ក្រសួងធនធានទឹក អំពាវនាវពលរដ្ឋឲ្យប្រុងប្រយ័ត្នចំពោះបាតុភូតធម្មជាតិក្នុងសប្តាហ៍នេះ
ក្រសួងធនធានទឹក និងឧតុនិយម បានអំពាវនាវឲ្យប្រជាពលរដ្ឋមានការប្រុងប្រយ័ត្ន ចំពោះបាតុភូតធម្មជាតិមួយចំនួន ដូចជា ផ្គរ រន្ទះ និងខ្យល់កន្ត្រាក់ នៅពេលមេឃរកកលភ្លៀង។ ការប្រកាសឲ្យមានការប្រុងប្រយ័ត្នដូច្នេះ បានធ្វើឡើងខណៈដែលក្រសួងធនធានទឹកមើលឃើញថាប្រទេសកម្ពុជាត្រូវរងនូវឥទ្ធិពលសម្ពាធទាប ចាប់ពីថ្ងៃទី ១៥ មេសា ដល់ថ្ងៃទី ២១ ឬ ២២មេសា។
ចុះផ្សាយនៅថ្ងៃ៖
ស្តាប់ - ០១:២៦
យោងតាមការព្យាករណ៍ របស់ក្រសួងធនធានទឹក និងឧតុនិយម បន្ទាប់ពីបានធ្វើការតាមដាន និងសង្កេតលើស្ថានភាពអាកាសធាតុ បានបង្ហាញថា ឥទ្ធិពលរបស់សម្ពាធទាបមួយ បានកើតឡើង និងកំពុងស្ថិតនៅលើភាគខាងជើងនៃប្រទេសកម្ពុជា ចាប់ពីព្រឹកថ្ងៃទី ១៥មេសា។ ហើយឥទ្ធិពលនៃសម្ពាធទាបនេះ បាននឹងកំពុងបង្កឲ្យមានភ្លៀងធ្លាក់ពីមធ្យមទៅច្រើន ក្នុងក្របខ័ណ្ឌស្ទើរទូទាំងប្រទេស រយៈពេលពេញមួយសប្តាហ៍នេះ។
ក្រសួងធនធានទឹក តាមរយៈសេចក្តីជូនដំណឹងពីការព្យាករណ៍អាកាសធាតុរបស់ខ្លួន បានអំពាវនាវឲ្យប្រជាពលរដ្ឋ មានការប្រុងប្រយ័ត្ន ចំពោះបាតុភូត ផ្គរ រន្ទះ និងខ្យល់កន្ត្រាក់ នៅពេលមេឃរកកលភ្លៀង ជាពិសេសចំពោះពលរដ្ឋ ដែលរស់នៅតាមបណ្តាខេត្តតំបន់ទំនាបកណ្តាល ភាគពាយ័ព្យ។ ខេត្តនៅតំបន់ទំនាបកណ្តាល អាចមានខ្យល់កន្ត្រាក់ ចាប់ពីថ្ងៃទី ១៥ ដល់ថ្ងៃទី ១៧មេសា។
អ្នកនាំពាក្យក្រសួងធនធានទឹក លោក ចាន់ យុត្ថា បានឲ្យដឹងថា ដើម្បីការពារខ្លួនពីគ្រោះថ្នាក់ផ្សេងៗ តាមរយៈបាតុភូតធម្មជាតិនេះ ពលរដ្ឋ ត្រូវរកកន្លែងសុវត្ថិភាពជ្រកកោន ពេលឃើញមេឃរកកលភ្លៀង។ ជាពិសេស កុំស្ថិតនៅក្រោមដើមឈើ ពេលអាកាសធាតុប្រែប្រួល ហើយត្រូវប្រុងប្រយ័ត្នជានិច្ចចំពោះការប្រើប្រាស់គ្រឿងអេឡិចត្រូនិក ដូចជាទូរស័ព្ទដៃ ទូរទស្សន៍ជាដើម។
តាមលោកចាន់ យុត្ថា បាតុភូតធម្មជាតិ មិនអាចទប់ទល់បានទេ ប៉ុន្តែអាចការពារខ្លួនបាន។ តាមអ្នកនាំពាក្យក្រសួងធនធានទឹកដដែល ចាប់តាំងពីល្ងាចថ្ងៃអាទិត្យមក មានខេត្តមួយចំនួននៃប្រទេសកម្ពុជា បានចាប់ផ្តើម មានភ្លៀងធ្លាក់ជាបណ្តើរៗហើយ ដូចជានៅខេត្តបាត់ដំបង ប៉ៃលិន ត្បូងឃ្មុំ និងខេត្តឧត្តរមានជ័យជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ