ចូលឆ្នាំ៣ថ្ងៃ អ្នកស្លាប់ដោយគ្រោះថ្នាក់ចរាចរណ៍កើនឡើងលើសឆ្នាំមុន
នៅថ្ងៃទី១៦ ខែមេសានេះ របាយការណ៍ពីនាយកដ្ឋាននគរបាលចរាចរណ៍ បានឲ្យដឹងថាអ្នកស្លាប់ដោយគ្រោះថ្នាក់ចរាចរណ៍ក្នុងរយៈពេល៣ថ្ងៃនៃពិធីបុណ្យចូលឆ្នាំខ្មែរ កើនឡើង បើប្រៀបធៀបរយៈពេលដូចគ្នាកាលពីឆ្នាំ២០១៥។ ចំណែកករណីគ្រោះថ្នាក់ចរាចរណ៍បានថយចុះតែមួយករណីប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គិតចាប់ពីថ្ងៃទី១៣ ដល់ថ្ងៃទី១៥ ខែមេសា ចំនួនអ្នកស្លាប់ដោយគ្រោះថ្នាក់ចរាចរណ៍មានចំនួន៣៤នាក់។ បើប្រៀបធៀបឆ្នាំ២០១៥ ក្នុងរយៈពេល៣ថ្ងៃនៃពីធីបុណ្យចូលឆ្នាំខ្មែរដូចគ្នា គឺករណីអ្នកស្លាប់ដោយគ្រោះថ្នាក់ចរាចរណ៍បានកើនឡើងចំនួន៩នាក់។ នេះបើតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ។
របាយការណ៍ខាងលើក៏បានឲ្យដឹងដែរថា ចំនួនគ្រោះថ្នាក់ចរាចរណ៍ក្នុងឱកាសពិធីបុណ្យចូលឆ្នាំថ្មី គឺមានចំនួន៧៣លើក ទូទាំងប្រទេស ហើយបើប្រៀបធៀបនឹងឱកាសចូលឆ្នាំកាលពីឆ្នាំ២០១៥ មានការថយចុះតែមួយករណីប៉ុណ្ណោះ។ គ្រោះថ្នាក់ទាំង៧៣លើកនេះ បានបណ្តាលឲ្យមានអ្នករងរបួសធ្ងន់ ៩៧នាក់ បានកើនឡើង១០នាក់ ប្រៀបធៀបរយៈពេលដូចគ្នាកាលពីឆ្នាំ២០១៥ និងអ្នករបួសស្រាល៥៦នាក់ថយចុះ២២នាក់។
មូលហេតុដែលបណ្តាលឲ្យមានគ្រោះថ្នាក់ចរាចរណ៍ និងបង្កឲ្យមានមនុស្សស្លាប់ច្រើននេះ គឺដោយសារតែការបើកបរលឿន។ បើតាមរបាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានឲ្យដឹងទៀតថា ចំនួនអ្នកស្លាប់ដោយការបើកបរលើសល្បឿន គឺមានរហូតដល់២១នាក់ ខណៈដែលអ្នកស្លាប់ដោយសារតែបើកបរមានជាតិស្រវឹងមានតែ៣នាក់ប៉ុណ្ណោះ។ អ្នកស្លាប់ ដោយសារការបើកបរប្រជែងគ្នាមានចំនួន៨នាក់។ អ្នកស្លាប់ដោយការបើកបរមិនគោរពសិទ្ធិ និងមិនប្រកាន់ស្តាំ មានចំនួន២នាក់។
យោងតាមរបាយការណ៍ចុងក្រោយរបស់អង្គការសុខភាពពិភពលោក WHO កាលពីឆ្នាំ២០១៣ បានឲ្យដឹងថាអ្នកស្លាប់ដោយគ្រោះថ្នាក់ចរាចរណ៍ គឺមានប្រមាណ២.៤០០នាក់ ជារៀងរាល់ឆ្នាំនៅក្នុងប្រទេសកម្ពុជា។ យ៉ាងណាមិញ បើតាមការព្យាករណ៍ទុករបស់គណៈកម្មាធិការជាតិសុវត្ថិភាពចរាចរណ៍ផ្លូវគោកឆ្នាំ២០១៤បានឲ្យដឹងថា ប្រសិនបើគ្មានវិធានការទប់ស្កាត់ និងកាត់បន្ថយគ្រោះថ្នាក់ចរាចរណ៍ទេ នោះចំនួនអ្នកស្លាប់ដោយគ្រោះថ្នាក់ចរាចរណ៍នឹងកើនដល់៣.២០០នាក់នៅឆ្នាំ២០។
កន្លងមករដ្ឋាភិបាលកម្ពុជាបានបង្កើតផែនការសុវត្ថិភាពចរាចរណ៍ផ្លូវគោគរយៈពេល១០ឆ្នាំពីឆ្នាំ២០១១ ដល់២០២០ អាចនឹងកាត់បន្ថយអ្នកស្លាប់ដោយគ្រោះថ្នាក់ចរាចរណ៍បានយ៉ាងតិច៥០ភាករយ ក្នុងឆ្នាំ២០២០ និងអាចសង្គ្រោះជីវិតមនុស្សបានយ៉ាងតិច៧.៣៥០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ