អៀង សារីនៅមានសម្បទាគ្រប់គ្រាន់អាចចូលរួមសវនាការបាន
ចៅក្រមសាលាដំបូងនៃតុលាការខ្មែរក្រហមបានចេញសេចក្តីសម្រេចលើសម្បទាជនជាប់ចោទ អៀងសារី នៅថ្ងៃចន្ទទី២៦វិច្ឆិកានេះ ដោយអះអាងថា លោកអៀង សារីអាចនៅមានសមត្ថភាពចូលរួមសវនាការបាន។ ការសម្រេចអំពីសម្បទារបស់អៀង សារីធ្វើឡើងបន្ទាប់ពីជនជាប់ចោទរូបនេះបានប្រើសិទ្ធិលះបង់ការចូលរួមក្នុងសវនាការដោយសំអាងលើជំងឺរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៥៩
ចាប់តាំងពីថ្ងៃទី៧ខែកញ្ញាមក ជនជាប់ចោទអៀង សារីបានលះបង់សិទ្ធិចូលរួមក្នុងសវនាការ ដោយសំអាងថាខ្លួនមានជំងឺធ្ងន់ធ្ងរមិនអាចចូលរួមសវនាការបាន។ ជនជាប់ចោទអៀង សារីបានស្នើអោយសាលាដំបូងដំណើរការជាមួយសាក្សីណា ដែលមិនមានពាក់ព័ន្ធនឹងរូបលោក។
ដោយផ្អែកលើមូលហេតុសម្បទានេះហើយ សាលាដំបូងនៃតុលាការខ្មែរក្រហមបានសម្រេចបើកនីតិវិធីពិនិត្យកាយសម្បទារបស់អៀង សារី។
ក្រោយពីបានពិនិត្យលើរបាយការណ៍អ្នកជំនាញរួចហើយ ចៅក្រមសាលាដំបូងបានសម្រេចថា ជនជាប់ចោទអៀង សារីអាចមានសម្បទាចូលរួមក្នុងសវនាការបន្តទៀត។ សេចក្តីសម្រេចនេះត្រូវបានចេញផ្សាយនៅថ្ងៃនេះដោយសាលាដំបូងនៃតុលាការខ្មែរក្រហម។
ទោះយ៉ាងណាក៏ដោយ ចៅក្រមសាលាដំបូងបានអនុញ្ញាតអោយជនជាប់ចោទអៀង សារីប្រើសិទ្ធិក្នុងការចូលរួមដោយផ្ទាល់ក្នុងសវនាការ ឬដោយប្រយោលពីបន្ទប់ខាងក្រោមសវនាការដូចលើកមុនៗដែរ។
ក្នុងចំណោមជនជាប់ចោទទាំង៤នាក់ដែលជាអតីតមេដឹកនាំកំពូលនៃ របបកម្ពុជាប្រជាធិបតេយ្យ ដែលរូមមានលោកនួន ជា លោកខៀវ សំផន លោកអៀង សារី និងលោកស្រីអៀង ធីរិទ្ធ ជនជាប់ចោទ២នាក់ប្តីប្រពន្ធចុងក្រោយនេះមានសុខភាពទន់ខ្សោយជាងគេ។ លោកស្រីអៀង ធីរិទ្ធ ចុងក្រោយនេះ ត្រូវបានអនុញ្ញាតអោយចាកចេញពីមន្ទីរឃុំឃាំងហើយដោយសារតែចៅក្រមរកឃើញថា លោកស្រីពិតជាមិនមានសម្បទាគ្រប់គ្រាន់ដើម្បីចូលរួមក្នុងសវនាការ។
ប៉ុន្តែ ទោះយ៉ាងណាក៏ដោយ ការដោះលែងលោកស្រីអៀង ធីរិទ្ធ វាគឺជាការដោះលែងដែលមានលក្ខខណ្ឌដូចជា លោកស្រីធីរិទ្ធត្រូវប្រាប់ពីអាសយដ្ឋានពិតប្រាកដ ត្រូវដកហូតលិខិតឆ្លងដែន ត្រូវឆ្លើយតបរាល់ការកោះហៅរបស់តុលាការ និងមិនត្រូវជ្រៀតជ្រែកចូលក្នុងដំណើរការសវនាការ ដូចជាការទាក់ទងជាមួយជនជាប់ចោទផ្សេងទៀត លើកលែងតែលោកអៀង សារីដែលជាស្វាមីរបស់លោកស្រី។
គួររម្លឹកថា រហូតដល់ពេលនេះ សវនាការសំណុំរឿង០០២បានដំណើរការបាន១៣៣ថ្ងៃហើយ ជាមួយនឹងការធ្វើសក្ខីកម្មពីអ្នកជំនាញ និងសាក្សីជាង៣០រូប។ តាមការគ្រោងទុក សវនាការថ្មីនឹងចាប់ផ្តើមនៅថ្ងៃទី៤ធ្នូខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ