ភាពចម្រូងចម្រាសរវាងចិននិងអង់គ្លេសជុំវិញគម្រោងសាងសង់មជ្ឈមណ្ឌលនុយក្លេអ៊ែរ
ភាពចម្រូងចម្រាសមួយបានចាប់ផ្ទុះឡើង រវាងចិន និងអង់គ្លេស ទាក់ទងនឹងគម្រោងសាងសង់មជ្ឈមណ្ឌលនុយក្លេអ៊ែរនៅអង់គ្លេស ដោយមានចំណែកវិនិយោគពីក្រុមហ៊ុនចិន។ ភាពចម្រូងចម្រាសបានកើតឡើង ក្រោយពីរដ្ឋាភិបាលថ្មីរបស់អង់គ្លេសបានប្រកាសផ្អាកគម្រោង ដោយបានបង្ហាញពីការមិនទុកចិត្តចំពោះវត្តមាននៃវិនិយោគចិន នៅក្នុងវិស័យដ៏រសើប ដែលទាក់ទងនឹងសន្តិសុខជាតិអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ចិនមិនអាចទទួលយកបានជាដាច់ខាតនូវរាល់ការចោទប្រកាន់ទាំងឡាយណា ដែលថា វិនិយោគរបស់ចិន នៅក្នុងគម្រោងសាងសង់មជ្ឈមណ្ឌលនុយក្លេអ៊ែរអង់គ្លេស អាចជាការគំរាមកំហែងទៅដល់សន្តិសុខជាតិអង់គ្លេស។ នេះគឺជាការឆ្លើយតបរបស់ចិន តាមរយៈប្រព័ន្ធផ្សព្វផ្សាយរដ្ឋ ទៅរដ្ឋាភិបាលរបស់លោកស្រីតេរ៉េសា ម៉េ (Theresa May)។
គួរបញ្ជាក់ថា តាមគម្រោង រោងចក្រផលិតអគ្គិសនីដើរដោយថាមពលនុយក្លេអ៊ែរដែលប្រើបច្ចេកវិទ្យាទំនើបចុងក្រោយបង្អស់ (EPR) នឹងត្រូវសាងសង់ ដោយក្រុមហ៊ុន EDF របស់បារាំង ក៏ប៉ុន្តែ មានចំណែកវិនិយោគប្រមាណជា១ភាគ៣ មកពីក្រុមហ៊ុននុយក្លេអ៊ែរចិន (CGN)។
នៅពេលដែលក្រុមប្រឹក្សាភិបាលក្រុមហ៊ុន EDF ទើបនឹងបានសម្រេចកាលពីសប្តាហ៍មុនថា នឹងចាប់ផ្តើមបើកការដ្ឋានសាងសង់ ស្រាប់តែរដ្ឋាភិបាលអង់គ្លេសប្រកាសផ្អាកគម្រោងនេះទៅវិញ ដើម្បីធ្វើការសិក្សាលម្អិតឡើងវិញ មុននឹងធ្វើការសម្រេចចិត្តចុងក្រោយ នៅក្នុងរយៈពេលប៉ុន្មានខែខាងមុខ។
ថ្វីដ្បិតតែរដ្ឋាភិបាលអង់គ្លេសមិនបានបញ្ជាក់ជាផ្លូវការ អំពីហេតុផលដែលនាំឲ្យមានការផ្អាកគម្រោងនេះ តែអតីតរដ្ឋមន្រ្តីក្នុងរដ្ឋាភិបាលរបស់លោកដាវីដ កាមេរ៉ន បានឲ្យដឹងថា លោកស្រី តេរ៉េសា ម៉េ មានការមិនទុកចិត្តនឹងវត្តមានវិនិយោគរបស់ចិន ដោយបារម្ភខ្លាចមានការប៉ះពាល់ទៅដល់សន្តិសុខជាតិរបស់អង់គ្លេស។
កាលពីថ្ងៃចន្ទ មន្រ្តីអ្នកនាំពាក្យក្រសួងការបរទេសចិនបានធ្វើការរំឭកឡើងវិញថា គម្រោងសាងសង់មជ្ឈមណ្ឌលនុយក្លេអ៊ែរនេះ “ទទួលបានការគាំទ្រពីសំណាក់ចិន អង់គ្លេស និងបារាំង នៅក្នុងស្មារតីគោរពផលប្រយោជន៍គ្នាទៅវិញទៅមក ជាកិច្ចសហប្រតិបត្តិការទៅតាមគោលការណ៍ឈ្នះ-ឈ្នះ”។
ចិនក៏បានទាមទារផងដែរឲ្យអង់គ្លេសធ្វើការសម្រេចឲ្យបានឆាប់ៗជុំវិញគម្រោងនេះ ដោយបានលើកឡើងថា ការសម្រេចផ្អាកគម្រោងដ៏ធំនេះ អាចនឹងធ្វើឲ្យប៉ះពាល់ទៅដល់ភាពល្អូកល្អឺននៃទំនាក់ទំនង រវាងចិន និងអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ