សហភាពអឺរ៉ុបធ្វើជាអន្តរការីដោះស្រាយវិបត្តិអេហ្ស៊ីប
ចុះផ្សាយនៅថ្ងៃ៖
ស្តាប់ - ០៥:៤៣
សម្ពាធតានតឹង រវាងសកម្មជនអ៊ីស្លាមជ្រុលនិយម អ្នកគាំទ្រអតីតប្រធានាធិបតី មរស៊ី និងកងកម្លាំងសន្តិសុខ ប៉ោងឡើងកាន់ខ្លាំងជាលំដាប់។ អំពើហិង្សាមរណៈកាលពីចុងសប្តាហ៍ និងការព្រមានរបស់អាជ្ញាធរ មិនបានធ្វើឱ្យសកម្មជនអ៊ីស្លាមភារតបុត្រ ចុះញ៉មទេ ក្រុមនេះបានអំពាវនាវធ្វើបាតុកម្មជាថ្មីទៀតនៅថ្ងៃអង្គារនេះ។ ប្រឈមនឹងស្ថានភាពបែបនេះ លោកស្រី កាទ្រីន អាស្តុន (Catherine Ashton) ប្រមុខការទូតសហភាពអឺរ៉ុប បានសម្រេចពន្យារបេសកកម្ម នៅក្រុងគែរ ដើម្បីអាចជួបពិភាក្សាជាមួយនឹងថ្នាក់ដឹកនាំបក្ខដិបក្ខទាំងអស់ បូកទាំងលោកមរស៊ី អតីតប្រធានាធិបតីធ្លាក់ពីតំណែងផង។
លោកស្រី កាទ្រីន អាស្តុន (Catherine Ashton) ត្រូវបានជូនដំណើរដោយឧទ្ធម្ភាគចក្រយោធា នៅកណ្តាលអាធ្រាត្រយប់មិញ ទៅកាន់ទីដៅសម្ងាត់មួយ ដើម្បីជួបពិភាក្សាជាមួយនឹងលោកអតីតប្រធានាធិបតី តែពេលនេះក្លាយជាជនមានទោស។ ជំនួបបានអូសបន្លាយអស់ពេលពីរម៉ោង និងបានអនុញ្ញាតឱ្យឥស្សរជននយោបាយទាំងពីរពិភាក្សាគ្នាបានយ៉ាងស៊ីជម្រៅ។ ប៉ុន្តែខ្លឹមសារលម្អិត មិនត្រូវ អ្នកនាំពាក្យបង្ហើបបង្ហាញឱ្យដឹងជាសាធារណៈ។
មុននឹងបានជួបពិភាក្សាជាមួយនឹងប្រធានាធិបតីបាត់តំណែងនេះ លោកស្រីប្រមុខការទូត ក៏បានជួបពិភាក្សាផងដែរ នៅក្នុងថ្ងៃចន្ទម្សិលមិញ ជាមួយនឹងសកម្មជននយោបាយអេហ្ស៊ីបគ្រប់ភាគីទាំងអស់ មានជាអាទិ៍ ប្រធានាធិបតីស្តីទី អនុប្រធានាធិបតីទទួលបន្ទុកទំនាក់ទំនងអន្តរជាតិ លោក អែលបារ៉ាដាយ និងបុរសខ្លាំងរបស់អេហ្ស៊ីបដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក ឧត្តមសេនីយ៍ អាប់ឌែល ហ្វាតាស អែលស៊ីស៊ី។ ក្រៅ អំពីជំនួបជាមួយអ្នកទទួលខុសត្រូវនយោបាយសំខាន់ៗនេះ លោកស្រី អាស្តុន ក៏បានជួបពិភាក្សាជាមួយនឹងតំណាងប្រតិភូ នៃក្រុមបក្សប្រឆាំង Frère musulman និងសម្ព័ន្ធមិត្ត តំណាងចលនាយុវជន តាម៉ារ៉ូដ ដែលជាដើមហេតុ ធ្វើបាតុកម្ម នាំដល់ការធ្វើរដ្ឋប្រហារទម្លាក់លោកមរស៊ី និងតំណាងគណបក្សសាឡាហ្វីស ដែលពេលនេះកំពុងរក្សាជំហរអព្យាក្រិត្យ ក្នុងវិបត្តិបច្ចុប្បន្នរវាងក្រុមយោធានិងក្រុមអ៊ីស្លាមជ្រុលនិយម។
ហើយជាថ្មីម្តងទៀត រាល់ជំនួបទាំងឡាយនេះ គ្មានព័ត៌មានលម្អិតអ្វីធ្លាយចេញមកក្រៅសោះ។ និងទំនងដើម្បីសុវត្ថិភាពលោកមរស៊ី លោកស្រីអាស្តុន ក្នុងធ្វើសន្និសីទកាសែត បានត្រឹមបញ្ជាក់ថាលោក មរស៊ី មានសុខភាពល្អ ជាធម្មតា និងទទួលបានគ្រប់ព័ត៌មាន។
នេះមិនមែនជាលើកទីមួយទេ ដែលលោកស្រីប្រមុខការទូតសហភាពអឺរ៉ុប ទៅ-មកក្រុងគែរ តាំងពីអេហ្ស៊ីបធ្លាក់ក្នុងវិបត្តិ ដើម្បីសាកល្បងរកដំណោះស្រាយឱ្យអេហ្ស៊ីប។ លើកនេះបានប្រសើរជាងមុនបន្តិច ដោយលោកស្រីអាចជួបជាមួយនឹងលោកមរស៊ីបាន ប៉ុន្តែការខិតខំប្រឹងប្រែងរបស់អឺរ៉ុបនេះ មិនទាន់បានទទួលលទ្ធផលអ្វីទេ ក្រុមអ៊ីស្លាមជ្រុលនិយមបដិសេធជានិច្ច មិនព្រមធ្វើការចរចាឡើយ ដរាបណាលោកមរស៊ីមិនត្រឡប់មកកាន់តំណែងជាប្រធានាធិបតីវិញទេនោះ។
ក្រុមអ៊ីស្លាមជ្រុលនិយម ចង់ប្រើឱកាសនេះ ដើម្បីបញ្ជាក់ប្រាប់សហគមន៍អន្តរជាតិ ពិសេសសហភាពអឺរ៉ុបនេះ ថា ក្រុម Frère musulman មានសំឡេងច្រើន ឬពិតជាមានឆន្ទៈមោះមុត មិនងាយប្តូរជំហរដោយស្រួលៗឡើយ។ ក្រុមនេះបានអះអាងថា បានចេញសេចក្តីប្រកាសព័ត៌មានជូនដល់លោកស្រីប្រមុខការទូតសហភាពអឺរ៉ុប អំពីកម្មវត្ថុនេះបាតុកម្មនៅថ្ងៃអង្គារនេះ ដែលជាបាតុកម្មស្របច្បាប់ និងមានសកម្មភាពរហូតដល់ លោកមរស៊ី ប្រធានាធិបតីអេហ្ស៊ីបប្រសូតចេញពីការបោះឆ្នោតដំបូងគេបំផុត វិលមកកាន់អំណាចវិញ រំលាយចោលការធ្វើរដ្ឋប្រហារកាលពីដើមខែកក្កដា។
នៅក្នុងបាតុកម្មលើកនេះ មានក្បូនបីធំៗគ្រោងដង្ហែឡើង ៖ ទីមួយ សំដៅទៅកាន់មុខស្ថានទូតបរទេស ទូតដែលជិតជាងគេ គឺទូតបារាំង និងអារ៉ាប៊ី សាអ៊ូឌីត។ គ្រោះថ្នាក់បំផុត គឺដំណើរឆ្ពោះទៅកាន់ស្ថានទូតអាមេរិក ដែលស្ថិតនៅក្បែរទីលានសន្តិភាព តារៀ។ ទីលានដែលកាន់កាប់ដោយក្រុមអ្នកប្រឆាំងនឹងអតីតប្រធានាធិបតី។ មួយក្រុមទៀត ដែលអាចប្រឈមនឹងគ្រោះថ្នាក់ខ្លាំងដែរនោះ ដំណើរប្រមូលផ្តុំឆ្ពោះទៅកាន់ក្រសួងមហាផ្ទៃ។
ការប្រកូកប្រកាសប្រមូល បាតុករមួយលាននាក់ត្រូវបានគេរង់ចាំចុះថ្នល់នៅថ្ងៃនេះជាក្តីព្រួយបារម្ភថ្មី ខ្លាចមានអំពើហិង្សាផ្ទុះឡើងទៀត។ ក្នុងរយៈពេលតែជាងមួយខែនេះ វិបត្តិអេហ្ស៊ីប បានសម្លាប់ជីវិតមនុស្សជាងបីរយនាក់។ កាន់តែមានមនុស្សស្លាប់ កាន់តែរុញច្រានប្រទេសឱ្យធ្លាក់កាន់តែជ្រៅក្នុងវិបត្តិ ពិបាកចេញ។ តាំងពីថ្ងៃអាទិត្យមក អន្តរការីអឺរ៉ុប លោកស្រី កាទ្រីន អាស្តុន បានអំពាវនាវ ឱ្យមានការគោរព និងចាប់ផ្តើមដំណើរការអន្តរកាលនយោបាយ បញ្ចូលគ្រប់និន្នាការបក្សរាប់ទាំងក្រុមអ៊ីស្លាមជ្រុលនិយមផង។ ប៉ុន្តែក្នុងដំណាក់ទ័លច្រកនេះ ក្រុមយោធាបានព្រមានជាស្រេច ថានឹងចាត់ការប្រើធម៌ក្តៅ ប្រឆាំងរាល់ការជ្រុលជ្រួសហិង្សា។ ឧទ្ធម្ភាគចក្រយោធាបានឆ្វែល និងបោះខិត្តបណ្ណព្រមាន តាំងពីម្សិលមិញមក មិនឱ្យបាតុករ ទៅក្បែរទីស្នាក់ការប៉ូលិស ឬយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ