វិបត្តិនុយក្លេអ៊ែរ៖ តើការប្រើកម្លាំងទ័ពវាយប្រហារលើអ៊ីរ៉ង់អាចជះផលវិបាកអ្វីខ្លះ?
ទីភ្នាក់ងារថាមពលបរមាណូអន្តរជាតិ (AIEA) កំពុងត្រៀមចេញផ្សាយរបាយការណ៍មួយ បង្ហាញអំពីភស្តុតាងជុំវិញកម្មវិធីនុយក្លេអ៊ែរយោធារបស់អ៊ីរ៉ង់។ ក្នុងពេលជាមួយគ្នានេះ បណ្តាញផ្សព្វផ្សាយព័ត៌មានអ៊ីស្រាអែលបានចុះផ្សាយថា រដ្ឋាភិបាលអ៊ីស្រាអែលកំពុងពិភាក្សាគ្នាជុំវិញគម្រោងប្រើកម្លាំងទ័ពវាយប្រហារកម្ទេចទីតាំងនុយក្លេអ៊ែររបស់អ៊ីរ៉ង់។
ចុះផ្សាយនៅថ្ងៃ៖
ស្តាប់ - ០៤:៥១
របាយការណ៍របស់ AIEA អាចនឹងត្រូវចេញផ្សាយ នៅថ្ងៃអង្គារ ឬថ្ងៃពុធ សប្តាហ៍នេះ។ ក៏ប៉ុន្តែ ខ្លឹមសារសំខាន់ៗនៃរបាយការណ៍នេះត្រូវបានលេចធ្លាយ ហើយត្រូវបានបណ្តាញសារព័ត៌មានជាច្រើនចុះផ្សាយជាបន្តបន្ទាប់។
នៅក្នុងរបាយការណ៍នេះ AIEA អាចនឹងបង្ហាញព័ត៌មានអំពីលក្ខណៈយោធានៃកម្មវិធីនុយក្លេអ៊ែររបស់អ៊ីរ៉ង់។ ដោយមានជំនួយពីកូរ៉េខាងជើង និងអ្នកជំនាញរបស់អតីតសហភាពសូវៀត អ៊ីរ៉ង់ទំនងជាកំពុងធ្វើការសិក្សាអំពីលទ្ធភាពផលិតក្បាលគ្រាប់នុយក្លេអ៊ែរ។
យោងតាមបណ្តាញសារព័ត៌មានអ៊ីស្រាអែល លោកនេតាន់យ៉ាហ៊ូ នាយករដ្ឋមន្រ្តីអ៊ីស្រាអែល កំពុងតែព្យាយាមរកការគាំទ្រពីសមាជិកគណៈរដ្ឋមន្រ្តី ដើម្បីបើកការវាយប្រហារលើទីតាំងនុយក្លេអ៊ែររបស់អ៊ីរ៉ង់។ កាលពីថ្ងៃអាទិត្យ ៦ វិច្ឆិកា ២០១១ លោកស៊្ហីម៉ុន ពេរេស (Shimon Peres) ប្រធានាធិបតីអ៊ីស្រាអែល បានព្រមានថា ការប្រើកម្លាំងទ័ពវាយប្រហារលើអ៊ីរ៉ង់ទំនងជាកាន់តែជិតក្លាយជាការពិត។
គួររំឭកថា កាលពីឆ្នាំ១៩៨១ អ៊ីស្រាអែលបានទម្លាក់គ្រាប់បែកកម្ទេចទីតាំងនុយក្លេអ៊ែរមួយកន្លែងនៅអ៊ីរ៉ាក់។ នៅឆ្នាំ២០០៧ យន្តចម្បាំងអ៊ីស្រាអែលបានកម្ទេចទីតាំងមួយកន្លែងនៅស៊ីរី ដែលអ៊ីស្រាអែលសង្ស័យថាជាទីតាំងនុយក្លេអ៊ែរ។
អ៊ីរ៉ង់គឺជាសត្រូវស៊ីសាច់ហុតឈាមរបស់អ៊ីស្រាអែល។ លោកម៉ះមូដ អះម៉ាឌីនចាត ប្រធានាធិបតីអ៊ីរ៉ង់ ធ្លាប់បានប្រកាសជាសាធារណៈចង់កម្ទេចប្រទេសអ៊ីស្រាអែលចេញឲ្យបាត់ពីផែនទីពិភពលោក។ ដូច្នេះ ប្រសិនបើអ៊ីស្រាអែលយល់ថា អ៊ីរ៉ង់ពិតជាកំពុងផលិតអាវុធនុយក្លេអ៊ែរមែន អ៊ីស្រាអែលប្រាកដជាមិនញញើតក្នុងការប្រើកម្លាំងទ័ពនោះទេ។
ក៏ប៉ុន្តែ ការប្រើកម្លាំងទ័ពវាយប្រហារលើទីតាំងនុយក្លេអ៊ែរអ៊ីរ៉ង់អាចនឹងបង្កអស្ថិរភាពក្នុងតំបន់ ឬក៏អាចរាលដាលទៅជាសង្រ្គាមទៀតផង។ អ៊ីរ៉ង់អាចនឹងប្រើកូនជឹងរបស់ខ្លួន គឺក្រុម Hezbollah ដែលកំពុងកាន់អំណាចនៅលីបង់ និងក្រុម Hamas នៅប៉ាឡេស្ទីន ឲ្យបង្កសង្រ្គាមជាមួយអ៊ីស្រាអែល។
ចាប់តាំងពីប៉ាឡេស្ទីនសុំចូលជាសមាជិកអ.ស.ប. ហើយដែលត្រូវអ៊ីស្រាអែល និងអាមេរិកជំទាស់មក នៅពេលនេះ ស្ថានភាពនៅតំបន់ដើមបូព៌ាកំពុងតែតានតឹងស្រាប់។ ដូច្នេះ ប្រសិនបើសង្រ្គាមផ្ទុះឡើងរវាងអ៊ីស្រាអែល និងប៉ាឡេស្ទីន ជម្លោះនេះងាយនឹងរាលដាលទៅកាន់ប្រទេសអារ៉ាប់ផ្សេងទៀត។
ម្យ៉ាងទៀត មេដឹកនាំស៊ីរី ដែលជាប្រទេសជិតខាងអ៊ីស្រាអែលក៏មានទំនាក់ទំនងជិតដិតជាមួយអ៊ីរ៉ង់។ នៅពេលនេះ លោកបាស្ហា អាល់អាសាដ ប្រធានាធិបតីស៊ីរី កំពុងតែប្រឈមមុខនឹងការបះបោរប្រឆាំងនៅក្នុងប្រទេស។ ដូច្នេះ ប្រសិនបើអ៊ីស្រាអែលវាយប្រហារលើអ៊ីរ៉ង់ មេដឹកនាំស៊ីរីអាចនឹងយកលេសនេះមកធ្វើសង្រ្គាមជាមួយអ៊ីស្រាអែល ដើម្បីបង្វែរបញ្ហា ពីការបះបោរក្នុងប្រទេស ទៅជាសង្រ្គាមជាមួយអ៊ីស្រាអែលវិញ។
អ៊ីរ៉ង់អាចលូកដៃបង្កអសន្តិសុខ និងអស្ថិរភាពនយោបាយ នៅក្នុងប្រទេសអ៊ីរ៉ាក់ ដែលនឹងបង្កើតជាបញ្ហាឈឺក្បាលដល់សហរដ្ឋអាមេរិក ដែលកំពុងតែត្រៀមដកកងទ័ពចេញពីអ៊ីរ៉ាក់។ គួរបញ្ជាក់ថា កន្លងមក អាមេរិកតែងតែបានចោទអ៊ីរ៉ង់ថា បាននិងកំពុងលួចជួយក្រុមឧទ្ទាម និងក្រុមភេរវជននៅអ៊ីរ៉ាក់។
ការវាយប្រហារលើអ៊ីរ៉ង់នឹងបង្កបញ្ហាដ៏ធំមួយទៀត គឺកង្វះខាតប្រេងកាត។ អ៊ីរ៉ង់គឺជាប្រទេសនាំចេញប្រេងកាតលំដាប់ទី៤ នៅលើពិភពលោក (បន្ទាប់ពីរុស្ស៊ី អារ៉ាប៊ីសាអ៊ូឌីត និងអារ៉ាប់រួម)។ អ៊ីរ៉ង់អាចនឹងយកប្រេងកាតមកធ្វើជាអាវុធសងសឹក។ ម្យ៉ាងទៀត អ៊ីរ៉ង់ក៏ អាចកាត់ផ្តាច់ផ្លូវដឹកជញ្ជូនប្រេងពីដើមបូព៌ា ទៅកាន់ទីផ្សារអន្តរជាតិផងដែរ។ គួរបញ្ជាក់ថា ក្នុងមួយឆ្នាំៗ ប្រេងឆៅប្រមាណ ១៧% នៃទីផ្សារពិភពលោក ត្រូវដឹកជញ្ជូនតាមច្រកសមុទ្រ Hormuz ដែលជាប់នឹងប្រទេសអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ