ក្រុមហ៊ុនផលិតបារីរារែកក្នុងការចូលរួមបិទសារព្រមានសុខភាពលើកញ្ចប់បារី
ការបិទសារព្រមាននៅលើកញ្ចប់បារី ដែលមានការជម្រុញពីអង្គការសង្គមស៊ីវិលនានា ហាក់ដូចជាបរាជ័យ មកទល់ពេលនេះ ខណៈដែលកម្ពុជាមានច្បាប់ស្តីពីការត្រួតពិនិត្យផលិតផលថ្នាំជក់ និងអនុក្រឹត្យមួយចំនួន រួចហើយក៏ដោយ។ ការលើកឡើងនេះ បន្ទាប់ពីកញ្ចប់បារីមួយចំនួន ដែលគេដាក់លក់ នៅមិនទាន់បានបិទសារព្រមានពីសុខភាពនៅឡើយ ចាប់តាំងពី អនុក្រឹត្យស្តីពីការបោះពុម្ពសារព្រមានជាភាសាខ្មែរ និងជារូបភាពនៅលើកញ្ចប់ផលិតផលថ្នាំជក់ បានចូលជាធរមានកាលពីខែកក្កដាឆ្នាំ ២០១៦។
ចុះផ្សាយនៅថ្ងៃ៖
ស្តាប់ - ០២:០៨
ប្រធានអង្គការចលនាកម្ពុជាលោក វេជ្ជបណ្ឌិត មុំ គង់ បានថ្លែងថា ការដែលនៅតែមានកញ្ចប់បារីមួយចំនួន មិនបិទសារព្រមានសុខភាព ហើយត្រូវគេដាក់លក់នៅក្នុងទីផ្សារ គឺបណ្តាលមកពីក្រុមហ៊ុនផលិតបារី ដែលបានចូលរួមដែរ តែមិនពេញលេញ។ ក្រុមហ៊ុនបារីទាំងនោះ មានទាំងក្រុមហ៊ុនក្នុងស្រុក និងបារីនាំចូលពីបរទេស។ បញ្ហានេះគឺអាស្រ័យទៅលើក្រសួងសុខាភិបាល ដែលមានសមត្ថកិច្ចធ្វើការផាកពិន័យ យោងទៅតាមច្បាប់ដែលបានដាក់ឲ្យអនុវត្ត។ នេះបើតាមលោក មុំ គង់។
ជាការកត់សម្គាល់ រដ្ឋាភិបាលកម្ពុជាបានយកចិត្តទុកដាក់ទៅលើកិច្ចការត្រួតពិនិត្យផលិតផលថ្នាំជក់។ក្រោមកិច្ចផ្ដួចផ្ដើមរបស់ក្រសួងសុខាភិបាល អនុក្រឹត្យពីរត្រូវបានអនុម័តទៅតាមការចង្អុលបង្ហាញក្នុងច្បាប់រួមមាន អនុក្រឹត្យស្ដីពីវិធានការហាមការជក់ឬការបង្ហុយផ្សែងផលិតផលថ្នាំជក់នៅកន្លែងធ្វើការ ឬកន្លែងសាធារណៈ និង អនុក្រឹត្យស្ដីពីការបោះពុម្ពសារព្រមានសុខភាពជាភាសាខ្មែរ និងជារូបភាពលើកញ្ចប់ផលិតផលថ្នាំជក់។ ក្រៅពីក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុក៏បានយកចិត្តទុកដាក់ក្នុងការកាត់បន្ថយការប្រើប្រាស់ថ្នាំជក់ តាមរយៈការអនុវត្តវិធានការដំឡើងពន្ធពីរដងបន្តបន្ទាប់គ្នាផងដែរ។
យោងតាមអង្គការសុខភាពពិភពលោក ជារៀងរាល់ឆ្នាំប្រជាពលរដ្ឋកម្ពុជា ១ម៉ឺននាក់ បានស្លាប់ដោយសារការប្រើប្រាស់ថ្នាំជក់។ ចំណាយទៅលើការទិញបារីនៅកម្ពុជាមួយឆ្នាំៗ អស់ប្រមាណ ២០០ លានដុលា្លរ ដែលតម្លៃនេះអាចធៀបបាននឹងការសង់ផ្ទះឈើចំនួនជាង ៤ម៉ឺនខ្នងសម្រាប់ប្រជាពលរដ្ឋកម្ពុជានៅជនបទ។ នៅក្នុងឆ្នាំ ២០១៣ កម្ពុជាខាតបង់ ៣៤,៥ លានដុល្លារទៅលើការព្យាបាលជំងឺ ៥មុខដែលទាក់ទងនឹងការប្រើប្រាស់ថ្នាំជក់។
សូមរំលឹកដែរថា ប្រទេសកម្ពុជា បានផ្តល់សច្ចាប័នចូលជាសមាជិកនៃអនុសញ្ញាស្តីពីការត្រួតពិនិត្យថ្នាំជក់របស់អង្គការសុខភាពពិភពលោកតាំងពីឆ្នាំ ២០០៥ ក្នុងទិសដៅកាត់បន្ថយការស្លាប់ ការកើតជំងឺ និង ពិការភាពដែលបណ្ដាលមកពីការប្រើប្រាស់ថ្នាំជក់ក្នុងចំណោមពលរដ្ឋកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ