រដ្ឋសភាកម្ពុជានៅតែចាត់ទុកលោក សម រង្ស៊ី ថាសមនឹងទទួលបានគ្រឿងឥស្សរិយយស
«ជាការឆ្លើយតបទៅនឹងគុណបំណាច់ដ៏ឧត្តុង្គឧត្តមដែលសមាជិក សមាជិការដ្ឋសភា បានបំពេញការងារជូនជាតិ និងប្រជាពលរដ្ឋ» រដ្ឋសភាកម្ពុជានឹងផ្តល់គ្រឿងឥស្សរិយយសលើកទី១ ជូនតំណាងរាស្ត្រទាំងអស់នារសៀលស្អែក។ លោក សម រង្ស៊ី ប្រធានគណបក្សសង្រ្គោះជាតិ ដែលត្រូវបានរដ្ឋសភាបញ្ចប់សមាជិកភាព ហើយត្រូវបានតុលាការកម្ពុជាបង្គាប់ឱ្យចូលខ្លួនទទួលទោសព្រហ្មទណ្ឌ ក៏មានឈ្មោះសម្រាប់ទទួលកិត្តិយសនោះដែរ។
ចុះផ្សាយនៅថ្ងៃ៖
ស្តាប់ - ០១:៤៤
ក្នុងពិធីបំពាក់គ្រឿងឥស្សរិយយសលើកទី១ជូនតំណាងរាស្ត្រក្នុងនីតិកាលទី៥នៅថ្ងៃស្អែកឈ្មោះ សម រង្ស៊ី ដែលត្រូវតុលាការរកឃើញថាជាប់ទោសព្រហ្មទណ្ឌ ហើយបាត់បង់សមាជិកភាពនៅក្នុងរដ្ឋសភា ក៏ស្ថិតក្នុងចំណោមឥស្សរជនដែលមាន«គុណបំណាច់ដ៏ឧត្តុង្គឧត្តម»ក្នុងការ«បំពេញការងារជូនជាតិ និងប្រជាពលរដ្ឋ»ដែរ។ នេះបើផ្អែកតាមសេចក្តីជូនដំណឹង និងការបញ្ជាក់ពីលោក ឡេង ប៉េងឡុង អគ្គលេខាធិការនៃរដ្ឋសភាកម្ពុជា។
សូមរម្លឹកថា នៅថ្ងៃទី១៣ ខែវិច្ឆិកា ឆ្នាំ២០១៥ តុលាការកម្ពុជាបានបង្គាប់ឱ្យកងកម្លាំងសាធារណៈចាប់ខ្លួនលោក សម រង្ស៊ី ប្រធានគណបក្សសង្គ្រោះជាតិ យកមកអនុវត្តទោសនៅក្នុងពន្ធនាគាររយៈពេល២ឆ្នាំ និងបង់ប្រាក់ពិន័យ៨លានរៀល។ រដ្ឋសភាកម្ពុជាក៏បានសម្រេចបញ្ចប់សមាជិកភាព និងបុព្វសិទ្ធិជាអ្នកតំណាងរាស្ត្រមណ្ឌលខេត្តកំពង់ចាម របស់អតីតប្រធានក្រុមតំណាងរាស្ត្រមតិភាគតិចរូបនេះ បន្ទាប់ពីគាត់បានក្លាយជាទណ្ឌិតតាមអំណាចដីកានៃសាលាដំបូងរាជធានីភ្នំពេញ។ មេបក្សប្រឆាំងដ៏ប្រជាប្រិយនៅកម្ពុជានេះ បានចាញ់ក្តីលោក ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ក្នុងរឿងក្តី«បរិហារកេរ្តិ៍ជាសាធារណៈ និងញុះញង់ឱ្យមានការរើសអើង»។ លោក សម រង្ស៊ី ដែលមានសញ្ជាតិបារាំងផង កំពុងគេចខ្លួនទៅប្រទេសបារាំង ដើម្បីចៀសវាងការចាប់ខ្លួន។
លោក ឡេង ប៉េងឡុង ដែលជាអ្នកនាំពាក្យឱ្យរដ្ឋសភាកម្ពុជាផង បានពន្យល់ថា គណៈកម្មាការផ្តល់គ្រឿងឥស្សរិយយសរបស់រដ្ឋសភា ដឹកនាំដោយលោក ងួន ញ៉ិល អនុប្រធានទី២នៃរដ្ឋសភា បានសម្រេចបញ្ចូលឈ្មោះ សម រង្ស៊ី សម្រាប់ពិធីថ្ងៃស្អែកក្រោមអធិបតីភាពលោក ហេង សំរិន ប្រធានរដ្ឋសភា ដោយមានរាជានុញ្ញាតតាមសំណើពីព្រះមហាក្សត្រកម្ពុជាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ