លោក ញឹក ប៊ុនឆៃ រំឮកព្រឹត្តិការណ៍ផ្ទុះអាវុធឆ្នាំ១៩៩៧ ខណៈ ហ្វ៊ុនស៊ិនប៉ិចថាមិនចង់ចំណេញនយោបាយ
ដូចរៀងរាល់ឆ្នាំដែរ ពិធីសាសនាមួយត្រូវបានធ្វើឡើង ដើម្បី រំឮកដល់វិញ្ញាណក្ខន្ធជនរងគ្រោះនយោបាយដែលបានស្លាប់ក្នុងព្រឹត្តិការណ៍ផ្ទុះអាវុធបង្ហូរឈាមកណ្តាលទីក្រុងភ្នំពេញ កាលពី២១ឆ្នាំមុន។ គឺជាព្រឹត្តិការណ៍ដែលធ្វើឲ្យសម្តេចក្រុមព្រះ នរោត្តម រណឫទ្ធិ ធ្លាក់ចេញពីនាយករដ្ឋមន្រ្តីទី១ នាថ្ងៃទី៥-៦ កក្កដា ឆ្នាំ១៩៩៧។ ប៉ុន្តែគណបក្សហ្វ៊ុនស៊ិនប៉ិច របស់សម្តេចក្រុមព្រះ មិនរំឮកវិញ្ញាណក្ខន្ធដល់អ្នកស្លាប់នៅចំថ្ងៃនេះទេ ដោយអះអាងពីការមិនចង់ឲ្យគេចោទប្រកាន់ថា គណបក្សនេះកេងចំណេញនយោបាយ។
ចុះផ្សាយនៅថ្ងៃ៖
ស្តាប់ - ០២:០៩
គណបក្សខ្មែររួបរួមជាតិ ដែលបែកចេញពី គណបក្សហ្វ៊ុនស៊ិនប៉ិច តែងតែធ្វើពិធីរំឮកវិញ្ញាណក្ខន្ធជនរងគ្រោះនយោបាយដែលបានស្លាប់ក្នុងព្រឹត្តិការណ៍ ផ្ទុះអាវុធនាថ្ងៃទី៥-៦ កក្កដា ឆ្នាំ១៩៩៧ នៅថ្ងៃសុក្រនេះ។ ពិធីសាសនាដែលមានការចូលរួមពី លោក ញឹក ប៊ុនឆៃ ផងនោះ បានប្រារព្ធឡើងនៅវត្តចំបក់មាស តាមផ្លូវជាតិលេខ៦A ជាយទីក្រុងភ្នំពេញ។
លោក សឹង្ហ គិរី សមាជិកគណបក្សខ្មែររួបរួមជាតិ បានបញ្ជាក់ថា ពិធីនេះត្រូវបានធ្វើឡើងជារៀងរាល់ឆ្នាំដើម្បីរំឮកដល់ការតស៊ូរបស់សកម្មជនគណបក្សដែលធ្លាប់ដឹកនាំរដ្ឋាភិបាលហើយត្រូវបានស្លាប់ក្នុងព្រឹត្តិការណ៍បង្ហូរឈាមខ្មែរគ្នាឯងនោះ។
ប៉ុន្តែសម្រាប់គណបក្សហ៊្វុនស៊ិនប៉ិច របស់សម្តេចក្រុមព្រះវិញ មិនយកថ្ងៃ៥-៦ កក្កដា ធ្វើពិធីរំឮកវិញ្ញាណក្ខន្ធឬទាមទាររកយុត្តិធម៌នោះទេ ដោយអះអាងថា មិនចង់ឲ្យមានការចោទប្រកាន់ថា គណបក្សនេះកេងចំណេញនយោបាយ។ នេះបើតាម លោក ញ៉េប ប៊ុនជិន ជាអ្នកនាំពាក្យគណបក្ស។ ទោះជាយ៉ាងណា គណបក្សហ៊្វុនស៊ិនប៉ិច អះអាងថា ខ្លួនមិនបានបំភ្លេចចោលអ្នកតស៊ូនោះទេ ដោយគណបក្សនេះតែងតែយកឱកាសថ្ងៃបុណ្យចូលឆ្នាំខ្មែរ និងបុណ្យភ្ជុំបិណ្ឌធ្វើពិធីរំឮកវិញ្ញាណក្ខន្ធដល់ពួកគេជានិច្ច។
សូមរំឮកដែរថា ព្រឹត្តិការណ៍បង្ហូរឈាមនៅគ្រានោះ គឺជាការប៉ះទង្គិចគ្នាដោយអាវុធរវាងអ្នកគាំទ្រលោកនាយករដ្ឋមន្រ្តី ហ៊ុន សែន ដែលកាលណោះជានាយករដ្ឋមន្រ្តីទី២ និងអ្នកគាំទ្រសម្តេចក្រុមព្រះ ជានាយករដ្ឋមន្រ្តីទី១។
ផ្អែកតាមរបាយការណ៍ស៊ើបអង្កេតរបស់ការិយាល័យសិទ្ធិមនុស្ស នៃអង្គការសហប្រជាជាតិ ប្រចាំនៅកម្ពុជា ក្រៅពីអ្នករបួសរាប់រយនាក់ ការប្រយុទ្ធគ្នា រវាងកងទ័ពខ្មែរទាំងពីរក្រុម បណ្តាលឲ្យទាហាន និងមន្រ្តីជាន់ខ្ពស់ដែលស្មោះត្រង់នឹងសម្តេចក្រុមព្រះ នរោត្តម រណឫទ្ធិ ប្រមាណ ៦០នាក់ ត្រូវបានប្រហារជីវិតក្រៅប្រព័ន្ធច្បាប់។ មេប៉ូលិស និងយោធាជាន់ខ្ពស់ របស់គណបក្ស ហ៊្វុនស៊ិនប៉ិច ដែលត្រូវបានសម្លាប់នោះ រួមមាន លោក ហូ សុខ រដ្ឋលេខាធិការក្រសួងមហាផ្ទៃ រួមនឹងមន្ត្រីស្មោះត្រង់នឹងសម្តេចក្រុមព្រះ ដទៃទៀត ដូចជា ឧត្តមសេនីយ៍ ចៅ សម្បត្តិ ឧត្តមសេនីយ៍ ក្រួច យឿម ឧត្តមសេនីយ៍ ព្រំ ឌិន ឧត្តមសេនីយ៍ លី សេងហុង ឧត្តមសេនីយ៍ ម៉ែន ប៊ុនថន ព្រមទាំងពលទាហាន និងនាយទាហានជាច្រើនទៀត។ នេះបើតាមរបាយការណ៍ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ