ក្រសួងការងារ និងសហជីព មិនទាន់កំណត់ចំនួនប្រាក់ឈ្មួលអប្បបរមាកម្មករ សម្រាប់ឆ្នាំ២០១៦
ក្រសួងការងារ និងបណ្តុះបណ្តាលវិជ្ជាជីវៈ រួមនឹងសហជីពកម្មករ បានបញ្ជាក់ថា នៅមិនទាន់អាចកំណត់ចំនួនប្រាក់ឈ្មួលអប្បបរមា ដែលគ្រោងនឹងមានការចរចារតំឡើង ដល់កម្មករ សម្រាប់ឆ្នាំ ២០១៦ខាងមុខ នៅឡើយទេ។ ការកំណត់នេះ នឹងចេញជារូបរាង ល្គិកណាមានការស្រាវជ្រាវ ពីគ្រប់ភាគីជាមុនសិន។ នេះគឺជាការលើកឡើង នៅក្នុងសន្និសីទថ្នាក់ជាតិលើកទី៦ ដើម្បីសន្តិភាពទំនាក់ទំនងវិជ្ជាជីវៈ ប្រាក់ឈ្មួលអប្បបរមា វិវាទអំពីផលប្រយោជន៍ និងការវិភាគកូដកម្ម ដែលបានធ្វើឡើង នៅសណ្ឋាគារអាំងទែកុងទីណង់តាល់ នាព្រឹកថ្ងៃទី ១៦មិថុនានេះ។
ចុះផ្សាយនៅថ្ងៃ៖
ស្តាប់ - ០២:០៩
ចាប់ពីចន្លោះពីខែកក្កដា ដល់ខែសីហា ឆ្នាំ២០១៥នេះតទៅ គ្រប់ភាគីដែលធ្វើការទាក់ទងនឹងកម្មករ នឹងបើកការពិភាក្សាគ្នា ៣ដំណាក់កាល ពីបញ្ហាការកំណត់ប្រាក់ឈ្មួលអប្បបរមា ដល់កម្មករ-ការនី រោងចក្រ នៅក្នុងប្រទេសកម្ពុជា។ ប៉ុន្តែស្របពេលដែលការពិភាក្សាជិតមក គ្រប់ភាគី ទាំងតំណាងរដ្ឋាភិបាល និងសហជីព នៅមិនទាន់មានការស្រាវជ្រាវ ដើម្បីកំណត់បានថា នឹងត្រូវតំឡើងចំនួនប្រាក់ឈ្មួលប៉ុន្មានបន្ថែម ដល់កម្មករ សម្រាប់ឆ្នាំ ២០១៦ នៅឡើយទេ។
លោកអ៊ិត សំហេង រដ្ឋមន្ត្រីក្រសួងការងារ បានថ្លែងប្រាប់អ្នកសារព័ត៌មាន នៅក្នុងសន្និសីទថ្នាក់ជាតិពីទំនាក់ទំនងវិជ្ជាជីវៈ ដែលរៀបចំដោយក្រុមប្រឹក្សាអាជ្ញាកណ្តាលថា ការកំណត់ប្រាក់ឈ្មួលអប្បបរមា ដល់កម្មករ អាចធ្វើទៅបាន អាស្រ័យមានការសិក្សាស្រាវជ្រាវ រកទិន្នន័យថ្នាក់ជាតិជាផ្លូវការជាមុនសិន។
លោករដ្ឋមន្ត្រីក្រសួងការងារ បានបញ្ជាក់ថា ការកំណត់ប្រាក់ឈ្មួល ត្រូវពិនិត្យមើលទៅលើស្ថានភាពសេដ្ឋកិច្ច និងសង្គមកិច្ច។ សេដ្ឋកិច្ច ដែលលោករដ្ឋមន្ត្រី ប្រាប់ថា គឺសំដៅដល់ផលិតភាព ការប្រកួតប្រជែងទីផ្សារ និងការទាក់ទាញវិនិយោគ។ ចំណែកខាងសង្គមកិច្ច រួមមាន ជីវភាពរបស់កម្មករ បញ្ហាអតិផរណា និងខ្សែបន្ទាត់នៃភាពក្រីក្រ របស់ពលរដ្ឋកម្ពុជា។
លោកអាត់ ធន់ ប្រធានសហភាពការងារកម្ពុជា និងជាប្រធានសហជីព ស៊ីខាវឌូ បានលើកឡើងថា រដ្ឋាភិបាល មិនព្រមសិក្សាស្រាវជ្រាវឲ្យបានច្បាស់លាស់នោះទេ ទោះបីជាពេលវេលានៃការចរចា នឹងឈានមកដល់ក្នុងពេលឆាប់ៗក៏ដោយ។ លោកអាត់ ធន់ ដែលបានចូលរួមនៅក្នុងសន្និសីទថ្នាក់ជាតិនោះដែរ ចង់ឲ្យគ្រប់ភាគីទាំងបី គឺរដ្ឋាភិបាល និយោជក និងសហជីព មានការស្រាវជ្រាវរួមគ្នាជាមុន មុនពេលបើកការពិភាក្សាត្រីភាគី។ យ៉ាងណាក៏ដោយ លោកអាត់ ធន់ បានបញ្ជាក់ថា ប្រសិនបើពុំមានលេខណាថ្មីនោះទេ ខាងសហជីពរបស់លោក នឹងប្រើចំនួនទឹកប្រាក់ ១៧៧ដុល្លារ ដូចកាលពីលើកមុន សម្រាប់ការចរចារនាពេលខាងមុខ។
ជាមួយគ្នានេះដែរ លោក អាត់ ធន់ បានលើកឡើងបន្ថែមថា ការចរចាត្រីភាគីដើម្បីតម្លើងប្រាក់ខែកម្មកររោងចក្រសម្រាប់ឆ្នាំ២០១៦ នឹងមិនមានកិច្ចសន្ទនាសង្គម និងតម្លាភាពនោះទេ។ មិនមានតម្លាភាពព្រោះថាគណៈកម្មការត្រីភាគី មានសមាសភាពភាគច្រើនដែលលម្អៀងទៅខាងនិយោជក។ ហើយមេដឹកនាំសហជីព ភាគច្រើន កំពុងតែរងគ្រោះដោយបណ្ដឹងតុលាការ គ្មានសិទ្ធិក្នុងការបញ្ចេញមតិដោយសេរីថែមទៀត។ ប៉ុន្តែក្រសួងការងារ អះអាងថា កិច្ចចរចាគ្រប់យ៉ាង នឹងធ្វើឡើងដោយតម្លាភាពបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ