គណបក្សទាំងពីរនៅរក្សាការសំងាត់នៃសមាសភាព គ.ជ.ប ថ្មី
ដូចការគ្រោងទុក នៅល្ងាចថ្ងៃចន្ទទី៦មេសាម្សិលម៉ិញនេះ ភាគីគណបក្សប្រជាជនកម្ពុជាដឹកនាំដោយលោក ស ខេង បានជួបពិភាក្សាជាមួយ លោក សម រង្ស៊ី ប្រធានគណបក្សសង្គ្រោះជាតិនៅឯវិមានរដ្ឋសភា។ កិច្ចពិភាក្សាបានផ្តោតទៅលើការជ្រើសរើសសមាសភាព គជប ថ្មី រួមទាំងការកំណត់តួនាទី ប្រធាន និងអនុប្រធាននៃស្ថាប័នរៀបចំការបោះឆ្នោតជាតិថ្មីនេះ។ ប៉ុន្តែកិច្ចប្រជុំកាលពីថ្ងៃម្សិលម៉ិញ ភាគីទាំងពីរបានរក្សាការសម្ងាត់នៃសមាសភាព គជប ថ្មី រហូតដល់ជំនួបលើកក្រោយនៃនឹងធ្វើឡើងនៅថ្ងៃទី៨មេសាខាងមុខ។
ចុះផ្សាយនៅថ្ងៃ៖
ស្តាប់ - ០២:៤២
នៅក្រោយកិច្ចប្រជុំកាលពីល្ងាចថ្ងៃចន្ទទី៦មេសាម្សិលម៉ិញ ភាគីគណបក្សប្រជាជនកម្ពុជា ដឹកនាំដោយលោក ស ខេង ប្រធានក្រុមតំណាងរាស្ត្រមតិភាគច្រើននៅរដ្ឋសភា និងលោក សម រង្ស៊ី ប្រធានក្រុមតំណាងរាស្ត្រមតិភាគតិចនៅរដ្ឋសភា បានផ្តោតទៅលើសមាសភាព សមាជិក គជប ថ្មី ទាំង៩នាក់ ក៍ប៉ុន្តែ ភាគីទាំងពីរនៅតែរក្សាការសម្ងាត់ មុនពេលការជួបគ្នាជាថ្មី ដែលគ្រោងនឹងធ្វើឡើងនៅល្ងាចថ្ងៃទី៨ខែមេសាខាងមុខ។
សូមបញ្ជាក់ថា កិច្ចប្រជុំដែលធ្វើឡើងដោយមានសមាសភាពបីនាក់ម្ខាងនេះ ភាគីគណបក្សគណបក្សប្រជាជនកម្ពុជា ដឹកនាំដោយលោក ស ខេង អមដោយមន្ត្រីជាន់ខ្ពស់ពីររូបទៀត គឺលោក គាត ឈន់ និងលោកស្រី ម៉ែន សំអន។ ចំណែកឯភាគីខាងគណបក្សសង្គ្រោះជាតិដឹកនាំដោយលោក សម រង្ស៊ី និងអមដោយ លោក កឹម សុខា អនុប្រធាន និងលោក យឹម សុវណ្ណ។
ការប្រជុំពិភាក្សាបានធ្វើឡើង នៅក្រោយពេលដែល រដ្ឋសភាបានបិទបញ្ចប់ការទទួលពាក្យស្នើសុំបេក្ខភាពជាសមាជិក គជប ថ្មីនៅប្រមាណជាម៉ោង៥និង៣០នាទីល្ងាចថ្ងៃទី៦មេសា។ តាមគំរោង ភាគីទាំងពីរនឹងជួបគ្នាជាថ្មីនៅថ្ងៃទី៨មេសាខាងមុខ បន្ទាប់មកគណៈកម្មាធិការអចិន្ត្រៃយ៍នៃរដ្ឋសភានឹងប្រជុំនៅថ្ងៃទី៩មេសា មុនពេលរដ្ឋសភាពបើកកិច្ចប្រជុំពេញអង្គដើម្បីអនុម័ត សមាសភាព គជប ថ្មីនៅថ្ងៃទី១៣មេសា។ អ្វីដែលគេដឹងពីសមាសភាព គជប ថ្មី នៅពេលនេះ គឺលោក ហង្ស ពុទ្ធា នាយកប្រតិបត្តិអង្គការសង្កេតការបោះឆ្នោតនិចហ្វិច និងលោក គួយ ប៊ុនរឿន មកពីគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ