សេនាប្រមុខអេហ្ស៊ីប អាប់ដែល ហ្វាតា អាល់ ស៊ីសស៊ីលាលែងពីតំណែងកងទ័ព
នៅប្រទេសអេហ្ស៊ីប លោកសេនាប្រមុខ អាប់ដែល ហ្វាតា អាល់ ស៊ីសស៊ី មេបញ្ជាការកងទ័ព និងជារដ្ឋមន្រ្តីក្រសួងការពារជាតិបានសម្រេចដោះសម្លៀកបំពាក់យោធាដើម្បីឈរឈ្មោះចូលរួមបោះឆ្នោតប្រធានាធិបតីនៅថ្ងៃខាងមុខ។ ការសម្រេចចិត្តរបស់លោកអាល់ ស៊ីសស៊ីត្រូវបានធ្វើឡើងតាមកញ្ចក់ទូរទស្សន៍នៅថ្ងៃពុធ ទី២៦ មីនា។ មួយវិញទៀត ការសម្រេចចិត្តរបស់លោកអាល់ ស៊ីសស៊ីពេលនេះមិនបានធ្វើឲ្យគ្រប់គ្នាភ្ញាក់ផ្អើលឡើយ ព្រោះលោកធ្លាប់បានបង្ហើបឲ្យដឹងនៅក្នុងសារព័ត៌មានកន្លងមកដែលថា លោកមិនអាចព្រងើយកន្តើយចំពោះការអំពាវនាវចង់បានរបស់ប្រជាជនបានទេ។ តើសេនាប្រមុខ អាប់ដែល ហ្វាតា អាល់ ស៊ីសស៊ីមានប្រវត្តិរូបសង្ខេបយ៉ាងដូចម្តេចខ្លះ?
ចុះផ្សាយនៅថ្ងៃ៖
ស្តាប់ - ០២:១៧
យោងតាមច្បាប់រដ្ឋធម្មនុញ្ញអេហ្ស៊ីប មានតែជនស៊ីវិលទេដែលមានសិទ្ធិឈរឈ្មោះបោះឆ្នោតប្រធានាធិបតី។ អ៊ីចឹងហើយបានជាលោកអាប់ដែល ហ្វាតា អាល់ ស៊ីសស៊ីបានសម្រេចចិត្តក្រវាត់ចោលនូវសម្លៀកបំពាក់ទាហានដែលលោកបានពាក់តំាងពី ៤៤ឆ្នំាមកហើយ។ ដូច្នេះចាប់ពីពេលនេះទៅដល់ថ្ងៃបោះឆ្នោត លោក អាប់ដែល ហ្វាតា អាល់ ស៊ីសស៊ី លែងជាសេនាប្រមុខ លែងជាមេបញ្ជាការកងទ័ព និងលែងជារដ្ឋមន្រ្តីក្រសួងការពារជាតិទៀតឡើយ។ មានអាយុ ៥៩ឆ្នំា មានអាល់ស៊ីសស៊ីកំពុងមានប្រជាប្រិយភាពខ្លំាងណាស់នៅក្នុងចំណោមប្រជាជនអេហ្ស៊ីបទូទៅ។ រូបថតរបស់លោកអាល់ស៊ីសស៊ីត្រូវបានគេឃើញដាក់តំាងនៅសឹងតែគ្រប់កន្លែងទំាងអស់ក្នុងប្រទេសអេហ្ស៊ីប តែបញ្ហានៅត្រង់ថា គេហាក់ដូចជាមិនសូវស្គាល់ពីប្រវត្តិរូបរបស់បុរសរូបនេះប៉ុន្មានទេ ក្រៅតែពីមានអាជីពជាទាហានមួយមុខនោះ
តាមពិតទៅ លោកអាល់ ស៊ីសស៊ីបានស្លៀកពាក់ឯកសណ្ធានទាហានតំាងពីមានអាយុ ១៥ឆ្នំាមកម្ល៉េះ នៅពេលដែលលោកចូលសិក្សានៅសាលាយោធាជើងអាកាស។ ខុសពីលោកសេនាប្រមុខតង់តាវីដែលបានរៀនសូត្រ ហ្វឹកហ្វឺននៅសហភាពសូវៀត លោកអាល់ ស៊ីសស៊ីបានសិក្សារៀនសូត្រក្បួនយោធាតាមបែបបស្ចិមលោកដោយទទួលបានសញ្ញាប័ត្រមានតម្លែស្មើនឹងសញ្ញាប័ត្រនៅសហរដ្ឋអាមេរិក ឬមួយក៏នៅប្រទេសអង់គ្លេស។ លោកអាល់ ស៊ីសស៊ីធ្លាប់ធ្វើជាប្រធានការិយាល័យស៊ើបការណ៍សម្ងាត់ដ៏មានឥទ្ធិពលនៅក្នុងប្រទេសអេហ្ស៊ីប។ គឺការិយាល័យស៊ើបការណ៍សម្ងាត់នេះហើយដែលកាន់បញ្ជីរកងទ័ពគ្រប់ឋានន្តរសក្តិទំាងអស់។
លោកអាល់ ស៊ីសស៊ីជាមនុស្សដែលគេស្រឡាញ់ និងគោរព។ លោកជាមនុស្សដែលត្រូវបានគេគោរពខ្លំាងជាងគេនៅក្នុងឧត្តមក្រុមប្រឹក្សាកងទ័ព។ នេះហើយជាហេតុផលមួយដែលក្រុមភាតរអ៊ីស្លាមបានជ្រើសរើសលោកឲ្យធ្វើជារដ្ឋមន្រ្តីក្រសួងការពារជាតិ។ នៅរដូវក្តៅឆ្នំា ២០១២ លោកអាល់ ស៊ីសស៊ីក៏ត្រូវបានលោកប្រធានាធិបតីម័រស៊ីចេញពីក្រុមភាតរអ៊ីស្លាមតែងតំាងជាមេបញ្ជាការកងទ័ពថែមទៀត។ តែនេះជាកំហុសមួយដែលលោកម័រស៊ីមិនគួរនឹងធ្វើសោះ ព្រោះថា ជិតមួយឆ្នំាក្រោយមក គឺរូបឧត្តមសេនីយអាល់ ស៊ីសស៊ីនេះឯងដែលបានទម្លាក់លោកម័រស៊ីចេញពីអំណាចដោយសំអាងលើការទាមទាររបស់ក្រុមបាតុករនៅតាមផ្លូវ។
ក្រោមភ្នែក ច្រមុះរបស់ប្រជាជនអេហ្ស៊ីបទូទៅ លោកអាល់ ស៊ីសស៊ីជាអ្នកស្រោចស្រង់ប្រទេសអេហ្ស៊ីប ជាអ្នកដែលមានសមត្ថភាពប្រឈមមុខទល់នឹងប្រទេសមហាអំណាចផ្សេងៗ មានអាមេរិកជាដើម។ តែសម្រាប់ក្រុមភាតរអ៊ីស្លាមវិញ លោកអាល់ ស៊ីសស៊ីជាមនុស្សផ្តាច់ការដែលបានចាប់ក្រុមប្រឆំាងជាង ១០ ០០០នាក់ដាក់គុក និងបានបណ្តាលឲ្យមានមនុស្សស្លាប់រាប់សិបពាន់នាក់ ក្រោមលេសប្រឆំាងនឹងពួកភេរវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ