អឺរ៉ុបកំពុងពិចារណាអំពីការបង្កើតស្ថាប័នគ្រប់គ្រងនយោបាយសារពើពន្ធរបស់រដ្ឋសមាជិក
ក្នុងពេលដែលវិបត្តិប្រាក់បំណុលកំពុងតែធ្លាក់ចូលក្នុងស្ថានភាពកាន់តែដុនដាប សហភាពអឺរ៉ុបកំពុងតែពិចារណារៀបចំធ្វើកំណែទម្រង់ស៊ីជម្រៅ ទៅលើនយោបាយ និងស្ថាប័នអឺរ៉ុប ដើម្បីឈានទៅបង្កើនការធ្វើសមាហរ័ណកម្មផ្នែកសារពើពន្ធ ធនាគារ និងសង្គមកិច្ច ជាពិសេស ក្នុងក្របខ័ណ្ឌប្រទេសចាយលុយអឺរ៉ូ ទាំង ១៧ប្រទេស។ សំណើកំណែទម្រង់នេះអាចនឹងត្រូវគេដាក់ចូលក្នុងរបៀបវារៈ នៃជំនួបកំពូលអឺរ៉ុប នៅចុងខែមិថុនាខាងមុខនេះ។
ចុះផ្សាយនៅថ្ងៃ៖
ស្តាប់ - ០៦:០៨
កាលពីថ្ងៃអាទិត្យ ម្សិលមិញ កាសែតអាល្លឺម៉ង់មួយបានចុះផ្សាយ ដោយដកស្រង់សម្តីមន្រ្តីជាន់ខ្ពស់របស់សហភាពអឺរ៉ុបថា ប្រមុខដឹកនាំស្ថាប័នកំពូលៗទាំង៤ របស់អឺរ៉ុប គឺលោក Mario Draghi អគ្គទេសាភិបាលធនាគារកណ្តាលអឺរ៉ុប លោក Herman Van Rompuy ប្រធានសហភាពអឺរ៉ុប លោក José Manuel Barroso ប្រធានគណៈកម្មការអឺរ៉ុប និងលោក Jean-Claude Juncker ប្រធានតំបន់ចាយលុយអឺរ៉ូ (Eurogroup) គឺជាអ្នកទទួលបន្ទុករៀបចំផែនការកំណែទម្រង់ស្ថាប័នអឺរ៉ុប ដើម្បីដាក់ជូនប្រមុខរដ្ឋ ឬប្រមុខរដ្ឋាភិបាលនៃប្រទេសជាសមាជិក ជជែកពិភាក្សាគ្នា នៅក្នុងជំនួបកំពូល ថ្ងៃទី២៨ និងថ្ងៃទី២៩ មិថុនា ខាងមុខនេះ។
មន្រ្តីសហភាពអឺរ៉ុបបានបង្ហើបឲ្យដឹងថា ផែនការកំណែទម្រង់នេះ នឹងផ្តោតជាពិសេស ទៅលើការធ្វើសមាហរ័ណកម្មនៃនយោបាយសារពើពន្ធ មានន័យថា គេត្រូវបង្កើតឲ្យមានជាក្រសួងហិរញ្ញវត្ថុមួយក្នុងក្របខ័ណ្ឌអឺរ៉ុប ដើម្បីចាត់ចែងថវិកាជាតិ (មុខចំណាយសាធារណៈ និងចំណូលសារពើពន្ធ) របស់ប្រទេសសមាជិកនីមួយៗ។ កំណែទម្រង់នេះនឹងត្រូវធ្វើជាជំហានដំបូងចំពោះតែប្រទេសក្នុងតំបន់ចាយលុយអឺរ៉ូ (១៧ប្រទេស) ប៉ុណ្ណោះ ដោយមិនជាប់ពាក់ព័ន្ធនឹងសហភាពអឺរ៉ុប ទាំង ២៧ប្រទេសនោះទេ។
ប្រសិនបើអាចសម្រេចបានមែន កំណែទម្រង់នេះនឹងជំរុញអឺរ៉ុបឲ្យបោះជំហានទៅមុខមួយកម្រិតទៀត ឆ្ពោះទៅការបង្កើតរចនាសម្ព័ន្ធបែបសហព័ន្ធ ដែលអាល្លឺម៉ង់តែងតែទាមទារចង់បាន។ កំណែទម្រង់នេះ ធ្លាប់ត្រូវបានអតីតអគ្គេទេសាភិបាលធនាគារកណ្តាលអឺរ៉ុបស្នើឡើងម្តងរួចមកហើយ កាលពីឆ្នាំទៅមិញ ក៏ប៉ុន្តែ ប្រទេសជាសមាជិកភាគច្រើនមិនចង់បោះបង់អធិបតេយ្យរបស់ខ្លួនទៅឲ្យអឺរ៉ុប។
ក៏ប៉ុន្តែ ឆ្លងកាត់វិបត្តិដែលកំពុងតែធ្លាក់ដុនដាប់ខ្លាំងឡើងៗ ពីមួយថ្ងៃទៅមួយថ្ងៃ អឺរ៉ុបបានដើរដល់ផ្លូវបំបែកមួយ ដែលចាំបាច់ត្រូវតែធ្វើជម្រើស៖ បន្តនៅជាមួយគ្នា ដោយបង្កើនការធ្វើសមាហរ័ណកម្ម ហើយលះបង់អធិបតេយ្យជាតិខ្លះទៅឲ្យស្ថាប័នអឺរ៉ុប ឬមួយក៏ចែកផ្លូវគ្នាដើរ? អឺរ៉ុបមិនអាចបន្តចាយលុយរួម ហើយចាត់ចែងថវិកាជាតិ និងនយោបាយសារពើពន្ធតាមចិត្តរៀងៗខ្លួន ដូចជាពេលបច្ចុប្បន្ននេះតទៅទៀតបានទេ។
កាលពីចុងសប្តាហ៍កន្លងទៅនេះ នាយករដ្ឋមន្រ្តីអេស្ប៉ាញបានបង្ហាញនូវជំហរគាំទ្រ ការធ្វើសមាហរ័ណកម្មនយោបាយសារពើពន្ធនេះ។ ជាទូទៅ គេសង្កេតឃើញថា បារាំង ដែលជាមហាអំណាចសេដ្ឋកិច្ចលំដាប់ទី២ នៅអឺរ៉ុប ច្រើនតែជំទាស់នឹងកំណែទម្រង់ ដែលធ្វើឲ្យបារាំងបាត់បង់អធិបតេយ្យ។ ក៏ប៉ុន្តែ ក្រោយពីលោក François Hollande ជាប់ឆ្នោតជាប្រធានាធិបតីថ្មី បារាំងទំនងជាត្រូវបន្ទន់ជំហរ ដើម្បីសម្រុះសម្រួលជាមួយអាល្លឺម៉ង់។ លោក Hollande តែងតែទាមទារចង់ឲ្យអឺរ៉ុបបោះមូលបត្របំណុលលក់រួមគ្នាក្នុងក្របខ័ណ្ឌអឺរ៉ុប (Eurobond) ដើម្បីជួយកាត់បន្ថយអត្រាការប្រាក់របស់រដ្ឋ ដែលកំពុងជួបនឹងវិបត្តិបំណុល។ ក៏ប៉ុន្តែ អាល្លឺម៉ង់តែងតែលើកឡើងថា ការបោះមូលបត្របំណុលរួមមិនអាចធ្វើទៅបានទេ ដរាបណាប្រទេសជាសមាជិកនីមួយៗនៅតែបន្តចាត់ចែងនយោបាយសារពើពន្ធដាច់ៗពីគ្នា ដូចជាពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ