យន្តហោះម៉ាឡេស៊ី៖ ការងាររបស់ក្រុមអ្នកជំនាញអន្តរជាតិនៅតែត្រូវរំខាន ដោយគ្រាប់ផ្លោង
នៅថ្ងៃសៅរ៍ ទី ២សីហាក្រុមអ្នកស៊ើបអង្កេតអន្តរជាតិបានចាកចេញជាបន្ទាន់ពីកន្លែងផ្ទុះធ្លាក់យន្តហោះម៉ាឡេស៊ី ជាទីដែលពួកគេមានបេសកកម្មរុករកបំណែកសាកសព និងយន្តហោះ។ កាលពីថ្ងៃព្រហស្បតិ៍ កងទ័ពអ៊ុយក្រែន និងភាគីរុស្ស៊ីដែលគាំទ្រក្រុមឧទ្ទាមបំបែកទឹកដីអ៊ុយក្រែនបានយល់ព្រមធ្វើបទឈប់បាញ់ ក្នុងរង្វង់ដី ២០គីឡូម៉ែត្រពីកន្លែងធ្លាក់យន្តហោះម៉ាឡេស៊ី ពោលគឺដើម្បី ធានាសន្តិសុខដល់ក្រុមអ្នកស៊ើបអង្កេតអន្តរជាតិដែលត្រូវចូលទៅធ្វើការស្រាវជ្រាវនៅតំបន់នោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅពេលលឺសំឡេងផ្ទុះអាវុធ គេនៅមិនទាន់អាចដឹងថា តើភាគីកងទ័ពអ៊ុយក្រែន ឬពួកឧទ្ទាមដែលជាអ្នករំលោភបទឈប់បាញ់ដែលគេបានប្រកាស កាលពីថ្ងៃព្រហស្បតិ៍កន្លងទៅ។ ប៉ុន្តែ ដើម្បីបញ្ហាសុវត្ថិភាព ក្រុមអ្នកជំនាញអន្តរជាតិ ដែលអមដំណើរដោយប៉ូលិសអូស្ត្រាលី និងហូឡង់ ត្រូវបង្ខំចិត្តចាកចេញ ពីកន្លែងស្រាវជ្រាវសិន។ តាមប្រធានដឹកនាំអ្នកជំនាញរបស់អង្គការដើម្បីសន្តិសុខ និងសហប្រតិបត្តិការអឺរ៉ុប គេលឺសំឡេងស្នូរគ្រាប់ផ្លោង ដែលស្ថិតនៅមិនឆ្ងាយ គឺប្រមាណ ២ ឬបីគីឡូម៉ែត្រពីកន្លែងដែលអ្នកជំនាញកំពុងរកបំណែកយន្តហោះម៉ាឡេស៊ីដែលផ្ទុះធ្លាក់។ ចំណែកនៅកន្លែងដែលគេកំពុងរុករកបំបែកសាកសពរបស់អ្នកដំណើរ ស្នូរអាវុធលឺសូរជាប្រចាំ ប៉ុន្តែ វាហាក់នៅឆ្ងាយបន្តិច។
តាំងពីថ្ងៃសុក្រ នៅក្រោមក្រសែភ្នែកត្រួតពិនិត្យរបស់ក្រុមឧទ្ទាមអ៊ុយក្រែន អ្នកជំនាញបានរកឃើញបំណែកសាកសពរបស់អ្នកដំណើរមួយចំនួន ដែលនៅសេសសល់នៅក្នុងបរិវេណធ្លាក់យន្តហោះ។ ចំណែកបំណែកសំខាន់របស់យន្តហោះ ដូចជាកន្ទុយយន្តហោះក៏ត្រូវគេប្រមូលដឹកជញ្ជូនចេញពីកន្លែងធ្លាក់យន្តហោះដើម្បីយកទៅធ្វើការស្រាវជ្រាវដែរ។ តាមអ្នកជំនាញវិទ្យាសាស្រ្តហូឡង់ ការរុករកបំណែកសាកសព ត្រូវចាត់ទុកជាអាទិភាព គឺសំខាន់ជាងកំណត់រកមូលហេតុដែលធ្វើឲ្យយន្តហោះផ្ទុះធ្លាក់។
តាមអាមេរិក និងអាជ្ញាធរអ៊ុយក្រែន ក្រុមឧទ្ទាមដែលគាំទ្រដោយរុស្ស៊ីជាអ្នកបាញ់មីស៊ីលប្រភេទប៊ុកកម្ទេចយន្តហោះដឹកអ្នកដំណើរម៉ាឡេស៊ីMH ១៧ កាលពីថ្ងៃទី ១៧កក្កដា។ នៅសប្តាហ៍នេះ រុស្ស៊ីត្រូវសហភាពអឺរ៉ុប និងអាមេរិកដាក់បន្ថែមទណ្ឌកម្មសេដ្ឋកិច្ច ដើម្បីជំរុញឲ្យរុស្ស៊ីឈប់គាំទ្រផ្តល់អាវុធដល់ក្រុមឧទ្ទាមដែលទាមទារបំបែកទឹកដីពីអ៊ុយក្រែន។ ក្រសួងការបរទេសរុស្ស៊ី កាលពីថ្ងៃសៅរ៍បានចោទប្រកាន់សហភាពអឺរ៉ុបថា បានលួចដកដោយស្ងាត់ៗ បម្រាមដែលធ្លាប់ហាមមិនឲ្យដឹក លក់អាវុធទៅឲ្យអ៊ុយក្រែន។ តាមរុស្ស៊ី អាវុធទាំងនោះអាចត្រូវទីក្រុងគៀវប្រើដើម្បីបង្រ្កាបអ្នកតវ៉ាក្នុងស្រុក ដូចជាពួកឧទ្ទាមជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ