សង្គមស៊ីវិលមួយក្រុមការពារលោក«Alex»ថាជាវីរជនបរិស្ថាន
«Alex មិនត្រឹមតែជាវីរជនបរិស្ថាន សម្រាប់កម្ពុជាប៉ុណ្ណោះទេ ប៉ុន្តែជាវីរជនបរិស្ថានសម្រាប់ពិភពលោកទាំងមូល»។ នេះគឺជាការលើកឡើង របស់លោកកែម ឡី ស្ថាបនិកនៃបណ្តាញសង្គមខ្មែរដើម្បីខ្មែរ នៅក្នុងសន្និសីទកាសែតមួយស្តីពី ក្រសួងមហាផ្ទៃបដិសេធមិនផ្តល់ទិដ្ឋាការឲ្យលោកAlex សកម្មជនការពារព្រៃឈើតំបន់អារ៉ែង។ ជាសន្និសីទកាសែត ដែលត្រូវបានធ្វើឡើងនៅព្រឹកថ្ងៃទី ១៨កុម្ភៈនេះ នៅឯស្នាក់ការមជ្ឈមណ្ឌលអប់រំច្បាប់សម្រាប់សហគមន៍។
ចុះផ្សាយនៅថ្ងៃ៖
ស្តាប់ - ០២:១៣
ដូចការគ្រោងទុក នៅព្រឹកថ្ងៃពុធនេះ បណ្តាញព្រះសង្ឃឯករាជ្យដើម្បីយុត្តិធម៌សង្គម រួមគ្នាជាមួយបណ្ដាញយុវជនចំនួន៣ ផ្សេងទៀត បានរៀបចំសន្និសីទកាសែតនិយាយពីការមិនផ្តល់ទិដ្ឋាការឲ្យជនជាតិអេស្ប៉ាញគឺលោក Alex ។
លោកកែម ឡី បានសម្តែងការសោកស្តាយ និងខកចិត្តចំពោះការសម្រេចរបស់រដ្ឋាភិបាល ដែលមិនយល់ព្រមបន្តសិទ្ធិទិដ្ឋាការឲ្យលោក Alex បានតទៅទៀត។ លោកបានបន្តថា កន្លងមកលោកបានសង្កេតឃើញថា Alex គឺជាមនុស្សម្នាក់ ដែលមានកាយវិការត្រឹមត្រូវ និងស្រលាញ់បរិស្ថានយ៉ាងពិតប្រាកដ។ មិនត្រឹមតែប៉ុណ្ណោះ Alex បានជួយបណ្តុះស្មារតីនិងគំនិតស្រលាញ់ធម្មជាតិដល់យុវជនខ្មែរជាច្រើន។ ជាពិសេសគឺយុវជននៅក្នុងតំបន់អារ៉ែងផ្ទាល់តែម្តង។
ប៉ុន្តែការយល់ឃើញរបស់សង្គមស៊ីវិលទាំងប៉ុន្មាននេះ ត្រូវបានលោកខៀវ សុភ័គ អ្នកនាំពាក្យរបស់ក្រសួងមហាផ្ទៃ បានបញ្ជាក់ថា ក្រសួងមហាផ្ទៃនឹងផ្តល់ទិដ្ឋាការឲ្យ Alex ជាបន្តទៀតប្រសិនបើអាឡិចចាកចេញពីប្រទេសកម្ពុជា ហើយវិលត្រលប់មកវិញនោះ។ លោកបានបន្តថា ទិដ្ឋាការរបស់ Alex ត្រូវបានពន្យារជាច្រើនដងមកហើយចាប់ពី Alex ចូលមករស់នៅក្នុងស្រុកខ្មែរក្នុងឆ្នាំ ២០០៦។ ហើយនៅពេលនេះ ក៏ក្រសួងមិនរើសអើងចំពោះជនជាតិអេស្ប៉ាញម្នាក់នេះទេ ប៉ុន្តែគ្រាន់តែទិដ្ឋាការដែល Alex កំពុងប្រើប្រាស់រាល់ថ្ងៃនេះ នឹងត្រូវអស់សុពលភាពនៅថ្ងៃទី ២០កុម្ភៈខាងមុខនេះ។
ជាមួយគ្នានេះដែរ ព្រះតេជគុណប៊ុត ប៊ុនតិញ ប្រធានបណ្តាញព្រះសង្ឃឯករាជ្យ ដើម្បីយុត្តិធម៌សង្គម បានសម្តែងការព្រួយបារម្ភថា ប្រសិនបើ Alex នឹងចាកចេញពីប្រទេសកម្ពុជាពេលនេះ នោះគឺពិបាកនឹងត្រលប់ចូលមកវិញ។ ព្រះអង្គ បានឲ្យឧទាហរណ៍ដូចជាករណីអ្នកឃ្លាំមើលរបស់អង្គការ Global Witness ជាដើម គឺ«ចេញទៅមិនបានការពារ ចូលមកវិញអត់បាន»។
លោកកែម ឡីបានផ្តល់អនុសាសន៍មួយចំនួន ដល់រដ្ឋាភិបាលថា គួរតែទាញយកផលប្រយោជន៍ឲ្យបានច្រើនពី Alex ព្រោះថាកន្លងមកសកម្មជនការពារបរិស្ថានម្នាក់ បានធ្វើកិច្ចការជាច្រើន ដើម្បីជួយទប់ស្កាត់ មិនឲ្យមានការបំផ្លិចបំផ្លាញព្រៃឈើ នៅក្នុងតំបន់អារ៉ែង ក្រោមរូបភាពសាងសង់ទំនប់វារីអគ្គិសនី ដែលមានកម្លាំងត្រឹមតែ ១០៨មេកាវ៉ាត់។ ជួយបណ្តុះបណ្តាលស្មារតីការពារបរិស្ថាន ដល់ក្រុមយុជនខ្មែរជាច្រើន។ ហើយលោក ក៏បានបន្តទៀតថា រដ្ឋាភិបាលគួរតែយកឱកាសនេះផ្សព្វផ្សាយពីតំបន់ទេសចរណ៍ ដែលត្រូវបានការពារដោយជនជាតិបរទេសរូបនេះឲ្យបានទូលំទូលាយទាំងក្នុង និងក្រៅប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ