ល្បែងទាញព្រ័ត្រកម្ពុជា ត្រូវបានបញ្ចូលជាបេតិកភណ្ឌវប្បធម៌អរូបិយរបស់មនុស្សជាតិ
បន្ទាប់ពីប្រើពេលសិក្សា និងត្រួតពិនិត្យសំណើរបស់កម្ពុជាអស់រយៈពេលមួយឆ្នាំ កាលពីថ្ងៃម្សិលមិញនេះ អង្គការយូណេស្កូ បានសម្រេចដាក់បញ្ចូលល្បែងទាញព្រ័ត្ររបស់ប្រទេសកម្ពុជា និងល្បែងទាញព្រ័ត្ររបស់ប្រទេស៣ទៀត ជាបេតិកភណ្ឌវប្បធម៌អរូបិយរបស់មនុស្សជាតិ។ ការដាក់បញ្ចូលនេះ ទទួលបានការសាទរពីមន្ត្រីក្រសួងវប្បធម៌ និងប្រជាពលរដ្ឋខ្មែរ។អត្តបទដោយ៖ ឃុត សុខឿន
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ការសម្រេចដាក់បញ្ចូលល្បែងទាញព្រ័ត្ររបស់កម្ពុជា ជាបេតិកភណ្ឌវប្បធម៌អរូបិយរបស់មនុស្សជាតិ ធ្វើឡើងនៅក្នុងកិច្ចប្រជុំលើកទី១០ នៃគណៈកម្មការបេតិកភណ្ឌពិភពលោក របស់អង្គការយូណេស្កូ ដែលប្រព្រឹត្តទៅ ចាប់ពីថ្ងៃទី៣០ ខែវិច្ឆិកា ដល់ថ្ងៃទី៤ធ្នូ ឆ្នាំ ២០១៥ នាទីក្រុងវិនហ៊ើក ប្រទេសណាមីប៊ី។
លោក ហាប់ ទូច អគ្គនាយកនៃអគ្គនាយកដ្ឋានបច្ចេកទេសវប្បធម៌ របស់ក្រសួងវប្បធម៌បានអោយដឹងថា កម្ពុជាបានស្រាវជ្រាវ និងរៀបចំឯកសារពាក់ព័ន្ធនឹងល្បែងទាញព្រ័ត្រនេះនៅឆ្នាំ២០១៣ ហើយបានបញ្ជូនសំណើទៅអង្គការយូណេស្កូនៅដើមឆ្នាំ២០១៤។
លោក ហាប់ ទូច បានឲ្យដឹងទៀតថា ដោយល្បែងទាញព្រ័ត្រមិនមែនជាល្បែងផ្តាច់មុខរបស់កម្ពុជា និងដោយអង្គការយូណេស្កូមានបំណងអោយប្រទេសដែលមានល្បែងប្រហាក់ប្រហែលធ្វើការរួមគ្នា ដូច្នេះហើយ កម្ពុជាក៏បានបញ្ជូនសំណើរបស់ខ្លួនដោយរួមនឹងសំណើរបស់ប្រទេស៣ទៀតគឺ ប្រទេសហ្វីលីពីន ប្រទេសកូរ៉េ និងប្រទេសវៀតណាម ទៅកាន់អង្គការយូណេស្កូ។
ទាក់ទងនឹងការសម្រេចនេះ លោកហាប់ ទូច បន្តថានៅក្នុងលក្ខខណ្ឌរបស់ខ្លួន អង្គការយូណេស្កូបានយកចិត្តទុកដាក់យ៉ាងខ្លាំងចំពោះសារៈសំខាន់របស់ល្បែងទាញព្រ័ត្រនេះនៅក្នុងសហគមន៍នីមួយៗ ជាជាងប្រវត្តិរបស់ល្បែងនេះ។ ដូច្នេះហើយទើបល្បែងទាញព្រ័ត្ររបស់ប្រទស៣ទៀត ត្រូវបានបញ្ចូលជាបេតិកភណ្ឌវប្បធម៌អរូបិយរបស់មនុស្សជាតិ។
ក្រៅពីល្បែងទាញព្រ័ត្រនេះ អង្គការយូណេស្កូ ក៏បានដាក់បញ្ចូល ប្រាសាទព្រះវិហារ ល្ខោនស្រមោលស្បែកធំ របាំព្រះរាជទ្រព្យ ប្រាសាទអង្គរវត្ត ជាបេតិកភណ្ឌវប្បធម៌របស់មនុស្សជាតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ