កាណាដាប្រកាសផ្តល់ថវិការចាក់ថ្នាំវ៉ាក់សំាងដល់កុមារចំនួន ៣០០លាននាក់
លោកនាយករដ្ឋមន្រ្តីកាណាដា ស្តេហ្វិន ហាផើ (Stephen Harper) បានប្រកាសជាផ្លូវការថា រដ្ឋាភិបាលរបស់លោកនឹងផ្តល់ថវិការចំនួន ៥០០ លានដុល្លារកាណាដាដើម្បីឧបត្ថម្ភយុទ្ធនាការចាក់ថ្នាំវ៉ាក់សំាងដល់កុមារនៅជុំវិញពិភពលោក។ សេចក្តីប្រកាសនេះជាការឆ្លើយតបទៅនឹងការអំពាវនាវរបស់ក្រុមហ៊ុនអាលីយ៉ង់ហ្គាវី (Alliance Gavi) ដែលត្រូវការថវិការក្នុងយុទ្ធនាការចាក់ថ្នាំវ៉ាក់សំាងដល់កុមារចំនួន ៣០០ លាននាក់នៅតាមបណ្តាប្រទេសក្រីក្រ ចាប់ពីឆ្នាំ ២០១៦ ដល់ឆ្នាំ ២០២០។
ចុះផ្សាយនៅថ្ងៃ៖
ស្តាប់ - ០២:០៦
ពីរដ្ឋធានីដាកា (Dakar) ប្រទេសសេណេហ្គាល់ លោកនាយករដ្ឋមន្ត្រីកាណាដា ស្តេហ្វិន ហាផើ (Stephen Harper) បានប្រកាសដំណឹងនេះកាលពីថ្ងៃសុក្រម្សិលមិញ កំឡុងពេលចុះទៅទស្សនកិច្ចមណ្ឌលសុខភាព Philippe Maguilen Senghor ជាមួយលោកនាយករដ្ឋមន្រ្តីសេណេហ្គាល់ ម៉ូហាមេដ ឌីយូន (Mohammed Dionne)។ វត្តមានរបស់លោក Harper នៅប្រទេសអាហ្វ្រិកមួយនេះ គឺដើម្បីចូលរួមកិច្ចប្រជុំកំពូលលើកពី ១៥ នៃអង្គការអន្តរជាតិនៃក្រុមប្រទេសនិយាយភាសាបារាំង (Organisation internationale de la Francophonie) ដែលចាប់ផ្តើមនៅថ្ងៃនេះរហូតដល់ថ្ងៃស្អែក។
បើតាមសេចក្តីប្រកាសព័ត៌មានរបស់ខុទ្ទកាល័យនាយករដ្ឋមន្រ្តីកាណាដាបានបញ្ជាក់អោយដឹងថា ថវិការចំនួន ៥០០ លានដុល្លារកាណាដានឹងយកទៅឧបត្ថម្ភកម្មវិធីចាក់ថ្នាំវ៉ាក់សំាងដល់ទារក និងកុមារចំនួនប្រមាណ ៣០០ លាននាក់ នៅតាមបណ្តាប្រទេសក្រីក្រចំនួន ៧៣ នៅលើពិភពលោក។ គេរំពឹងទុកថា យុទ្ធនាការចាក់ថ្នាំវ៉ាក់សំាងបង្ការជំងឺផ្សេងៗនេះអាចជួយសង្គ្រោះអាយុជីវិតទារកប្រមាណពី ៥ ទៅ ៦ លាននាក់។ កម្មវិធីចាក់ថ្នាំបង្ការនេះនឹងធ្វើឡើង ចន្លោះពីឆ្នាំ ២០១៦ ដល់ឆ្នាំ ២០២០ តាមរយៈក្រុមហ៊ុនរដ្ឋ-ឯកជនមួយឈ្មោះ អាលីយ៉ង់ហ្គាវី (Alliance Gavi) ដែលមានជំនាញផែ្នកសុខភាព និងជាដៃគូរបស់បណ្តាអង្គការសំខាន់ដូចជា អង្គការសុខភាពពិភពលោក អង្គការយូនីសែហ្វ ធនាគារពិភពលោក និងស្ថាប័នធំៗមួយចំនួនទៀត។
សូមបញ្ជាក់ផងដែរថា ចាប់តាំងពីឆ្នាំ ២០០០ មកម៉្លេះ យុទ្ធនាការរបស់អាលីយ៉ង់ហ្គាវី (Alliance Gavi) បានផ្តល់ថ្នាំវ៉ាក់សំាងដោយឥតគិតថ្លៃដល់កុមារចំនួន ៤៤០ លាននាក់នៅជុំវិញពិភពលោក។ ក្នុងនោះ យើងឃើញមានទារកក្នុងផ្ទៃប្រមាណ ៦លាននាក់បានរួចផុតពីការស្លាប់បាត់អាយុជីវិត។
ការប្រកាសសន្យាផ្តល់ជំនួយនេះបង្ហាញពីឆន្ទៈរបស់លោកនាយករដ្ឋមន្រ្តីស្តេហ្វិន ហាផើ (Stephen Harper) ក្នុងការគាំទ្រសុខភាពមាតា ទារក និងកុមារនៅតាមបណ្តាប្រទេសកំពុងអភិវឌ្ឈន៍ដែលអាចងាយរងគ្រោះស្លាប់បាត់បង់អាយុជីវិតដោយសារប្រភេទជំងឺណាមួយ ដែលគេគិតថាអាចចៀសវាងបាន។
កាលពីខែឧសភាកន្លងទៅនេះ លោកនាយករដ្ឋមន្ត្រីកាណាដាបានរៀបចំកិច្ចប្រជុំកំពូលពិភពលោកនៅទីក្រុងតូរុនតូ ដើម្បីទាក់ទាញចំណាប់អារម្មណ៍ប្រទេសដៃគូនានា អោយផ្តោតលើសុខភាពមាតា ព្រមទាំងសុភាពទារក និងកុមារ។ លោក Harper ស្នើអោយបណ្តាប្រទេសអភិវឌ្ឈន៍ផ្តោតលើបញ្ហានេះ ក្រោយឆ្នាំ ២០១៥ ដែលជាកាលកំណត់នៃការសំរេចគោលដៅអភិវឌ្ឈន៍សហសវត្សរបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ