កម្ពុជា-សេដ្ឋកិច្ច

World Bank៖ កម្ពុជាសម្រេចបានកំណើនសេដ្ឋកិច្ច ៧% នៅឆ្នាំ២០១៨ តែនឹងធ្លាក់ចុះបន្តិចវិញនៅឆ្នាំក្រោយ

ធនាគារពិភពលោក World Bank នៅថ្ងៃព្រហស្បតិ៍ ទី០៤តុលានេះ បានចេញផ្សាយរបាយការណ៍មួយ ស្តីពី កំណើនសេដ្ឋកិច្ចនៅអាស៊ីបូព៌ា និងប៉ាស៊ីហ្វិក ដែលក្នុងនោះក៏មានកម្ពុជាដែរ។ ធនាគារពិភពលោកបានវាយតម្លៃថា កម្ពុជាសម្រេចបានកំណើនសេដ្ឋកិច្ចប្រមាណជា ៧% នៅឆ្នាំ២០១៨។ តួលេខនេះ បានកើនឡើងបន្តិច បើធៀបនឹងឆ្នាំ២០១៧ ដែលមានត្រឹមតែ ៦.៩% ។ យ៉ាងណាក៏ដោយ អ្នកជំនាញបានព្រមានថា កំណើននេះនឹងធ្លាក់ចុះបន្តិចនៅឆ្នាំក្រោយ ប្រសិនបើសេដ្ឋកិច្ចកម្ពុជារងផលប៉ះពាល់ពីប្រព័ន្ធអនុគ្រោះពន្ធ និងសង្គ្រាមពាណិជ្ជកម្មរវាងចិននិងសហរដ្ឋអាមេរិក។

ចុះផ្សាយនៅថ្ងៃ៖ 04/10/2018 - 07:58

ដោយ៖ វ៉ា សំណព្វ

ផ្សាយពាណិជ្ជកម្ម

សេដ្ឋកិច្ចកម្ពុជា ត្រូវបានព្យាករណ៍ថា នឹងកើនត្រឹមកម្រិត ៧% ក្នុងឆ្នាំ២០១៨ ដែលតួលេខថ្មីនេះ បានកើនឡើង ០,១% បើធៀបនឹងការវាយតម្លៃពីមុនដែលមានត្រឹមតែ ៦.៩% ក្នុងឆ្នាំ២០១៧។ ការកើនឡើងនេះ គឺដោយឈរលើទស្សនៈសុទិដ្ឋិនិយមរបស់វិនិយោគិន និងការកើនឡើងនូវចំណាយរបស់រដ្ឋាភិបាលកម្ពុជា។ និន្នាការនេះ នឹងរួមចំណែកធ្វើឲ្យអត្រាភាពក្រីក្រនៅកម្ពុជាបន្តធ្លាក់ចុះថែមទៀត។ នេះបើតាមរបាយការណ៍របស់ធនាគារពិភពលោក World Bank ចេញផ្សាយនៅថ្ងៃទី០៤តុលា ស្តីពី កំណើនសេដ្ឋកិច្ចនៅអាស៊ីបូព៌ា និងប៉ាស៊ីហ្វិក។

របាយការណ៍ដដែលបង្ហាញទៀតថា សេដ្ឋកិច្ចប្រទេសកម្ពុជានៅតែបន្តលូតលាស់យ៉ាងស្វាហាប់ ដោយមានបរិស្ថានអំណោយផលទូទាំងសកលលោក ដែលបានជួយទ្រទ្រង់មួយផ្នែកធំ។ ក្នុងនោះ នៅអំឡុងកន្លះឆ្នាំដំបូងនៃឆ្នាំ២០១៨នេះ កំណើននៃការនាំចេញផលិតផលសម្លៀកបំពាក់ បន្តសម្រេចបានកំណើនខ្ពស់ជាលើកទី២ ក្នុងរយៈពេល២ឆ្នាំជាប់ៗគ្នា។ ក្នុងរយៈពេល៦ខែដំបូងក្នុងឆ្នាំ២០១៨នេះ កម្ពុជាបាននាំចេញផលិតផលសម្លៀកបំពាក់ ទំនិញសម្រាប់ការធ្វើដំណើរ និងផលិតផលស្បែកជើង កើនបាន ១៦.២% ដែលចំនួននេះកើនឡើងពីរដងក្នុងរយៈពេល២ឆ្នាំមកនេះ។ កំណើននេះក៏មិនអាចផាត់ចេញនូវការមកដល់នៃភ្ញៀវទេសចរបរទេស ដែលបានកើនឡើងដល់៣លាននាក់នៅ៦ខែឆ្នាំ២០១៨ ការវិនិយោគផ្ទាល់ពីបរទេស ១៤.៣% និងប្រាក់បញ្ញើរបស់ផ្នែកឯកជន ២២.៤% ។ ក្រៅពីនេះ លំហូរចូលនូវមូលធននៅតែបន្តកើនឡើង ស្របពេលលំហូរចូលនៃការវិនិយោគពីបរទេសដោយផ្ទាល់និងធំៗ បានបន្តធ្វើជាគ្រឹះដ៏រឹងមាំនៃ សកម្មភាពអភិវឌ្ឍន៍វិស័យសំណង់នៅកម្ពុជា។

ប៉ុន្តែយ៉ាងណាក៏ដោយ អ្នកជំនាញបានព្រមានថា កំណើននេះនឹងថយចុះបន្តិចនៅពីរឆ្នាំក្រោយ គឺពី ៧% នៅឆ្នាំ២០១៨ មកនៅត្រឹម ៦.៨% នៅឆ្នាំ២០១៩ និងឆ្នាំ២០២០ ប្រសិនបើសេដ្ឋកិច្ចកម្ពុជារងផលប៉ះពាល់ពីប្រព័ន្ធអនុគ្រោះពន្ធ ឬ EBA ពីសហភាពអឺរ៉ុប និងសហរដ្ឋអាមេរិក ក៏ដូចជាសង្គ្រាមពាណិជ្ជកម្មរវាងចិននិងសហរដ្ឋអាមេរិក។ អ្នកជំនាញក៏បានព្រមានដែរថា ការស្រុតចុះជាគំហុកណាមួយក្នុងសេដ្ឋកិច្ចនៃប្រទេសចិន នឹងធ្វើឲ្យធ្លាក់ទឹកចិត្តខ្លាំងក្នុងទស្សនវិស័យ ស្តីពី កំណើនសេដ្ឋកិច្ចរបស់កម្ពុជា។ អ្នកជំនាញបានណែនាំថា ដើម្បីរក្សាឲ្យបាននូវកំណើនសេដ្ឋកិច្ចលឿន និងបន្ថយការពឹងពាក់ខ្លាំងហួសហេតុទៅលើមូលធនមកពីក្រៅ កម្ពុជាចាំបាច់ត្រូវបង្កើនការសន្សំសំចៃ និងការវិនិយោគក្នុងស្រុក រាប់ទាំងតាមរយៈការធ្វើពិពិធកម្មផលិតផលហិរញ្ញវត្ថុ ការអភិវឌ្ឍទីផ្សារបំណុលក្នុងស្រុក និងការពង្រឹងការអនុវត្តគ្រប់គ្រងលើការវិនិយោគសាធារណៈថែមទៀត។

គួរជំរាបជូនថា សេដ្ឋកិច្ចរបស់កម្ពុជានៅឆ្នាំ២០១៨ ត្រូវបានស្ថាប័នរូបិយវត្ថុអន្តរជាតិ (IMF) ព្យាករណ៍ដែរថា នឹងរក្សាបានកំណើនក្នុងរង្វង់ ៧.២% និងធ្លាក់ចុះបន្តិចមកនៅត្រឹម ៧% នៅឆ្នាំ២០១៩៕