លោកសម រង្ស៊ី៖ ការចោទលោកកឹម សុខាពី“បទក្បត់ជាតិ” គឺជាលេសដើម្បីកម្ចាត់ក្បាលម៉ាស៊ីនបក្សប្រឆាំង
តាមរយៈទំព័រហ្វេសប៊ុកផ្លូវការរបស់ខ្លួនកាលពីយប់មិញ លោកសម រង្ស៊ី អតីតប្រធានគណបក្សសង្រ្គោះជាតិ បានចាត់ទុកការចាប់ខ្លួន និងចោទប្រកាន់លោកកឹម សុខា ដែលជាប្រធានគណបក្សសង្រ្គោះជាតិបច្ចុប្បន្ន ថាដើម្បីតែចង់រលាយក្បាលម៉ាស៊ីនគណក្សប្រឆាំង។ ការអះអាងរបស់លោកសម រង្ស៊ីនាពេលនេះ ធ្វើឡើងស្របពេលដែលកំពុងតែមានប្រតិកម្មយ៉ាងសម្បើមពីមជ្ឈដ្ឋានជាតិ និងអន្តរជាតិជុំវិញការចាប់ខ្លួនលោកកឹម សុខា ទាំងកណ្តាលយប់និងបញ្ជូនទៅឃុំខ្លួននៅក្នុងពន្ធនាគារត្រពាំងផ្លុងក្នុងខេត្តត្បូងឃុំ។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងសំណេររបស់ខ្លួនប្រមាណជាជិតមួយទំព័រ លោកសម រង្ស៊ី បានអះអាងថា លោកបានស្គាល់លោកកឹម សុខា ហើយបានតាមដានសកម្មភាពនយោបាយរបស់លោកអស់រយៈពេល២៥ឆ្នាំមកហើយ។ ដូច្នេះលោកអាចបញ្ជាក់ថា ការដែលរដ្ឋអំណាចខ្មែរប្រើប្រាស់សេចក្តីថ្លែងការណ៍របស់លោកកឹម សុខា នៅចំពោះមុខអ្នកគាំទ្រគណបក្សសង្គ្រោះជាតិមួយក្រុមនៅប្រទេសអូស្ត្រាលីក្នុងខែវិច្ឆិកា ឆ្នាំ២០១៣ ដើម្បីចោទប្រកាន់លោកពីបទក្បត់ជាតិ និងឃុបឃិតជាមួយបរទេសនោះ គឺជាលេសដើម្បីកម្ចាត់ក្បាលម៉ាស៊ីនគណបក្សប្រ ឆាំងនៅមុនការបោះឆ្នោតជាតិមកដល់នៅខែកក្កដា ឆ្នាំ២០១៨។
លោកអតីតប្រមុខគណបក្សប្រឆាំងរូបនេះថែមទាំងចាត់ទុកការចោទប្រកាន់នេះទៀតថា គ្មានមូលដ្ឋានទាល់តែសោះពីព្រោះតាំងពីលោកបានធ្វើជាប្រធានគណបក្សសង្គ្រោះជាតិកាលពីខែមេសាឆ្នាំ២០១៣ រហូតដល់ថ្ងៃដែលលោកបានលាលែងក្នុងខែកុម្ភៈ ឆ្នាំ២០១៧មក លោកសម រង្ស៊ីគូសបញ្ជាក់ថា គណបក្សសង្គ្រោះជាតិមិនដែលនឹកឃើញ ហើយមិនដែលធ្វើសកម្មភាពអ្វីមួយដែលអាចយកជាមូលដ្ឋាន ដើម្បីធ្វើការចោទប្រកាន់ខាងលើនេះ។
លោកកឹម សុខា ត្រូវបានអាជ្ញាធរខ្មែរចាប់ខ្លួនកាលពីយប់រំលងអធ្រាត្រឈានចូលថ្ងៃទី៣ ខែកញ្ញាក្រោមការ ចោទប្រកាន់ពីបទ «ក្បត់ជាតិ» ។ ចំពោះពាក្យថា“ក្បត់ជាតិ”នេះ លោកសម រង្ស៊ីបានចោទសួរជាសំណួរថា តើជា “អំពើក្បត់ជាតិ” ឬ ការដែលគេគ្រាន់តែចង់ឲ្យមានការផ្លាស់ប្តូរតាមបែបបទប្រជាធិបតេយ្យហើយព្យាយាមសម្រេចគោលដៅនេះ? ម៉្យាងវិញទៀត លោកក៏បានចោទសួរដែរថា តើជា“ការឃុបឃិតជាមួយបរទេស” ឬ ការដែលគេស្វែងរកសាមគ្គីភាពពីអ្នកប្រជាធិបតេយ្យទាំងអស់ក្នុងពិភពលោកដែលមានជំនឿលើគុណតម្លៃជាសកលចំពោះលទ្ធិប្រជាធិបតេយ្យ និងសិទ្ធិមនុស្ស? លោកសម រង្ស៊ី ក៏ទទូចសួរទៀតថា តើជា“អំពើក្បត់ជាតិ និងការឃុបឃិតជាមួយបរទេស”ឬ ការដែលគេស្នើសុំដំបូន្មានស្តីពីរបៀបដោះស្រាយវិវាទ ដោយសន្តិវិធីពីអ្នកជំនាញ? ឫការរៀបចំសិក្ខាសាលាលំហាត់ស្តីពីរបៀបតស៊ូដោយសន្តិវិធីដែលមានការចូលរួមពីអ្នកជំនាញ ពីអង្គការក្រៅរដ្ឋាភិបាលជាគ្រូបង្ហាត់នោះ?
សម្រាប់គណបក្សសង្រ្គោះជាតិ ការចាប់ខ្លួនលោកកឹម សុខាក្រោមបទចោទ“ក្បត់ជាតិ”នេះ គឺធ្វើឡើងដោយហេតុផលនយោបាយ និងជាទង្វើរំលោភច្បាប់ និងរដ្ឋធម្មនុញ្ញនៃប្រទេសកម្ពុជា។ គណបក្សប្រឆាំងក៏បានអំពាវនាវឲ្យអាជ្ញាធរខ្មែរដោះលែងលោកកឹម សុខាជាបន្ទាន់ និងដោយគ្មានលក្ខខណ្ឌ និងបានអំពាវនាវឲ្យសហគមន៍អន្តរជាតិជួយធ្វើអន្តរាគមន៍ ដើម្បីឲ្យមានការដោះលែងលោកកឹម សុខាវិញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ