ប្រាក់បំណុលកម្ពុជាចំពោះរុស្ស៊ីអាចមានភាពវិជ្ជមានក្រោយដំណើរទស្សនកិច្ចរបស់នាយករដ្ឋមន្ត្រីរុស្ស៊ី
ភាគីកម្ពុជាបានបញ្ជាក់ថា រុស្ស៊ីបានឯកភាពថានឹងបន្តពិភាក្សាបញ្ហាបំណុលដែលកម្ពុជានៅជំពាក់សេសសល់ ៣០ភាគរយ ក្នុងរង្វង់ទឹកប្រាក់១៥០០លានដុល្លារ ជាបន្តទៀត។ ហើយភាគីកម្ពុជា រំពឹងពីភាពវិជ្ជមាននៃការដោះស្រាយបញ្ហាបំណុលនេះ បន្ទាប់ពីដំណើរទស្សនកិច្ចរយៈពេល៣ថ្ងៃ របស់នាយករដ្ឋមន្ត្រីរុស្ស៊ី លោកឌីមីទ្រី មេដវេដេវ (Dmitry Medvedev) នៅកម្ពុជា។ ក្រោយពីបានជួបលោកនាយករដ្ឋមន្ត្រីហ៊ុន សែន និងធ្វើជាសាក្សីក្នុងការចុះអនុស្សរណៈ និងកិច្ចព្រមព្រៀង ចំនួន១០ រវាងកម្ពុជា-រុស្ស៊ី លោកឌីមីទ្រី មេដវេដេវ បានបញ្ចប់ទស្សនកិច្ចជាផ្លូវការហើយនៅកម្ពុជានាថ្ងៃទី២៤ វិច្ឆិកានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្នុងជំនួបរវាងលោកនាយករដ្ឋមន្ត្រីហ៊ុន សែន និងសមភាគី លោកនាយករដ្ឋមន្ត្រីរុស្ស៊ី ឌីមីទ្រី មេដវេដេវ នាវិមានសន្តិភាពក្រុងភ្នំពេញ នៅព្រឹកថ្ងៃទី២៤ វិច្ឆិកា អ្នកនាំពាក្យកិច្ចប្រជុំ លោក អ៊ាង សុផល្លែត បានឲ្យដឹងថាប្រមុខរដ្ឋាភិបាលកម្ពុជា បានលើកយកបញ្ហាប្រាក់បំណុលសេសសល់ដែលកម្ពុជា បានជំពាក់រុស្ស៊ី តាំងពីអំឡុងទស្សវត្សទី៨០ មកពិភាក្សាដែរ។ ហើយភាគីទាំងពីរ បានឯកភាពគ្នា បន្តពិភាក្សាថា តើត្រូវធ្វើយ៉ាងណាដើម្បីអាចទទួលយកបានទាំងសងខាង។ តែតាមលោកអ៊ាង សុផល្លែត ការពិភាក្សាពីបញ្ហាបំណុលមានផលវិជ្ជមានច្រើន។
គួររម្លឹកជូនថា កាលពីឆ្នាំ២០០៨ ប្រធានគណៈកម្មការហិរញ្ញវត្ថុរបស់រដ្ឋសភាកម្ពុជា បានប្រកាសថា រដ្ឋាភិបាលរុស្ស៊ី បានយល់ព្រមលុបបំណុលរបស់ខ្លួន៧០ភាគរយ ដែលកម្ពុជា បានជំពាក់កាលពីទស្សវត្សន៍ទី៨០ ក្នុងបំណុលសរុប១៥០០លានដុល្លារ។ ហើយមកដល់ពេលនេះ កម្ពុជានៅជាប់បំណុលរុស្ស៊ីចំនួន៣០ភាគរយទៀត។
ក្រៅពីពិភាក្សាពីបញ្ហាបំណុល អ្នកនាំពាក្យកិច្ចប្រជុំ បានឲ្យដឹងបន្តថា លោកនាយករដ្ឋមន្ត្រីហ៊ុន សែន បានស្នើសុំសមភាគីរុស្ស៊ី ឲ្យពង្រីកទំហំពាណិជ្ជកម្ម និងចង់ឲ្យរុស្ស៊ី ជួយនាំយកអង្ករពីកម្ពុជា។ កម្ពុជាក៏ចង់ឲ្យរុស្ស៊ីជំរុញវិនិយោគិន ឲ្យមកវិនិយោគនៅកម្ពុជាកាន់តែច្រើន។ និងជាពិសេស លោកនាយករដ្ឋមន្ត្រីហ៊ុន សែន បានស្នើសុំឲ្យមានការវិនិយោគឲ្យបានស៊ីជម្រៅបន្ថែម លើវិស័យទេសចរណ៍ ដោយបង្កើតជើងហោះហើរត្រង់ពីកម្ពុជា ទៅរុស្ស៊ី និងពីរុស្ស៊ី មកកម្ពុជា។ ក្នុងនោះប្រមុខរដ្ឋាភិបាលកម្ពុជា នៅតែបន្តទទូចឲ្យរុស្ស៊ី ផ្តល់អាហារូបករណ៍ដល់សិស្ស និស្សិតកម្ពុជាបន្តទៀត។
ចំពោះសំណើទាំងនេះ ត្រូវបានលោកឌីមីទ្រី មេដវេដេវ ទទួលយកហើយលោកសន្យាបន្តលើកស្ទួយគ្រប់វិស័យឧស្សាហកម្ម កសិកម្ម ការវិនិយោគ និងការអប់រំ ដល់ភាគីកម្ពុជា ជាបន្តទៀត ក្នុងគោលដៅពង្រឹងចំណងទំនាក់ទំនងនៃប្រទេសទាំងពីរ។
លើសពីជំនួបនេះ ប្រមុខដឹកនាំនៃប្រទេសសម្ព័ន្ធមិត្តទាំងពីរ ក៏បានធ្វើជាសាក្សីនៃការចុះហត្ថលេខារវាងរដ្ឋមន្ត្រីកម្ពុជា និងរុស្ស៊ីទៅលើអនុស្សារៈ និងឯកសារកិច្ចព្រមព្រៀងចំនួន១០ ផងដែរ។ អនុស្សារៈនិងកិច្ចព្រមព្រៀងទាំង១០ ដែលរួមមាន ការផ្លាស់ប្តូរព័ត៌មានសម្អាតប្រាក់ និងហិរញ្ញប្បទានភេវកម្ម រវាងអង្គភាពស៊ើបការណ៍ហិរញ្ញវត្ថុកម្ពុជា-រុស្ស៊ី។ កិច្ចសហប្រតិបត្តិការ ផ្នែកទីភា្នក់ងារសារព័ត៌មាន សុខាភិបាល វប្បធម៌ ពាណិជ្ជកម្ម ការវិនិយោគទុនអភិវឌ្ឍន៍ កិច្ចសហប្រត្តិបត្តិការក្នុងការប្រើប្រាស់ថាមពលបរមាណូ និងកិច្ចសហការរវាង គណបក្សប្រជាជនកម្ពុជានិងគណបក្សរួបរួមរុស្ស៊ី ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ