ចិនបិទទ្វាររោងចក្រផ្គត់ផ្គង់សាច់ហួសកំណត់ទៅឱ្យអាហារដ្ឋានល្បីៗ
រឿងអាស្រូវសុវត្ថិភាពចំណីអាហារបានផ្ទុះឡើង ក្នុងប្រទេសចិន មួយករណីទៀតហើយ នៅចុងសប្តាហ៍នេះ ប៉ះចំលើបណ្តាញអាហារដ្ឋានល្បីៗរបស់ក្រុមហ៊ុនអាមេរិក ដូចជា McDonald's, Pizza Hut និងKFC ។ អាជ្ញាធរក្រុងសៀងហៃបានសម្រេចបិទរោងចក្រមួយដែលជាអ្នកផ្គត់ផ្គង់សាច់ដល់អាហារដ្ឋានទាំងអស់នោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
បើតាមទូរទស្សន៍សៀងហៃ បុគ្គលិករោងចក្រ OSI របស់ចិន បានយកសាច់ស្អុយហួសកាលកំណត់បរិភោគ ទៅជាលាយជាមួយសាច់ស្រស់ បំភ័ន្តភ្នែកក្រុមអ្នកត្រួតពិនិត្យ យកទៅលក់ឱ្យបណ្តាញអាហារដ្ឋានរបស់អាមេរិក McDonald's។ បណ្តាញអាហារដ្ឋានអាមេរិកផ្សេងទៀត មានជាអាទិ៍ Burger King, Papa John's Pizza, Starbucks Coffee et Subway ក៏ជាអតិថិជនទិញសាច់ពីរោងចក្រOSI នេះដែរ។ នេះបើតាមសារព័ត៌មាន Shanghaï Daily ចេញផ្សាយថ្ងៃទី ២១កក្កដា។
ភ្លាមមួយរំពេញភ្នាក់ងារសុវត្ថិភាពចំណីអាហារបានចេញដីកាបិទទ្វាររោងចក្រសាច់នោះ និងបានរិបអូសយកផលិតផលសាច់ហួសកាលកំណត់ទាំងអស់ ព្រមទាំងព្រមានដាក់ទោសធ្ងន់ធ្ងរដល់រោងចក្រផ្សេងៗទៀត ប្រសិនបើហានល្មើសច្បាប់សុវត្ថិភាពចំណីអាហារ នៅពេលខាងមុខ។
ចំណែកខាងក្រុមហ៊ុនអាហារដ្ឋាន McDonald's KFC Pizza Hut បានចេញសេចក្តីថ្លែងការណ៍ភ្លាមឈប់ទទួលទិញសាច់ និងចាក់ចោលសាច់រាប់ពាន់កេះ មានស្តុកក្នុងហាង មានជាអាទិ៍សាច់គោ សាច់ជ្រូក និងមាន់។
បញ្ហាសុវត្ថិភាពចំណីអាហារនៅក្នុងប្រទេសចិន បានផ្ទុះឡើងជាញឹកញាប់ ព្រោះតែភាពធូររលុងនៃច្បាប់ និងដោយហេតុតែក្រុមហ៊ុនអ្នកផលិតមានល្បិចបង្វែងដានខ្ពស់។ រឿងអាស្រូវ ដ៏ធ្ងន់ធ្ងរខ្លាំងជាងគេបានផ្ទុះឡើងនៅឆ្នាំ២០០៨ ដែលកាលណោះក្រុមហ៊ុនផលិតទឹកដោះគោក្មេង បានប្រើសារធាតុគីមីពុល មេឡាមីនដាក់ក្នុងម្សៅទឹកដោះគោ សម្លាប់ទារកអស់យ៉ាងងហោច៦នាក់ និងជាងបីសែននាក់ឈឺ។
កាលពីដើមឆ្នាំក្រុមហ៊ុនចែកចាយអាមេរិក បានប្រកាសពង្រឹកអធិការកិច្ចលើកក្រុមហ៊ុនផ្គត់ផ្គង់មកពីចិនទាំងអស់ បន្ទាប់ពីបានរកឃើញមានការបន្លំលក់សាច់កញ្ជ្រោងថាជាសាច់លា។ បណ្តាញអាហារ KFC ធ្លាប់បានរងគ្រោះម្តងកាលពីឆ្នាំ២០១២ ដោយមានអត្រាជាតិអង់ទីប៊ីយូទិក ច្រើនលើសលុបក្នុងសាច់មាន់។
កាលពីឆ្នាំមុន ក្នុងរយៈពេលតែបីខែ អាជ្ញាធរចិនបានចាប់ខ្លួនមនុស្សរាប់រយនាក់ ប្រព្រឹត្តបទល្មើសព្រហ្មទណ្ឌពាក់ព័ន្ធនឹងសុវត្ថិភាពចំណីអាហារ ដូចជាលក់សាច់កណ្តុរ ឬកញ្ជ្រោងថាជាសាច់គោឬសាច់ជៀម។ នេះបើប្រភពប៉ូលិសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ