ពិភពលោកនាំគ្នាឈឺឆ្អាលពីបញ្ហាមេរោគអេបូឡា
ក្រុមប្រឹក្សាសន្តិសុខរបស់អ,ស,ប, បានថ្លែងថា “មេរោគរាតត្បាតអេបូឡា បានគំរាមដល់សន្តិភាពនិងសន្តិសុខពិភពលោក”។ សេចក្តីថ្លែងនេះ ត្រូវបានធ្វើឡើងនៅឱកាសនៃសម័យប្រជុំជាបន្ទាន់មួយរបស់អសប កាលពីថ្ងៃព្រហស្បតិ៍១៨កញ្ញាម្សិលមិញ ក្នុងគោលដៅរកវិធីសាស្ត្រប្រយុទ្ធប្រឆាំងទល់នឹងមេរោគអេបូឡាដែលកំពុងរាតត្បាតយាយីប្រទេសអាហ្វ្រិកខាងលិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
សេចក្តីសម្រេចចិត្តរបស់អង្គការសហប្រជាជាតិស្តីពីការប្រយុទ្ធប្រឆាំងទល់នឹងមេរោគអេបូឡា ត្រូវបានទទួលការគាំទ្រយ៉ាងធំធេងពីសំណាក់ប្រទេស១៣៤ ដែលមិនធ្លាប់មានឡើយនៅក្រុមប្រឹក្សាសន្តិសុខនៃអសប។ ក្រោមគំនិតផ្តួចផ្តើមរបស់សហរដ្ឋអាមេរិក ក្រុមប្រឹក្សាសន្តិសុខនៃអសប មានបំណងចង់ឲ្យពិភពលោក យល់ជ្រួតជ្រាបដឹងពី ទំហំដ៏ធ្ងន់ធ្ងរនៃមេរោគអេបូឡាដែលរហូតមកទល់ពេលនេះ បានសម្លាប់ជីវិតមនុស្សអស់ប្រមាណជាង២៤០០នាក់ហើយ។
ក្នុងពេលប្រជុំ គិលានុប្បដ្ឋាយិការម្នាក់នៃអង្គការគ្រូពេទ្យគ្មានព្រំដែន បានឡើងថ្លែងបន្តផ្ទាល់តាមរយៈវីដេអូកុងហ្វេរ៉ង់ពីទីក្រុងMonrovia អំពីស្ថានការណ៍ដ៏ដុនដាបនៅប្រទេស Libériaដោយសារមេរោគអេបូឡា។
លោកបានរៀបរាប់ថា នៅខណៈពេលដែលគាត់កំពុងនិយាយនេះ មានអ្នកជម្ងឺ នាំគ្នាអង្គុយសំកុកយ៉ាងកកកុញនៅពីមុខមាត់ទ្វារនៃអង្គការគ្រូពេទ្យគ្មានព្រំដែនប្រកបដោយទឹកមុខសោកសៅបំផុតនិងស្រែកអង្វរករសុំឲ្យគ្រូពេទ្យជួយព្យាបាលជម្ងឺដល់ពួកគាត់ ។ « អ្នកជម្ងឺទាំងអស់នោះ ច្បាស់ជាត្រូវស្លាប់យ៉ាងអាណោចអាធមតែម្នាក់ឯងគត់ បើសិនជាគ្មានអ្នកណាអើពើ។ នោះហើយ គឺជាការស្លាប់ដោយគ្មានសេចក្តីថ្លៃថ្នូរ។លោកបានបន្តទៀតថា « យើងត្រូវការចាំបាច់នូវមន្ទីរព្យាបាលជាច្រើនកន្លែងថែមទៀត ដើម្បីឲ្យពួកអ្នកជម្ងឺទាំងអស់នោះអាចទៅសំរាកព្យាបាលដើម្បីកុំឲ្យពួកគាត់ស្ថិតនៅក្នុងផ្ទះរបស់ពួកគាត់ និង ទៅចម្លងមេរោគនេះដល់អ្នកដ៏ទៃទៀត។
ម្យ៉ាងទៀត អង្គការសហប្រជាជាតិនឹងចាត់វិធានការ ដាក់ពង្រាយបេសកកម្មពិសេសមួយនៅអាហ្វ្រិកខាងលិចដើម្បីប្រយុទ្ធប្រឆាំងទល់មេរោគអេបូឡា ដោយយកគំរូតាម របៀបកងទ័ពមួកខៀវ។ បេសកកម្មនេះ គឺមានគោលដៅដើម្បីចែកចាយ ជំនួយនិងចូលរួមក្នុងការកសាងមន្ទីរពេទ្យនានានៅតាមតំបន់ដាច់ស្រយាល ក្នុងប្រទេសលីបេរីយ៉ា -ហ្គីណេឬក៏នៅសេរ៉ាឡេអូន។ ចំណែក អ្នកសម្របសម្រួល របស់អសបវិញ បានវាយតម្លៃថា “ដើម្បីប្រយុទ្ធកំចាត់ទល់នឹងមេរោគរាតត្បាតអេបូឡានេះ ជំនួយអន្តរជាតិ ត្រូវតែបង្កើនឲ្យបានចំនួន២០ដងថែមទៀតពីលើកំរិតជំនួយសព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ