កិច្ចចរចាក្រុមការងារបច្ចេកទេស មិនទាន់មានលទ្ធផល តែព្រមព្រៀងជួបគ្នាម្តងទៀត នៅចុងសប្តាហ៍នេះ
ក្រុមការងារបច្ចេកទេសជាន់ខ្ពស់របស់គណបក្សប្រជាជនកម្ពុជា និងគណបក្សសង្គ្រោះជាតិ បានចំណាយពេល ៣ម៉ោង ដើម្បីជួបប្រជុំចរចាគ្នា ជាថ្មី កាលពីព្រឹកថ្ងៃទី៥ ខែវិច្ឆិកា ឆ្នាំ២០១៣។ កិច្ចប្រជុំចរចាដោយបិទទ្វារ នៅរដ្ឋសភា បានជជែកពីការកែទម្រង់ការបោះឆ្នោត តែមិនមានលទ្ធផល ត្រូវបានប្រកាសចេញទេ។ ក្នុងនោះ ការបែងចែកអំណាច និងការសម្រេចទៅចូលរួមប្រជុំរដ្ឋសភា សម្រាប់គណបក្សសង្គ្រោះជាតិ មិនមានលើកឡើងទេ។
ចុះផ្សាយនៅថ្ងៃ៖
ស្តាប់ - ០១:៤៨
ក្រុមការងារបច្ចេកទេសជាន់ខ្ពស់ របស់គណបក្សប្រជាជនកម្ពុជា ដឹកនាំដោយលោក ព្រំសុខា និងគណបក្សសង្គ្រោះជាតិ ដឹកនាំដោយលោក សុន ឆ័យ ដែលមានសមាសភាពម្ខាងៗ ៥ រូប បានចំណាយពេលប្រជុំចរចាប្រមាណ ៣ ម៉ោង ចាប់តាំងពីព្រឹកម៉ោង ៩ ថ្ងៃអង្គារ ទី៥ ខែវិច្ឆិកា ឆ្នាំ២០១៣។ កិច្ចប្រជុំចរចាដោយបិទទ្វារ នៅរដ្ឋសភា និយាយពីការកែទម្រង់ការបោះឆ្នោត គឺលទ្ធផលមិនមានផ្លែផ្កាអ្វីទេ ដោយគេនៅរង់ចាំរាយការណ៍ជូនថ្នាក់ដឹកនាំ ជាមុនសិន។
ក្រុមការងារទាំងពីរ បានព្រមព្រៀងគ្នាថា នឹងជួបប្រជុំគ្នាម្តងទៀត នៅចុងសប្តាហ៍នេះ តែមិនទាន់កំណត់ថ្ងៃពិតប្រាកដនៅឡើយទេ។
ក្នុងសន្និសីទកាសែត បន្ទាប់ពីកិច្ចប្រជុំ នៅរសៀលម៉ោងជាង ១២ ថ្ងៃត្រង់ លោក ព្រំសុខា តំណាងគណបក្សប្រជាជនកម្ពុជា និងគណបក្សសង្គ្រោះជាតិ តំណាងដោយលោក យឹម សុវណ្ណ បានបញ្ជាក់ថា កិច្ចប្រជុំចរចានោះ លើកឡើងតែពីការកែទម្រង់ការបោះឆ្នោត ដែលថ្នាក់ដឹកនាំកំពូលគណបក្សប្រជាជនកម្ពុជា និងគណបក្សសង្គ្រោះជាតិ បានព្រមព្រៀងគ្នា កាលពីកិច្ចប្រជុំចរចាថ្នាក់កំពូល កាលពីថ្ងៃទី១៦កញ្ញា។
លោក ព្រំ សុខា ប្រធានក្រុមការងារបច្ចេកទេស របស់គណបក្សប្រជាជនកម្ពុជា បានបញ្ជាក់ថា កិច្ចប្រជុំនៅព្រឹកមិញ មិនបានជជែកពីការស៊ើបអង្កេត រកការពិត នៃលទ្ធផលបោះឆ្នោត ថ្ងៃទី២៨ ខែកក្កដា ឆ្នាំ២០១៣ ទេ។ កិច្ចប្រជុំ មិនទាន់ចេញលទ្ធផលទេ តែជាយន្តការមួយ ដើម្បីឈានទៅរកការកែទម្រង់ការបោះឆ្នោត នាពេលខាងមុខ។ រីឯការជជែកពីការបែងចែកអំណាច គឺមិនមានទេ ដោយហួសពីសមត្ថភាពរបស់ក្រុមការងារហើយ។
ចំណែកលោក យឹម សុវណ្ណ ក៏បានបញ្ជាក់ថា គណបក្សសង្គ្រោះជាតិ មិនជជែកពីការចូលរួមប្រជុំរដ្ឋសភាទេ នៅពេលនេះ ហើយបានព្រមានពីលទ្ធភាពនៃការធ្វើបាតុកម្មតវ៉ាជាថ្មី បើសិនជាកិច្ចចរចា មិនមានលទ្ធផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ