៏ត្រូវមានកិច្ចសន្យាផ្គត់ផ្គង់សត្វរស់ ឬ សាច់សត្វ ឬ ផលិតផលសត្វពីកសិដ្ឋាន ឬ ក្រុមហ៊ុនស្របច្បាប់ នៃប្រទេសនាំចេញ។ ចុងក្រោយ ត្រូវចុះកិច្ចសន្យាបច្ចេកទេសជាមួយអគ្គនាយកដ្ឋានសុខភាពសត្វ និងផលិតកម្មសត្វ និងត្រូវធានាអនុវត្តកិច្ចសន្យានេះ ឲ្យបានត្រឹមត្រូវតាមស្តង់ដារបច្ចេកទេស។
លោក វេង សាខុន រដ្ឋមន្រ្តីក្រសួងកសិកម្ម ឲ្យដឹងថា ការកំណត់លក្ខខណ្ឌនេះ ដើម្បីពង្រឹងការគ្រប់គ្រងហានិភ័យ នៃការឆ្លងរាលដាលនៃជំងឺសត្វ និងលើកកម្ពស់គុណភាពសាច់សត្វ។
ជាការកត់សម្គាល់ការនាំចូលសាច់សត្វពីក្រៅប្រទេសគឺកម្ពុជាបានប្រើប្រាស់ថវិកាប្រមាណជា ១០០លានដុល្លារក្នុងមួយឆ្នាំៗដើម្បីផ្គត់ផ្គង់ការប្រើប្រាស់ក្នុងស្រុក។ តាមរយៈការនាំចូលយ៉ាងគំហុកនេះដែរ ក៏បានធ្វើឲ្យអ្នកផ្គត់ផ្គង់ក្នុងស្រុកមានការរអ៊ូរទាំផងដែរថា បានបន្ទាបតម្លៃ។
បើតាមអ្នកជំនាញ បរិមាណផ្គត់ផ្គង់សាច់សត្វរបស់កម្ពុជាសម្រាប់តម្រូវការហូបចុកនៅក្នុងប្រទេសនៅមិនទាន់គ្រប់គ្រាន់នៅឡើយ ដែលចាំបាច់តម្រូវឲ្យមានការនាំចូលសាច់សត្វ សត្វរស់ និងស៊ុតពីក្រៅប្រទេស។ នេះក៏ព្រោះតែ សមត្ថភាពប្រកួតប្រជែងលើការចិញ្ចឹមសត្វនៅកម្ពុជា នៅទន់ខ្សោយ ដោយសារថ្លៃដើមនៃការចញ្ចឹមមានកម្រឹតខ្ពស់ មិនអាចប្រកួតជាមួយសាច់សត្វ ដែល នាំចូលពីក្រៅប្រទេសបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ