លោកបារ៉ាក់ អូបាម៉ាស្នើផែនការបំពាក់កាមេរ៉ាដល់ភ្នាក់ងារនគរបាលអាមេរិក
មួយសប្តាហ៍ក្រោយពីបាតុកម្មដែលបានអង្រួនក្រុងហ្វឺហ្គូសុន (Ferguson) សារជាថ្មីដោយសារតែក្រុមប្រឹក្សាតុលការលើកលែងការចោទប្រកាន់លើភ្នាក់ងារនគរបាល Darren Wilson ដែលបានបាញ់សំលាប់យុវជនស្បែកខ្មៅ Michael Brown លោកប្រធានាធិបតី បារ៉ាក់ អូបាម៉ា បានស្នើរៀបចំផែនការបំពាក់ដល់ភ្នាក់ងារនគរបាលអាមេរិច នូវកាមេរ៉ាជាប់នៅនឹងខ្លួនដើម្បីបង្កើនទំនុកចិត្តពីសហគមន៍ស្បែកពណ៌នានា លើភ្នាក់ងារនគរបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ចាប់តាំងពីការស្លាប់របស់យុវជនស្បែកខ្មៅ Michael Brown ក្រុងហ្វឺហ្គូសុន នៃរដ្ឋមីសូរី (Missouri) ស្ថិតក្នុងស្ថានភាពដ៏ចម្រូងចម្រាស់ជុំវិញបញ្ហាការរើសអើងចំពោះប្រជាជនអាមេរិកស្បែកខ្មៅ ពិសេសពីសំណាក់នគរបាលមូលដ្ឋានដែលភាគច្រើនជាពួកស្បែកស។
ទន្ទឹមនឹងនោះ មានសំឡេងជាច្រើនបានក្រោកឈរឡើងដើម្បីទាមទារឲ្យភ្នាក់ងារនគរបាលទូទាំងប្រទេសបំពាក់ដោយកាមេរ៉ាតូចៗដែលគេអាចពាក់នៅនឹងកអាវ ឬនៅនឹងឯកសណ្ឋាន ឬក៏នៅលើវ៉ែនតា។ ញត្តិដែលគាំទ្រគំនិតនេះត្រូវបានបិតផ្សាយលើគេហទំព័ររបស់សេតវិមាន ហើយ រហូតមកដល់ពេលថ្មីៗនេះញត្តិនេះប្រមូលបានដល់ទៅជាងមួយសែនប្រាំម៉ឺនហត្ថលេខាគាំទ្រ។
ក្នុងកិច្ចប្រជុំកាលពីថ្ងៃច័ន្ទជាមួយនឹងតំណាងសង្គមស៊ីវិល និងកងកំលាំងនគរបាល លោកប្រធានាធិបតី បានស្នើនូវផែនការវិនិយោគដល់ទៅ២៦៣លានដុល្លារអាមេរិកសម្រាប់រយៈពេលបីឆ្នាំដើម្បីផ្គត់ផ្គង់ សម្ភារៈនិងការបណ្តុះបណ្តាលកងកំលាំងរក្សាសណ្តាប់ធ្នាប់។ ក្នុងនោះទឹកប្រាក់ ប្រមាណជាជាង ៧៥ លានដុល្លារនឹងប្រើជាហិរញ្ញប្បទានរួមជាមួយនឹងហិរញ្ញប្បទានរបស់អជ្ញាធរមូលដ្ឋាន សម្រាប់ការបំពាក់នូវកាមេរ៉ាចំនួន ៥ម៉ឺនដល់កងកំលាំងនគរបាល។ លោកក៏បានសុំឲ្យសភាគាំទ្រលោកដើម្បីធានាថា កងកំលាំងរក្សាសណ្តាប់ធ្នាប់មានធនធានចាំបាច់គ្រប់គ្រាន់សំរាប់ផ្គត់ផ្គង់ការបណ្តុះបណ្តាលនិងប្រដាប់ ដោយបច្ចេកវិទ្យាចាំបាច់ដើម្បីកែលំអទំនុកចិត្តរវាងសហគមន៍នានា ជាមួយនឹងនគរបាល។
គួរធ្វើកំណត់សំគាល់ផងដែរថា ការបំពាក់កាមេរ៉ាឲ្យភ្នាក់ងារនគរបាលនេះ មិនមែនជារឿងថ្មីទេព្រោះក្នុងក្រុងមួយចំនួនរបស់សហរដ្ឋអាមេរិក ដូចជា ក្រុង Laurel នៃរដ្ឋ Maryland ខាងកើតក៏នគរបាលមានប្រើនូវឧបករណ៍នេះផងដែរ។ ចំណែកឯនៅ ញ៉ូវយ៉ក និងវ៉ាស៊ីនតោនវិញការប្រើកាមេរ៉ានេះកំពុងឋិតក្នុងការសាកល្បងនៅឡើយ។
ក្នុងប្រធានបទទាក់ទងនឹងការរើសអើងដដែលនេះ កាលពីល្ងាចថ្ងៃច័ន្ទលោករដ្ឋមន្ត្រីយុត្តិធម៌ Eric Holder ពីទីក្រុងអាត្លង់តា (Atlanta) នៃរដ្ឋចចារ (Georgia) ក៏បានប្រកាសថា លោកនឹងបង្ហាញនូវ គោលការណ៍ណែនាំថ្មីទាក់ទងនឹងអាកប្បកិរិយារើសអើងពូជសាសន៍ ដែលប្រពឹត្តដោយកងកម្លាំងសណ្តាប់ធ្នាប់របស់រដ្ឋសហព័ន្ធ។ ជាគោលការណ៍ណែនាំដ៏តឹងរ៉ឹង ដែលមានគោលដៅលុបបំបាត់ ការរើសអើងពូជសាសន៍នេះ ឲ្យអស់តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ