សាលាក្រុងភ្នំពេញ កំពុងពិចារណាពីការបិទក្លឹបកម្សាន្តត្រឹមម៉ោង១២យប់ដើម្បីកាត់បន្ថយគ្រោះថ្នាក់ចរាចរណ៍
សាលារាជធានីភ្នំពេញ កំពុងតែពិចារណាថានឹងតម្រូវឲ្យក្លឹបកម្សាន្ត នៅក្នុងទីក្រុងភ្នំពេញទាំងអស់ បិទទ្វារអាជីវកម្មរបស់ពួកគេ នៅត្រឹមម៉ោង ១២យប់។ យ៉ាងណាក៏ដោយ នេះគឺត្រឹមតែជាការពិចារណាប៉ុណ្ណោះ គម្រោងយ៉ាងណា គឺត្រូវទាមទារពេលវេលាសិក្សា និងជួបពិភាក្សាជាមួយភាគីពាក់ព័ន្ធជាមុនសិន។ តាមសាលាក្រុងភ្នំពេញ ប្រសិនបើការពិចារណានេះ លេចចេញជាការអនុវត្ត នោះទីក្រុងភ្នំពេញនឹងអាចថែរក្សាជីវិតពលរដ្ឋពីគ្រោះថ្នាក់ចរាចរណ៍បានច្រើន។
ចុះផ្សាយនៅថ្ងៃ៖
ស្តាប់ - ០១:២៤
ដោយសារបច្ចុប្បន្នគ្រោះថ្នាក់ចរាចរណ៍ ជាមេរោគសង្គមដ៏ធ្ងន់ធ្ងរ ហើយភាគច្រើននៃគ្រោះថ្នាក់ចរាចរណ៍ គឺកើតចេញពីគ្រឿងស្រវឹង ដូច្នេះទើបសាលារាជធានីភ្នំពេញ មានគំនិតចង់តម្រូវឲ្យក្លឹបកម្សាន្តពេលរាត្រី គួរតែបិទទ្វារត្រឹមម៉ោង ១២យប់។ លោកឡុង ឌីម៉ង់ អ្នកនាំពាក្យសាលារាជធានីភ្នំពេញ បានប្រាប់វិទ្យុបារាំងអន្តរជាតិថា ទោះជាយ៉ាងណា នេះគឺស្ថិតនៅក្នុងការពិចារណាប៉ុណ្ណោះ គម្រោងពិតប្រាកដគឺមិនទាន់ ត្រូវបានកំណត់នោះទេ។
តាមលោកឡុង ឌីម៉ង់ ប្រសិនបើគំនិតនេះ នឹងត្រូវបានយកទៅអនុវត្ត នោះទីក្រុងភ្នំពេញ នឹងអាចបន្ថយបាននូវគ្រោះថ្នាក់ចរាចរណ៍នៅពេលយប់ ដែលភាគច្រើនកើតចេញពីការទទួលទានគ្រឿងស្រវឹងហួសកម្រិត។ គ្រឿងស្រវឹង ដែលត្រូវបានដាក់លក់ នៅតាមក្លឹបកម្សាន្តនានា។ យ៉ាងណាក៏ដោយ លោកឡុង ឌីម៉ង់ បានបង្ហាញថា គំនិតនេះ ប្រហែលជាអាចប៉ះពាល់បន្តិចបន្តួច ដល់សេដ្ឋកិច្ចរបស់វិស័យឯកជន ប៉ុន្តែវាមានសារៈសំខាន់សម្រាប់ការពារជីវិតមនុស្ស ដែលមិនអាចកាត់ថ្លៃបាន។ លោកឡុង ឌីម៉ង់ បានបញ្ជាក់បន្តថា សាលារាជធានីភ្នំពេញ នៅត្រូវការពេលវេលា ដើម្បីវិភាគ សិក្សា និងពិភាក្សាឲ្យកាន់តែលម្អិតជាមួយនឹងភាគីពាក់ព័ន្ធជាមុនសិន។
សូមបញ្ជាក់ថា នៅក្នុងបទបង្ហាញរបស់ក្រសួងសាធារណការ និងដឹកជញ្ជូន កាលពីសប្តាហ៍មុន បានបង្ហាញថា គ្រោះថ្នាក់ចរាចរណ៍ បានធ្វើឱ្យសេដ្ឋកិច្ចកម្ពុជាខាតបង់ ដែលគិតជាទឹកប្រាក់ រហូតដល់ជាង ៣០០លានដុល្លារអាមេរិក ក្នុងមួយឆ្នាំៗ។ ហើយបើតាមរបាយការណ៍របស់អង្គការមូលនិធិបង្ការរបួសអាស៊ី មានមនុស្សប្រមាណជាង ២ពាន់២២០នាក់ បានស្លាប់ដោយសារគ្រោះថ្នាក់ចរាចរណ៍ ក្នុងឆ្នាំ ២០១៤ ដែលចំនួននេះ គឺកើនឡើង ក្នុងរយៈពេល ៩ឆ្នាំ ចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ