បោះឆ្នោតប្រធានាធិបតីស៊ីលី៖ លោកស្រី មីសែល បាសេឡេត្រឡប់មកកាន់អំណាចជាថ្មី!
នៅថ្ងៃអាទិត្យ ទី១៧ វិច្ឆិកានេះ មានប្រជាជនស៊ីលីចំនួន ១៣លាន ៥សែននាក់ត្រូវបានគេអញ្ជើញឲ្យចូលរួមបោះឆ្នោតជ្រើសរើសប្រធានាធិបតីថ្មី តំណាងរាស្រ្តថ្មី និងក្រុមប្រឹក្សាឃុំ សង្កាត់ថ្មី។ លោកស្រីអតីតប្រធានាធិបតីមីសែល បាសេឡេត្រូវបានគេមើលឃើញថា មានសំណាងច្រើននឹងវិលត្រឡប់មកកាន់តំណែងប្រធានាធិបតីជាថ្មី។ តំណែងដែលលោកស្រីធ្លាប់បានកាន់កាប់ពីឆ្នំា ២០០៦ ដល់ឆ្នំា ២០១០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
យោងតាមលទ្ធផលនៃការស្ទង់មតិចុងក្រោយឲ្យដឹងថា លោកស្រីមីសែល បាសេឡេ បេក្ខនារីមកពីគណបក្សសង្គមនិយមទទួលបានការគំាទ្រច្រើនជាងបេក្ខជន និងបេក្ខនារីឈរឈ្មោះបោះឆ្នោតចំនួន ៨នាក់ផ្សេងទៀត។ ប្រជាប្រិយភាពរបស់លោកស្រីបាសេឡេពេលនេះ គឺជាលទ្ធផលនយោបាយដែលលោកស្រីបានបន្សល់ទុកក្នុងពេលកាន់តំណែងពីឆ្នំា ២០០៦ ដល់ឆ្នំា ២០១០ ពិសេសគឺនយោបាយសង្គមដ៏ល្អដែលប្រទេសស៊ីលីមិនធ្លាប់មានទេ គិតតំាងពីប្រទេសបានវិលមកកាន់គន្លងប្រជាធិបតេយ្យកាលពីក្នុងទសវត្សឆ្នំា ៩០។
ម្យ៉ាងវិញទៀត ភាពសាមញ្ញ និងទំនាក់ទំនងស្និទិស្នាល មិនរើសអើងរបស់លោកស្រីបាសេឡេក៏បានបង្កើតឲ្យមានទំនុកទុកចិត្តយ៉ាងស៊ីជ្រៅរវាងលោកស្រី និងប្រជាជនស៊ីលីគ្រប់ស្រទាប់វណ្ណៈដែរ។ មានកូនចំនួន ៣នាក់ បានមកពីស្វាមីខុសគ្នា លោកស្រីបានធ្វើការងារច្រើនណាស់ដើម្បីជួយលើកតម្កើងជីវិភាពរស់នៅរបស់ស្រ្តី។
ដូច្នេះឃើញថា គេហាក់ដូចជាបានដឹងមុននូវឈ្មោះប្រធានាធិបតីថ្មីរបស់ប្រទេសស៊ីលីដែលប្រហែលជាគ្មាននរណាក្រៅពីលោកស្រីមីសែល បាសេឡេទេ។ តែអ្វីដែលបន្តនៅជាអាថ៌កំបំាងនោះគឺថា តើគណបក្សឆ្វេងនិយមរបស់លោកស្រីអាចនឹងទទួលបានសម្លេងភាគច្រើនលើសលប់នៅក្នុងរដ្ឋសភាដែរ ឬទេ ព្រោះថា ដើម្បីអាចឲ្យលោកស្រីអនុវត្តបាននូវកំណែទម្រង់មួយចំនួនបាន លោកស្រីត្រូវការសម្លេងគំាទ្រភាគច្រើននៅក្នុងរដ្ឋសភា។
អាថ៌កំបំាងមួយទៀត អត្រានៃចំនួនអ្នកចូលរួមបោះឆ្នោត ព្រោះថា នៅមុនកំណែទម្រង់ច្បាប់បោះឆ្នោតក្នុងខែមករា ឆ្នំា ២០១២ ការបោះឆ្នោតជាកាតព្វកិច្ចចំាបាច់មិនអាចខ្វះបាន។ តែតំាងពីក្រោយខែមករា ឆ្នំា ២០១២ មក ការបោះឆ្នោតលែងជាកាតព្វកិច្ចចំាបាច់ទៀតឡើយ។ អ្នកដែលមានឈ្មោះបោះឆ្នោតមានជម្រើសរវាងទៅបោះឆ្នោត ឬមួយមិនទៅបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ