សំណុំរឿង ០០៣ មានពន្លឺពេលសាលាក្តីខ្មែរក្រហមអស់ថវិកា
សាលាក្តីខ្មែរក្រហមបានប្រកាសតែងតាំងមេធាវីខ្មែរម្នាក់ និងបរទេសម្នាក់នៅចុងសប្តាហ៍នេះដើម្បីធ្វើជាតំណាងជនសង្ស័យមួយរូបក្នុងសំណុំរឿង ០០៣ ដែលកំពុងស្ថិតក្នុងភាពចម្រូងចម្រាស។ មេធាវីទាំងពីររូបនោះគឺ លោក អាង ឧត្តម និងលោក ម៉ៃឃើល កាណាវ៉ាស (Michael G.Karnavas) ដែលជាមេធាវីការពារក្តីឲ្យលោក អៀង សារី។ ការបង្ហាញពីដំណើរវិវឌ្ឍន៍ទៅមុខនៃសំណុំរឿង ០០៣ បានកើតឡើងខណៈដែលសាលាក្តីខ្មែរក្រហមកំពុងជួបប្រទះវិបត្តិថវិកាយ៉ាងខ្លាំង។ ម្យ៉ាងទៀត បើទោះបីជាមានការតែងតាំងមេធាវីក៏ដោយ ក៏ជនសង្ស័យក្នុងសំណុំរឿង ០០៣ មិនទាន់ត្រូវបានគេបញ្ចេញឈ្មោះនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
លោកមេធាវី អាង ឧត្តម និងលោក Michael G.Karnavas ដែលសព្វថ្ងៃកំពុងការពារក្តីឲ្យលោក អៀង សារី ត្រូវបានសាលាក្តីខ្មែរក្រហមតែងតាំងឲ្យធ្វើជាតំណាងជនសង្ស័យមួយរូបក្នុងសំណុំរឿង ០០៣ ដែលសហព្រះរាជអាជ្ញាអន្តរជាតិដាក់ជូនការិយាល័យសហចៅក្រមស៊ើបអង្កេត កាលពីថ្ងៃទី២០ ខែវិច្ឆិកា ឆ្នាំ២០០៨ កន្លងទៅ។ នេះបើយោងតាមសេចក្តីប្រកាសព័ត៌មានរបស់សាលាក្តីខ្មែរក្រហមកាលពីល្ងាចថ្ងៃសុក្រម្សិលមិញ។
ប៉ុន្តែ បើទោះបីជាមានការតែងតាំងមេធាវីតំណាងជនសង្ស័យក្នុងសំណុំរឿង ០០៣ ក៏ដោយ ក៏អត្តសញ្ញាណរបស់ជនសង្ស័យនៅតែត្រូវគេរក្សាទុកជារឿងសម្ងាត់ដដែល។ លោកនេត្រ ភក្ត្រា អ្នកនាំពាក្យសាលាក្តីខ្មែរក្រហមបានប្រាប់វិទ្យុបារាំងអន្តរជាតិនៅថ្ងៃនេះថា ដោយសារតែសហចៅក្រមស៊ើបអង្កេតកំពុងធ្វើការ ដូច្នេះ អត្តសញ្ញាណជនសង្ស័យមិនអាចបង្ហាញជាសាធារណៈបានទេ។ ទោះជាយ៉ាងណា យោងតាមឯកសារដែលលេចធ្លាយចេញពីសាលាក្តីខ្មែរក្រហម ហើយដែលបណ្តាញផ្សាយព័ត៌មានមួយចំនួនបានផ្សព្វផ្សាយទៅហើយនោះគឺ ជនសង្ស័យក្នុងសំណុំរឿង ០០៣ និង ០០៤ មាន៥នាក់ក្នុងនោះ មានពីរនាក់ពាក់ពន្ធ័សំណុំរឿង ០០៣ គឺលោក ស៊ូ មេធ និងលោក មាស មុត។
ការប្រកាសតែងតាំងសហមេធាវីតំណាងជនសង្ស័យសំណុំរឿង ០០៣ នៅពេលនេះបានធ្វើឡើងខណៈដែលតុលាការកាត់ទោសអតីតមេដឹកនាំខ្មែរក្រហមកំពុងជួបប្រទះនឹងវិបត្តិថវិកាយ៉ាងខ្លាំង។ សាលាក្តីនេះនឹងអស់ថវិកាសម្រាប់បើកឲ្យបុគ្គលិកទាំងខ្មែរ និងបរទេសចាប់ពីដើមឆ្នាំ ២០១៣ នេះតទៅហើយ ហើយក៏នៅមិនទាន់មានការសន្យាពីម្ចាស់ជំនួយនៅឡើយដែរ។ ដូច្នេះ ការបង្ហាញពីដំណើរវិវឌ្ឍន៍ទៅមុខរបស់សំណុំរឿង ០០៣ ត្រូវបានអ្នកខ្លះខ្លះចាត់ទុកថា វាគ្រាន់តែជាការទាក់ទាញចំណាប់អារម្មណ៍របស់ប្រទេសម្ចាស់ជំនួយតែប៉ុណ្ណោះ។ ប៉ុន្តែ លោក នេត្រ ភក្ត្រា បានបដិសេធថា រឿងនេះមិនជាប់ពាក់ពន្ធ័គ្នាទេ។ លោកពន្យល់ថា ការតែងតាំងមេធាវីជូនជនសង្ស័យគឺជាកាតព្វកិច្ចផ្លូវច្បាប់របស់អង្គភាពគាំពារការការពារក្តីតែប៉ុណ្ណោះ។
សំណុំរឿង ០០៣ និង ០០៤ គឺជាបញ្ហាចម្រូងចម្រាសយ៉ាងខ្លាំងសម្រាប់សាលាក្តីខ្មែរក្រហម។ រដ្ឋាភិបាលកម្ពុជាដែលជាភាគីមួយក្នុងការបង្កើតសាលាក្តីនេះបានប្រកាន់ជំហរបញ្ចប់ដំណើរការសាលាក្តីនេះត្រឹមសំណុំរឿង ០០២ ក្រោមហេតុផលដើម្បីរក្សាស្ថេរភាពនិងនយោបាយផ្សះផ្សារជាតិនៅក្នុងប្រទេស ប៉ុន្តែ ភាគីអន្តរជាតិចង់បន្តទៅសំណុំរឿងថ្មីទាំងពីរបន្ថែមទៀត។ ការមិនចុះសម្រុងគ្នាអំពីបញ្ហានេះបានធ្វើឲ្យសហចៅក្រមស៊ើបអង្កេតអន្តរជាតិ ២នាក់បានលាលែងពីមុខតំណែង។ យ៉ាងណាក៏ដោយ សហចៅក្រមស៊ើបអង្កេតថ្មីជនជាតិអាមេរិកាំងដែលទើបចូលកាន់តំណែងកំពុងបន្តនីតិវិធីសំណុំរឿង០០៣ និង ០០៤ ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ