វិបត្តិអេហ្ស៊ីព្ទ៖ កងទ័ពមិនព្រមប្រើកម្លាំងបង្រ្កាបបាតុកម្ម
នៅថ្ងៃអាទិត្យ ៣០ មករា ២០១១នេះ ប្រជាជនអេហ្ស៊ីព្ទនៅតែបន្តនាំគ្នាចេញមកធ្វើបាតុកម្ម ៦ថ្ងៃជាប់ៗគ្នា ដើម្បីទាមទារឲ្យលោកមូបារ៉ាក់ចុះចេញពីតំណែង។ លោកមូបារ៉ាក់បានបញ្ជាឲ្យដាក់ពង្រាយកងទ័ព រួមមានទាំងរថក្រោះ និងរថពាសដែកផង នៅពេញតាមផ្លូវ នៅក្រុងគែរ ដើម្បីទប់ទល់នឹងបាតុករ។ ក៏ប៉ុន្តែ រហូតមកទល់ពេលនេះ ទាហានអេហ្ស៊ីព្ទមិនបានប្រើកម្លាំងបំបែកបាតុករនោះទេ។
ចុះផ្សាយនៅថ្ងៃ៖
បទវិភាគរបស់ សេង ឌីណា
លោកមូបារ៉ាក់បានសម្រេចដាក់ពង្រាយកងទ័ព នៅល្ងាចថ្ងៃសុក្រ គឺមកពីកម្លាំងប៉ូលិសមិនអាចទប់ទល់នឹងពួកបាតុករបាន។ ក៏ប៉ុន្តែ រហូតមកទល់ថ្ងៃអាទិត្យនេះ ទាហានអេហ្ស៊ីព្ទមិនបានប្រើកម្លាំងទៅលើបាតុករនោះទេ។ រហូតមកទល់ពេលនេះ ការប៉ះទង្គិចគ្នា គឺកើតមានឡើងតែរវាងបាតុករ និងប៉ូលិសប៉ុណ្ណោះ។ នៅរៀងរាល់យប់ ទោះបីជាមានបាតុកម្មរាប់ម៉ឺននាក់ចេញធ្វើបាតុកម្ម រំលោភលើបម្រាមគោចរ ក៏គេមិនឃើញមានក្រុមទាហានបញ្ចេញសកម្មភាពទប់ស្កាត់បាតុកម្មនេះដែរ។
ផ្ទុយទៅវិញ គេបែរជាឃើញតែរូបភាពបង្ហាញពីភាពស្និទ្ធស្នាលរវាងទាហាន និងបាតុករ។ ទាហាន និងបាតុករខ្លះឈរជជែកគ្នា ចាប់ដៃគ្នា ថតរូបជាមួយគ្នា ។ ពេលខ្លះ គេឃើញរថក្រោះ និងរថពាសដែក ជាច្រើនគ្រឿង បើកតាមផ្លូវជាមួយក្បួនបាតុកម្ម ដែលមើលទៅ ដូចជា ចូលរួមធ្វើបាតុកម្មច្រើនជាងមកបង្រ្កាបបាតុកម្ម។ ពេលខ្លះទៀត ពួកបាតុករឡើងជិះរថក្រោះជាមួយទាហាន។ ខ្លះថែមទាំងឈរលើរថក្រោះ គ្រវីទង់ជាតិ ហើយស្រែកបណ្តេញលោកមូបារ៉ាក់ឲ្យចេញពីតំណែងទៀតផង។
កាលពីថ្ងៃសៅរ៍ ម្សិលមិញ លោកមូបារ៉ាក់បានតែងតាំងឧត្តមសេនីយ៍កងទ័ពម្នាក់ គឺលោកអូម៉ា ស៊ូលេម៉ាន់ (Omar Souleimane) ឲ្យធ្វើជាអនុប្រធានាធិបតី។ តំណែងនេះ ត្រូវលោកមូបារ៉ាក់ទុកឲ្យទំនេរចោលអស់រយៈពេល ៣០ឆ្នាំកន្លងមកហើយ។ ការតែងតាំងឧត្តមសេនីយ៍កងទ័ពឲ្យកាន់តំណែងអនុប្រធានាធិបតី នៅពេលនេះ ធ្វើឲ្យគេគិតថា លោកមូបារ៉ាក់ទំនងជាកំពុងរៀបចំផ្ទេរអំណាចទៅឲ្យកងទ័ព។
លោកមូបារ៉ាក់បានតែងតាំងឧត្តមសេនីយ៍កងទ័ពម្នាក់ផ្សេងទៀត ឲ្យធ្វើជានាយករដ្ឋមន្រ្តី ដើម្បីរៀបចំសមាសភាពគណៈរដ្ឋមន្រ្តីថ្មី ក្រោយពីរដ្ឋាភិបាលចាស់ត្រូវបានរំលាយចោល កាលពីយប់ថ្ងៃសុក្រ។
ក៏ប៉ុន្តែ ការតែងតាំងអនុប្រធានាធិបតី និងការរៀបចំរដ្ឋាភិបាលថ្មីនេះ មិនបានធ្វើឲ្យបាតុករប្រឆាំងបន្ថយកំហឹងនោះទេ។ កាលពីយប់ថ្ងៃសៅរ៍ មនុស្សរាប់ម៉ឺននាក់បាននាំគ្នាចេញមកធ្វើបាតុកម្ម ដោយមិនខ្លាចញញើតនឹងបម្រាមគោចរ។ ពួកគេនៅតែបន្តទាមទារឲ្យលោកមូបារ៉ាក់ចុះចេញពីតំណែង ហើយថែមទាំងស្រែកប្រឆាំងនឹងលោកស៊ូលេម៉ាន់ ដែលទើបនឹងត្រូវតែងតាំងជាអនុប្រធានាធិបតីទៀតផង។
នៅថ្ងៃអាទិត្យនេះ បាតុកម្មប្រឆាំងលោកមូបារ៉ាក់បានឈានចូលដល់ថ្ងៃទី៦។ ចំនួនអ្នកស្លាប់ ក្នុងការបង្រ្កាបបាតុកម្ម បានកើនឡើងរហូតដល់ជាង១០០នាក់។ ប្រព័ន្ធអ៊ីនធ័រនែតនៅតែកាត់ផ្តាច់។ បន្ថែមពីលើនេះទៀត ការផ្សាយរបស់ទូរទស្សន៍អាល់ហ្សាហ្សេរ៉ា នៅអេហ្ស៊ីព្ទត្រូវបានកាត់ផ្តាច់ដែរ នៅថ្ងៃអាទិត្យនេះ។
ជើងហោះហើរភាគច្រើនចេញពីអេហ្ស៊ីព្ទត្រូវគេលុបចោល ធ្វើឲ្យអ្នកទេសចរបរទេសត្រូវគាំងដំណើរមិនអាចត្រឡប់ទៅផ្ទះវិញ បាន។ រដ្ឋាភិបាលជប៉ុនកំពុងតែស្វះស្វែងឲ្យរដ្ឋាភិបាលអេហ្ស៊ីព្ទធ្វើ យ៉ាងណាជួយជនជាតិជប៉ុនប្រមាណ ៥០០នាក់ ឲ្យបានចេញពីអេហ្ស៊ីព្ទ ត្រឡប់ទៅជប៉ុនវិញ។
អ៊ីស្រាអែលបានជម្លៀសក្រុមគ្រួសារមន្រ្តីទូតរបស់ខ្លួនចេញពី អេហ្ស៊ីព្ទ។ ទួរគីបានបញ្ជូនយន្តហោះទៅជម្លៀសពលរដ្ឋរបស់គេ ហើយអាមេរិកក៏គ្រោងនឹងធ្វើដូចគ្នានេះដែរ។ ប្រទេសកាន់តែច្រើនឡើង បានចេញសេចក្តីប្រកាសឲ្យពលរដ្ឋរបស់ខ្លួនចៀសវាងការធ្វើដំណើរទៅ កាន់ប្រទេសអេហ្ស៊ីព្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ