ឆ្នាំ ២០២០ កម្ពុជាប្តេជ្ញាកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍ឲ្យបាន ៩% ក្នុងមួយឆ្នាំ
ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកលោក ស ខេង នៅព្រឹកថ្ងៃទី ០២ ខែ មករា នេះបានបង្ហាញពីជំហររបស់កម្ពុជា ក្នុងការកាត់បន្ថយគ្រោះថ្នាក់ចរាចរណ៍ចំនួនអ្នកស្លាប់គ្រោះថ្នាក់ចរាចរណ៍ យ៉ាងហោចណាស់ ៩ % ក្នុងមួយឆ្នាំ នាឆ្នាំ ២០២០។ ការលើកឡើងយ៉ាងដូច្នេះ ស្របពេល ដែលចំនួនអ្នកស្លាប់ដោយសារគ្រោះថ្នាក់ចរាចរណ៍នៅក្នុងឆ្នាំ ២០១៦ ថយចុះ ២៧១ នាក់ ស្មើនឹង ១៤% បើប្រៀបធៀបនឹងឆ្នាំ ២០១៥។ ជុំវិញបញ្ហាចរារណ៍ នេះ ដើម្បីកាត់បន្ថយ និងការកកស្ទះចរាចរណ៍ ក្រសួងមហាផ្ទៃអាចនឹងពិចារណា ជ្រើសរើស ប៉ូលិសចរចរណ៍ជាប់កិច្ចសន្យាបន្ថែមទៅលើកម្លាំងប៉ូលិសចរាចរណ៍ ដែលមានស្រាប់នៅពេលបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០១:៣៩
នៅក្នុងរបាយការណ៍បូកសរុបលទ្ធផលអនុវត្តច្បាប់ចរាចរណ៍ផ្លូវគោក ថ្មីឆ្នាំ ២០១៦ និងទិសដៅការងារឆ្នាំ ២០១៧ បានបង្ហាញថា គ្រោះថ្នាក់ចរាចរណ៍នៅឆ្នាំ ២០១៦ មានភាពថមថោយ ជាងឆ្នាំ ២០១៥។ ក្នុងរយៈពេលពេញមួយឆ្នាំ ២០១៦ គ្រោះថ្នាក់ចរាចរណ៍នៅទូទាំងប្រទេសកម្ពុជា បានបន្តធ្លាក់ចុះគួរឲ្យកត់សម្គាល់ បើប្រៀបធៀបនឹងឆ្នាំកន្លងទៅ។ គ្រោះថ្នាក់ចរាចរណ៍ ឆ្នាំ ២០១៦ បានកើតឡើងចំនួន ៣៧០០ លើក បណ្តាលឲ្យស្លាប់ចំនួន ១៧១៧ នាក់ និងរបួស ៦៦០៧ នាក់ ធ្ងន់ ៥៩% ដែលភាគច្រើនកើតឡើងនៅទីក្រុងភ្នំពេញ ខេត្តព្រះសីហនុ និងខេត្តកំពត។
ដោយនៅក្នុងនោះ ភាគច្រើននៃគ្រោះថ្នាក់ចរាចរណ៍ នៅតែកើតឡើងខ្ពស់ចំពោះអ្នកជិះម៉ូតូ។ ក្នុងចំណោមអ្នកស្លាប់ជាអ្នកជិះម៉ូតូ ចំនួន ១២៧៤ នាក ស្មើនឹង ១១% អ្នកស្លាប់ ថយចុះ ២៧១ នាក់ ស្មើនឹង ១៤% និងអ្នករបួសថយចុះ ចំនួន ៥៤២ នាក់ ស្មើ ៨%។ មូលហេតុដែលបណ្តាលឲ្យកើតមានគ្រោះថ្នាក់ចរាចរណ៍មានជាអាថ៍៖ ការបើកបរលើសល្បឿនកំណត់ មិនប្រកាន់ស្តាំ ស្រវឹង មិនគោរពសិទ្ធិ វ៉ាជែង កត្តាយានយន្ត និងងងុយដេក។
លោក ស ខេង ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក និងរដ្ឋមន្រ្តីក្រសួងមហាផ្ទៃ បានណែនាំឲ្យ អាជ្ញាធរ និងថ្នាក់ដឹកនាំនៅតាមបណ្តារាជធានី ខេត្ត ត្រូវចាំបាច់ត្រូវប្រជុំផ្សព្វផ្សាយពីច្បាប់ចរាចរណ៍ផ្លូវគោក បញ្ហាភូមិឃុំមានសុវត្ថិភាព និងតាមដានសកម្មភាពអនុវត្តច្បាប់របស់មន្រ្តីថ្នាក់ក្រោមជាតិ យ៉ាងហោចណាស់ មួយទៅពីរដង ក្នុងរយៈពេលពីរសប្តាហ៍។
មិនត្រឹមតែប៉ុណ្ណោះ ដើម្បីសម្រេចបានគោលដៅកាត់បន្ថយចំនួនអ្នកស្លាប់ឲ្យបាន ៥០% នាឆ្នាំ ២០២០ តាមផែនការទសវត្សរ៍របស់អង្គការសហប្រជាជាតិ យ៉ាងហោចណាស់ក្នុងមួយឆ្នាំ ៩% គណៈកម្មាការជាតិសុវត្ថិភាពចរាចរណ៍ បានដាក់ចេញនូវទិសដៅសំខាន់ៗមួយចំនួនដូចជា បង្កើនសុវត្ថិភាព ហេដ្ឋារចនាសម្ព័ន្ធផ្លូវថ្នល់ បង្កើនសុវត្ថិភាពយានយន្ត វិសោធនកម្ម និងពង្រឹងការអនុវត្តច្បាប់ ការគ្រប់គ្រងនិងវាយតម្លៃលើសុវត្ថិភាពដឹកជញ្ជូន អ្នកដំណើរ និងទំនិញជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ