ម៉ិចស៊ិកធ្វើបត្យាប័នបញ្ជូនស្តេចអាភៀនEl Chapo អោយអាមេរិក
នៅថ្ងៃព្រហស្បតិ៍១៩មករាម្សិលមិញ អាជ្ញាធរម៉ិចស៊ិកបានធ្វើបត្យាប័ន បញ្ជូនស្តេចអាភៀនដ៏ល្បី គឺ Joaquin El Chapo Guzman អែលស្ហាប៉ូ ទៅអោយអាមេរិក។ តុលាការកំពូលម៉ិចស៊ិកបានទាត់ចោលបណ្តឹងចុងក្រោយរបស់អែលស្ហាប៉ូ។ ការបញ្ជូនស្តេចអាភៀនទៅអោយអាមេរិក ធ្វើឡើង១ថ្ងៃប៉ុណ្ណោះ មុនប្រធានាធិបតីអាមេរិកថ្មី ដូណាល់ ត្រាំ ស្បថចូលកាន់តំណែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
El Chapo អាយុ៦២ឆ្នាំ ជាស្តេចអាភៀនម៉ិចស៊ិក ដ៏ល្បីឈ្មោះ និងមានឥទ្ធិពលក្នុងពិភពលោក។ ម្សិលមិញ អាជ្ញាធរម៉ិចស៊ិកបានបញ្ជូនខ្លួនស្តេចអាភៀនរូបនេះទៅក្រុងញូវយក។ សូមរំលឹកថា អែលស្ហាប៉ូដឹកនាំក្រុម Cartel de Sinaloa កាតែល ដឺ ស៊ីណាឡូអា ជាបណ្តាញក្រុមជំនាញជួញដូរគ្រឿងញៀនអន្តរជាតិ។ រដ្ឋចំនួន៦ នៅសហរដ្ឋអាមេរិក ក្នុងនោះមានរដ្ឋញូវយកផងដែរ បានចោទស្តេចអាភៀនរូបនេះ ពីបទជួញដូរគ្រឿងញៀន លាងលុយកខ្វក់ ទិញអាវុធខុសច្បាប់ រឺក៏អំពើឧក្រិដ្ឋផ្សេងទៀត។
អែលស្ហាប៉ូត្រូវបានចាប់ខ្លួន កាលពីឆ្នាំ ១៩៩៣ នៅប្រទេសហ្កាតេម៉ាឡា។ តាំងពីឆ្នាំ២០០១មក ស្តេចគ្រឿងញៀនរូបនេះ បានលួចរត់ចេញពីគុក ច្រើនដងមកហើយ ធ្វើអោយគាត់កាន់តែល្បីឈ្មោះថែមទៀត។ ថ្ងៃសុក្រនេះ អែលស្ហាប៉ូ នឹងឡើងតុលាការអាមេរិក។ អាមេរិកបានសន្យានឹងម៉ិចស៊ិកថា នឹងមិនកាត់ទោសរហូតដល់ថ្នាក់ប្រហារជីវិតស្តេចអាភៀនអែលស្ហាប៉ូទេ។
ការបញ្ជូនខ្លួនស្តេចអាភៀនម៉ិចស៊ិកទៅអោយអាជ្ញាធរអាមេរិក ធ្វើឡើងមិនដល់១ថ្ងៃទេ មុនប្រធានាធិបតីដូណាល់ ត្រាំ ស្បថចូលកាន់តំណែង ថ្ងៃសុក្រនេះ។ គេគិតថា ម៉ិចស៊ិកប្រហែលជាចង់ផ្ញើសារទៅអោយលោកត្រាំ ពីសារៈសំខាន់នៃយុទ្ធនាការបង្ក្រាបគ្រឿងញៀន ហើយដោយសារតែលោកត្រាំ ធ្លាប់មានរឿងចម្រូងចម្រាសចង់សង់ជញ្ជាំងព្រំដែនជាមួយម៉ិចស៊ិកនោះ ការបញ្ជូនខ្លួនស្តេចអាភៀនពេលនេះ អាចថា ដោយសារតែម៉ិចស៊ិកមិនចង់អោយលោកត្រាំរីករាយខ្លាំងពេក ក្នុងពិធីចូលកាន់តំណែងថ្ងៃសុក្រនេះ។ ប៉ុន្តែ ម៉ិចស៊ិកប្រាប់ថា រឿងបញ្ជូនស្តេចអាភៀនអោយអាមេរិក មិនពាក់ព័ន្ធនឹងព្រឹត្តការណ៍ឡើងកាន់អំណាចរបស់លោកត្រាំទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ