កូឡុំប៊ី ៖ អតីតមេទ័ពព្រៃក្រុមឧទ្ទាមហ្វាក (FARC) ត្រូវតុលាការពិសេសកាត់ទោសជាលើកដំបូង
នៅកូឡុំប៊ី ពីថ្ងៃសុក្រទី១៣កក្កដា តុលាការពិសេស ដែលទទួលបន្ទុកកាត់ទោសអតីតមេក្រុមឧទ្ទាមកូឡុំប៊ី បានផ្តើមកាត់ទោសជាលើកដំបូង ទៅលើអ្នកទទួលខុសត្រូវជាន់ខ្ពស់របស់ក្រុមឧទ្ទាមទ័ពព្រៃ ហ្វាក (FARC) ។ ការជនុំជម្រះទោសឧក្រិដ្ឋនេះ គឺធ្វើឡើងពីរឆ្នាំក្រោយការចុះកិច្ចព្រមព្រៀងសន្តិភាព កាលពីឆ្នាំ២០១៦។ ពលរដ្ឋកូឡុំប៊ី ដែលរងគ្រោះក្នុងសង្គ្រាមស៊ីវិលរយៈពេល៥០ឆ្នាំមកនេះ សង្ឃឹមរកឃើញយុត្តិធម៌។ ក៏ប៉ុន្តែ បើតាមកិច្ចព្រមព្រៀងសន្តិភាព មេធំៗនៃក្រុមឧទ្ទាមហ្វាក នឹងមិនត្រូវទទួលទោសដាក់ពន្ធនាគារនោះឡើយ។
ចុះផ្សាយនៅថ្ងៃ៖
ស្តាប់ - ០២:០៥
ពីមុនពេលចុះកិច្ចព្រមព្រៀងសន្តិភាពឆ្នាំ២០១៦, ក្រុមឧទ្ទាមហ្វាក (FARC) គឺជាក្រុមចលនាកងទ័ពបដិវត្តន៍កូឡុំប៊ី ដែលបានរស់នៅផ្តាច់ខ្លួនក្នុងព្រៃ។ ពួកគេបានធ្វើសកម្មភាពចាប់ជំរិត លួចឆក់ភ្លន់ និងលក់គ្រឿងញៀនក្នុងទីផ្សារងងឹត។ ក្រុមនេះ បានប្រយុទ្ធប្រឆាំងនឹងរដ្ឋាភិបាលកូឡុំប៊ី ដោយធ្វើសង្គ្រាមស៊ីវិលជាមួយគ្នា អស់ពេល ជាង៥ ទសវត្សរ៍មកហើយ។ ទើបតែនៅឆ្នាំ២០១៦ តំណាងរបស់ក្រុមឧទ្ទាម និងរដ្ឋាភិបាលកូឡុំប៊ី បានសម្រេចជាមួយគ្នា ចុះកិច្ចព្រមព្រៀងសន្តិភាព ដែលបានរៀបចំធ្វើឡើងនៅរដ្ឋធានី La Havane ប្រទេសគុយបា។ តាមរយៈកិច្ចព្រមព្រៀមសន្តិភាព គឺបានបង្កើតតុលាការពិសេសមួយដើម្បីកាត់ទោសមេដឹកនាំនៃក្រុមទ័ពព្រៃនេះ។
ក្នុងសវនាការលើកទី១ ពីថ្ងៃសុក្រទី១៣កក្កដា មានវត្តមានរបស់អ្នកទទួលខុសត្រូវជាន់ខ្ពស់របស់ក្រុម ហ្វាក នេះ ចំនួនបួននាក់។ បីនាក់បានចូលឆ្លើយក្នុងសវនាដោយផ្ទាល់ ហើយម្នាក់កំពុងជាប់គុកនៅអាមេរិកដោយសារតែជួញដូរគ្រឿងញៀន ក៏បានចូលរួមសវនាដែរ តាមរយៈវីដេអូ Conférence។ អតីតមេបញ្ជាពួកឧទ្ទាមហ្វាក លោក Rodrigo Londono ដែលគេច្រើនហៅថា Timochenko និងដែលមានវត្តមានក្នុងតុលាការ បានសុំទោសប្រជាជាតិកូឡុំប៊ីទាំងមូល និងបានថ្លែងសេចក្តីសោកស្តាយ ហើយនិងសង្ឃឹមថា តុលាការនេះ នឹងផ្តល់យុត្តិធម៌ដល់ជនរងគ្រោះ។
គួរគូសបញ្ជាក់ថា នៅក្នុងសង្គ្រាមស៊ីវិល រយៈពេល៥០ឆ្នាំនៅកូឡុំប៊ី គឺបានបណ្តាលឲ្យមនុស្ស ជាង២២ម៉ឺននាក់ស្លាប់បាត់បង់ជីវិត ហើយច្រើនលាននាក់ទៀត ត្រូវរងទុក្ខវេទនា និងត្រូវបង្ខំឲ្យជម្លៀសខ្លួនពីផ្ទះសម្បែង។
ក៏ប៉ុន្តែ ដើម្បីជាការបង្រួបបង្រួមជាតិ តុលាការពិសេស មានសមត្ថិកិច្ចត្រឹមតែកាត់ទោស ស្វែងរកសំណងជំងឺចិត្តដល់ជនរងគ្រោះផ្នែករដ្ឋប្បវេណីតែប៉ុណ្ណោះ។ ជាសំណងជំងឺចិត្តក្នុងទម្រង់ជាសមូហភាព ដែលត្រូវសងក្នុងរយៈពេល ពី៥ទៅ៨ឆ្នាំ។ ហើយតុលាការពិសេសនេះ នឹងគ្មានសិទ្ធិកាត់ទោសដាក់គុកមេៗក្រុមឧទ្ទាមទ័ពព្រៃទាំងនោះទេ។ លើសពីនេះ បើតាមកិច្ចព្រមព្រៀមសន្តិភាពដដែល គឺក្រុមអតីតឧទ្ទាមយោធា អាចចូលរួមក្នុងការបោះឆ្នោតបានថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ