ក្រសួងធនធានទឹក៖ កម្ពុជានឹងរងឥទ្ធិពលព្យុះត្រូពិក«ដំរី»នៅសប្តាហ៍នេះ
នៅសប្តាហ៍នេះ តំបន់ខ្លះនៃប្រទេសកម្ពុជា នឹងមានភ្លៀងធ្លាក់ និងខ្យល់បក់បោក ដោយសារតែឥទ្ធិពលនៃព្យុះត្រូពិកមួយឈ្មោះថា «ព្យុះដំរី»។ យ៉ាងណាក៏ដោយ លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម អះអាងថា នឹងមិនបង្កផលប៉ះពាល់ដល់ក្របខណ្ឌទូទាំងប្រទេស និងដំណើរការរៀបចំព្រះរាជពិធីបុណ្យអុំទូកនៅភ្នំពេញឡើយ។
ចុះផ្សាយនៅថ្ងៃ៖
ស្តាប់ - ០១:៥៩
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានបញ្ជាក់ប្រាប់វិទ្យុបារាំងនៅថ្ងៃសុក្រនេះ ថា ព្យូត្រូពិកឈ្មោះ «ដំរី» នេះ បានបោកបក់ចេញពីប្រទេសហ្វីលីពីន និងវិវត្តក្លាយជាព្យុះត្រូពិកឆ្លងកាត់ ផ្ទៃសមុទ្រចិនខាងត្បូង ហើយឆ្ពោះមកកាន់ឆ្នេរភាគខាងត្បូងប្រទេសវៀតណាម។ ព្យុះត្រូពិកដំរីនេះ ត្រូវបានរំពឹងថានឹងចូលមកដល់ប្រទេសកកម្ពុជា នៅអំឡុងព្រលប់ថ្ងៃសៅរ៍ សប្តាហ៍នេះ។
យ៉ាងណាក៏ដោយ មន្ត្រីជំនាញរូបនេះបានបញ្ជាក់ថា បើតាមការព្យាករណ៍ ខ្យល់«ព្យុះដំរី»នេះ នឹងមិនបង្អាក់ដល់ដំណើការនៃការបា្ររព្ធព្រះរាជពិធីបុណ្យអុំទូក ដែលកំពុងប្រារព្ធនៅភ្នំពេញឡើយ នៅថ្ងៃទីមួយ និងថ្ងៃទីពីរនៃព្រះរាជពិធី ។ ក៏ប៉ុន្តែសម្រាប់ថ្ងៃទីបី ពោលគឺថ្ងៃទី ៤វិច្ឆិកា លោក ចាន់ យុត្ថា ថា អាចចាប់ផ្ដើមមានភ្លៀងធ្លាក់នៅក្បាលព្រលប់ ហើយថា រហូតមកទល់ពេលនេះ ក្រសួងធនធានទឹក កំពុងបន្តតាមដាន។
ស្របពេលជាមួយគ្នាដែលកម្ពុជាកំពុងទទួលរងនូវខ្យល់ជំនោរឦសាន ឬជ្រលងសម្ពាធទាប ដូច្នេះហើយខ្យល់បោកបក់ដែលបង្កពី «ព្យុះដំរី» នេះនឹងមិនសូវបង្កជាផលប៉ះពាល់ នោះទេ។ តែនៅក្របខណ្ឌទូទាំងប្រទេស ភ្លៀងនឹងចាប់ផ្ដើមធ្លាក់រាយប៉ាយ ចាប់ពីថ្ងៃទី៥ ដល់ថ្ងៃទី១០ ខែវិច្ឆិកា។ នេះបើតាមលោក ចាន់ យុត្ថា។
ចំណែកតំបន់ដែលរងឥទ្ធិពល«ព្យុះដំរី»នេះច្រើន រួមមានបណ្ដាខេត្តជាប់ព្រំដែនវៀតណាម តំបន់មាត់សមុទ្រ និងតំបន់ទំនាបកណ្ដាលប៉ែកខាងកើតនិងត្បូង រួមមាន៖ រាជធានីភ្នំពេញ កណ្តាល កំពង់ស្ពឺ តាកែវ កំពង់ឆ្នាំង ស្វាយរៀង ព្រៃវែង និងត្បូងឃ្មុំ នឹងមានភ្លៀងធ្លាក់ខ្លាំង ហើយបង្កជាជំនន់ទឹកភ្លៀង។ ដោយឡែកនៅតំបន់មាត់សមុទ្រវិញ លោក ចាន់ យុត្ថា បានអំពាវនាវឲ្យប្រជាពលរដ្ឋ និងប្រជានេសាទ បង្កើនការប្រុងប្រយ័ត្នខ្ពស់ ដើម្បីជៀសវាងគ្រោះថ្នាក់ជាយថាហេតុ។
តាមគេហទំព័រ AccuWeather កាលពីថ្ងៃព្រហស្បតិ៍ បានសរសេរថា នៅហ្វីលីពីន ខ្យល់«ព្យុះដំរី» បានបង្កជាការរអិលបាក់ដី ការរំខានដល់អាកាសចរណ៍ និងសកម្មភាពនាវាចរណ៍ និងបណ្ដាលឱ្យមនុស្សពីរនាក់ស្លាប់។ ចំណែកនៅប្រទេសវៀតណាមវិញ អំឡុងថ្ងៃសុក្រ និងថ្ងៃសៅរ៍ អាជ្ញាធរបានព្យាករណ៍ថា អាចនឹងមានការរអិលបាក់ដី ព្យុះបោកបក់ និងភ្លៀងខ្យល់ នៅពេល«ព្យុះដំរី»នេះ ធ្វើដំណើរមកដល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ