រដ្ឋាភិបាល​និងសង្គមស៊ីវិល ប្រជុំពិភាក្សាពី​ការអភិវឌ្ឍន៍នៃបច្ចេកវិទ្យាអ៊ីនធឺណេត​

ច្បាប់គ្រងគ្រងអ៊ីនធឺណេត នឹងមិនមែនជាការចេះតែចាប់ឃុំឃាំង អ្នកប្រើប្រាស់ប្រព័ន្ធអ៊ីនធឺណេត តាមរយៈការបញ្ចេញទស្សនៈផ្សេងៗនោះទេ។ នេះគឺជាការលើកឡើង របស់លោកស៊ិន រ៉ាពីដ ប្រធានមជ្ឈមណ្ឌលស្រាវជ្រាវនៃវិទ្យាស្ថានជាតិ នៃក្រសួងប្រៃសនីយ៍ និងទូរគមនាគមន៍។ ទោះបីជាសេចក្តីព្រាងច្បាប់គ្រប់គ្រងអ៊ីនធឺណេត មិនទាន់ទាំងចេញស្រួលបួលផង ប៉ុន្តែលោកស៊ិន រ៉ាពីដ បានបកស្រាយពីអត្ថប្រយោជន៍នៃការមានច្បាប់នេះថា នឹងអាចការពារសិទ្ធិអ្នកប្រើប្រាស់ប្រព័ន្ធអ៊ីនធឺណេតបាន។

លោកស៊ិន រ៉ាពីដ បានមានប្រសាសន៍ថា គិតមកដល់ពេលនេះ អ្នកដែលកំពុងកាន់កាប់ស៊ីមកាតនៅក្នុងប្រទេសកម្ពុជា មានចំនួនជាង ២០លាននាក់ ដែលចំនួននេះ លើសពីចំនួនប្រជាជនសរុបទូទាំងប្រទេសទៅទៀត។ ហើយក៏មានអ្នកប្រើប្រាស់មួយចំនួន បានប្រើអ៊ីនធឺណេត នៅក្នុងទូរស័ព្ទដៃរបស់ខ្លួនផងដែរ។ ដូច្នេះវិធានការគ្រប់គ្រង បទល្មើសផ្សេងៗ គឺជារឿងចាំបាច់។

នៅពេលថ្មីៗនេះ ក្រសួងមហាផ្ទៃក៏ទើបបានបង្កើត នាយកដ្ឋានប្រឆាំងបទល្មើសបច្ចេកវិទ្យា ក្នុងគោលដៅទប់ស្កាត់ និងបង្ក្រាបបទល្មើសតាមប្រព័ន្ធអ៊ីនធឺណេត។ បទល្មើសបច្ចេកវិទ្យា ដែលរួមមាន ឧក្រិដ្ឋកម្មតាមអ៊ីនធឺណេត ការជំរិតទារប្រាក់ ការឆបោក ចរាចរណ៍រូបភាពអាសអាភាស ជាដើម។

ក្នុងសិក្ខាសាលានោះផងដែរ លោកស្រីជឹម ម៉ាណាវី នាយិកាប្រតិបត្តិអង្គការវិទ្យាស្ថានបើកទូលាយ ចង់ឲ្យអ្នកប្រើប្រាស់អ៊ីនធឺណេត ជាពិសេសគឺអ្នកប្រើប្រាស់បណ្តាញសង្គម ត្រូវមានភាពឆ្លាតវៃ យកបច្ចេកវិទ្យាសារគមនាគមន៍ និងព័ត៌មានវិទ្យា ជាឧបករណ៍សម្រាប់ផ្សព្វផ្សាយចែករំលែក និងផ្ទុកព័ត៌មាន។ មិនគួរយកបច្ចេកវិទ្យា ទៅប្រព្រឹត្តិអំពើអសីលធម៌សង្គម ឬបទឧក្រិដ្ឋ ឆរបោកអ្វីផ្សេងៗនោះទេ។

សូមបញ្ជាក់ថា សិក្ខាសាលា ស្តីពីសេរីភាពអ៊ីនធឺណេត កាលានុវត្តនភាព និងការប្រឈម ត្រូវបានរៀបចំឡើង ក្នុងគោលបំណង ដើម្បីស្វែងយល់ និងផ្សព្វផ្សាយពីតម្រូវការ និងការព្រួយបារម្ភ របស់ក្រុមអ្នកសិក្សា អង្គការមិនមែនរដ្ឋាភិបាលជាតិ និងអន្តរជាតិ ក្រុមយុវជន អង្គការក្នុងស្រុក វិស័យឯកជន អំពីសេរីភាពអ៊ីនធឺណេត នៅក្នុងប្រទេសកម្ពុជា៕