ប្រជាជននៅកេបិកបានត្រូវគេឃុំខ្លួនដោយហេតុតែពាក់ស្លាកពណ៌ក្រហម
ក្រណាត់មួយកូនដុំតូចពណ៌ក្រហមដេរភ្ជាប់ទៅនឹងសម្លៀកបំពាក់បានក្លាយទៅជាបដិរូបនៃ “និទាឃរដូវដើមអេរ៉ាប្លឹ៍” កេបិក។ នេះគេចង់និយាយបែបចំអករំលឹកដល់ការងើបបះបោរនៃ “និទាឃរដូវអារ៉ាប់” ។ ចាប់ពីពេលនេះតទៅ នរណាដែលមានពាក់ស្លាកពណ៌ក្រហម នឹងត្រូវនគរបាលចាប់ឃុំខ្លួន។ ទោះបីជានគរបាលបានឆ្លើយបដិសេធថា គ្មានរឿងរ៉ាវបែបនេះកើតឡើងក្តី ក៏ក្រុមអ្នកប្រឆាំងជាច្រើនទល់នឹងច្បាប់ដែលគ្រោងដំឡើងការបង់ថ្លៃសោហ៊ុយចូលរៀនមហាវិទ្យាល័យនៅទីក្រុងកេបិកប្រមាណ៧៥% បាននាំគ្នាស្រែកបរិហារពីការចាប់ឃុំខ្លួននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
ក្រណាត់ក្រហមមួយកូនដុំតូចបានក្លាយទៅជានិមិត្តរូបនៃការងើបបះបោរប្រឆាំងរបស់ក្រុមនិស្សិតនៅទីក្រុងកេបិកនៃប្រទេសកាណាដា។ ក្រណាត់ក្រហមតូចនេះបានត្រូវពាក់សម្តែងបង្ហាញដោយប្រជាជនកេបិកគ្រប់វ័យ។ ពីរថ្ងៃមកហើយដែលគេឃើញមានសក្ខីកម្មជាច្រើនបានបង្ហាញឲ្យដឹងតាមរយៈបណ្តាញសង្គម។ ប្រជាជនកេបិកជាច្រើននាក់បានថ្លែងឲ្យដឹងថា ពួកគេបានត្រូវនគរបាលចាប់ឆែកឆេរឬចាប់ឃុំខ្លួន ដោយហេតុតែពួកគេបានពាក់សម្តែងបង្ហាញនូវ ក្រណាត់ក្រហមមួយកូនដុំតូចដែលបានក្លាយទៅជានិមិត្តរូបនៃការងើបបះបោរប្រឆាំងរបស់ក្រុមនិស្សិត។
លោក Gabriel Nadeau-Dubois ដែលជាអ្នកនាំពាក្យនៃក្រុមអ្នកប្រឆាំងជាច្រើនទល់នឹងច្បាប់ដែលគ្រោងដំឡើងការបង់ថ្លៃសោហ៊ុយចូលរៀនមហាវិទ្យាល័យនៅទីក្រុងកេបិក បានស្រែកបរិហារថា “ទាំងនេះពិតជាធ្វើឲ្យគេបារម្ភក្រៃលែងដល់ប្រជាធិបតេយ្យនៅកេបិក”។
ក៏ប៉ុន្តែ ប្រមុខនគរបាលនៃទីក្រុងម៉ុងត៍រ៉េអាល លោក ម៉ាក ប៉ារ៉ង់ត៍បានថ្លែងការពារថា “គ្មានឡើយ ការចាប់ឆែកឆេរឬការចាប់ឃុំខ្លួន ដោយមូលហេតុ ពាក់ក្រណាត់ក្រហមមួយកូនដុំតូច ដើម្បីសម្ដែងបង្ហាញការប្រឆាំងទល់នឹងច្បាប់ដែលគ្រោងដំឡើងការបង់ថ្លៃសោហ៊ុយចូលរៀនមហាវិទ្យាល័យប្រមាណ៧៥%”។
ក្រុមនិស្សិតអ្នកប្រឆាំងបានទាមទារឲ្យ “គណៈកម្មការការពារសិទ្ធិប្រជាពលរដ្ឋនៅកេបិក" ធ្វើការស៊ើបអង្កេតឯករាជ្យមួយពីបញ្ហារំលោភសិទ្ធិប្រជាពលរដ្ឋនិងគ្រោះថ្នាក់ដែលគំរាមលទ្ធិប្រជាធិបតេយ្យនៅខេត្តកេបិកនៃប្រទេសកាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ