កូដកម្មនៅអេហ្ស៊ីប ចែកជាពីរក្រុម ដាច់ពីគ្នា រវាងក្រុមប្រឆាំង និងក្រុមគាំទ្រ ប្រធានាធិបតី មរស៊ី
នៅប្រទេសអេហ្ស៊ីប ក្រុមប្រឆាំង និង ក្រុមគាំទ្រ ប្រធានាធិបតី មរស៊ី បានធ្វើការប្រឈមមុខគ្នា ពេញមួយយប់ ថ្ងៃពុធ នៅជុំវិញវិមានប្រធានាធិបតី ធ្វើអោយស្លាប់បាតុករ ៥នាក់ និងរបួសរាប់រយនាក់។ កូដកម្មប្រឆាំង លោកមរស៊ី បានចាប់រាលដាល កាលពីថ្ងែអង្គារដើមសប្តាហ៍ មិនពេញចិត្តនឹង វិសោធនកម្មធម្មនុញ្ញ ដែលផ្តល់ នូវអំណាច ទូលំទូលាយ ដល់ ប្រធានាធិបតីអ៊ីស្លាម។ ក្រុមគាំទ្រ លោកមរស៊ី បានវាយប្រហារបកមកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
កាលពីថ្ងៃពុធ ម្សិលមិញ សកម្មជនចលនា “ភាតរបុត្រអ៊ីស្លាម” បានចូលទៅកាន់កាប់ ផ្លូវចូលវិមានប្រធានាធិបតី ហើយកំចាត់ ក្រុមបាតុករ ប្រឆាំង លោកមរស៊ី ចេញពីទីនោះ យ៉ាងសាហាវ ព្រៃផ្សៃ។
គណបក្សប្រឆាំង បានរាយការថា មានអំពើទារុណកម្មច្រើន បានកើតឡើង។ គេឃើញមាន បាតុករម្នាក់ ត្រូវបានគេចងព្យួរជើងទាំងពីរ ឡើងលើជាប់សសរដងគោម អគ្គិសនី នៅមុខវិមានប្រធានាធិបតី។ ជាងនេះទៅទៀត មានមនុស្សជាច្រើននាក់បានបាត់ខ្លួន ក្នុងនោះ ភាគច្រើនជាក្មេងស្រី។
កូដកម្មប្រឆាំងលោកមរស៊ី បានចាប់ផ្តើមកើតឡើង តាំងពីចុងខែវិច្ឆិកា បន្ទាប់ពី មានចេញក្រិត្យ ប្រធានាធិបតី ផ្តល់អំណាច ទូលំទូលាយ ដល់ ប្រធានាធិបតីអេហ្ស៊ីប។
កូដកម្មបានចាប់រាលដាល កាលពីថ្ងៃអង្គារ ដើមសប្តាហ៍ ហើយក្រុមបាតុករគាំទ្រ លោកមរស៊ី បានវាយបកប្រហារ តបត មកវិញ។
យោងតាមអ្នកទទួលខុសត្រូវ នៃរដ្ឋាភិបាលអេហ្ស៊ីប ប្រធានាធិបតី មរស៊ី នឹងប្រកាសដំណឹងមួយ នៅថ្ងៃព្រហស្បត្តិ៍នេះ ដើម្បីអោយប្រជាជន ពេញចិត្ត។ នៅថ្ងៃអង្គារ អនុប្រធានាធិបតី បានសុំអោយ គណបក្សប្រឆាំង ធ្វើការចរចា ជាមួយ រដ្ឋាភិបាល។ គណបក្សប្រឆាំង តបវិញថា ខ្លួននឹងចរចា លុះត្រាតែ រដ្ឋាភិបាល លុបចោលនូវ ក្រិត្យដែលផ្តល់អំណាច ដល់ប្រធានាធិបតី និងបញ្ឈប់នូវការបោះឆ្នោតប្រជាមតិ លើគំរោងធម្មនុញ្ញ នៅថ្ងៃ ១៥ធ្នូ ខាងមុខ។
ប៉ុន្តែ ក្រុមបាតុករ ដែលបាត់បង់ញាតិមិត្ត ក្នុងអំពើហិង្សា យល់ថា មិនចាំបាច់មានការចរចា នោះឡើយ ព្រោះសំរាប់ពួកគេ ថ្ងៃទី ៥ ធ្នូម្សិលមិញ គឺជា ថ្ងៃតំណាង នូវអំពើផ្តាច់ការរបស់រដ្ឋាភិបាល រឺក៏ តំណាងចលនាបដិវត្តន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ