ប្រអប់ខ្មៅ នៃយន្តហោះរុស្ស៊ីបាញ់ធ្លាក់ដោយតួកគី បានមកដល់ក្រុងម៉ូស្គូ
រុស្ស៊ីចេះយកបានវិញ ប្រអប់ខ្មៅនៃយន្តហោះទម្លាក់គ្រាប់បែករុស្ស៊ីធុន Su-24 បាញ់ធ្លាក់កន្លះខែមុន ដោយតួកគីនៅត្រង់ព្រំដែនស៊ីរី ហើយខ្លឹមសារសម្ងាត់នៃអ្វីៗដែលមាន ថតជាប់ក្នុងប្រអប់នេះ នឹងត្រូវធ្វើវិភាគ គឺដោយរួមជាមួយពួកអ្នកជំនាញបរទេស - សេចក្តីនេះ ថ្លែងយប់មិញ នៅវិមានក្រេមឡាំង ដោយលោកប្រធានាធិបតីរុស្ស៊ី ពូទីន។
ចុះផ្សាយនៅថ្ងៃ៖
ស្តាប់ - ០២:០២
គឺនៅវេលាម៉ោង១០យប់ថ្ងៃអង្គារទី៨ធ្នូម្សិលមិញ ដែលលោករដ្ឋមន្ត្រីការពារជាតិរុស្ស៊ី Serguei Shoigu បាននាំយកប្រអប់ខ្មៅនោះ ទៅបង្ហាញជូនលោកប្រធានាធិបតីពូទីន ក្នុងការិយាល័យការងារគាត់នៅវិមានក្រេមឡាំង។
ដោយឈរនៅពីមុខប្រអប់ខ្មៅនោះ លោកពូទីនមានប្រសាសន៍ទៅលោករដ្ឋមន្ត្រី Shoigu ៖
ក្នុងដំណាក់ឥឡូវ ខ្ញុំសូមលោកកុំបើកវាឲ្យសោះ។ បើបើកវា គឺលុះណាតែនៅពីមុខពួកអ្នកជំនាញ បរទេស។
លោកShoigu បានរៀបរាប់ជូនលោកពូទីនថា ដែនដីដែលយន្តហោះចម្បាំងរុស្ស៊ីធ្លាក់ទៅលើ ក្រោយពីរងការបាញ់ប្រហារដោយតួកគី ត្រូវបាន “រំដោះ” រួចដោយ កងកម្លាំងពិសេសរបស់ស៊ីរី ហេតុដែលអនុញ្ញាតឲ្យគេរកឃើញប្រអប់ខ្មៅនោះ នៅត្រង់តំបន់ដែលមកទល់ពេលនោះឯង គឺបានស្ថិតនៅក្រោមការកាន់កាប់ពួកឧទ្ទាមភេរវជន។
លោកប្រធានាធិបតីពូទីន បានថ្លែងថា ការធ្វើវិភាគប្រអប់ខ្មៅនោះនឹងអនុញ្ញាតឲ្យកំណត់ ផ្លូវហោះហើរ ល្បឿន កំពស់ហោះ និងកន្លែងស្ថិតនៅក្នុងអាកាសនៃយន្តហោះរុស្ស៊ី ពេលវាត្រូវ បានបាញ់បំផ្លាញ ដោយកងអាកាសតួកគី។
លោកពូទីនព្រមានថា ដោយមិនអាស្រ័យនឹងលទ្ធផលនៃការធ្វើវិភាគប្រអប់ខ្មៅនោះ ក្រុងម៉ូស្គូ នឹងពុំកែប្រែ ឥរិយាបថខ្លួនឡើយ ចំពោះទង្វើប្រព្រឹត្តដោយអាជ្ញាធរតួកគីទល់នឹងរុស្ស៊ី ដ្បិតរុស្ស៊ីតែងបានចាត់ទុក តួកគីមិនគ្រាន់តែជាមិត្តប៉ុណ្ណោះទេ តែ ក៏ជាសម្ព័ន្ធមិត្តទៅផង ក្នុងការប្រយុទ្ធ ទល់នឹងភេរវនិយម ហើយមិនបាននឹកស្មានទាល់តែសោះ ថា តួកគីស្រាប់តែក្បត់នឹងរុស្ស៊ី ដោយចាក់យើងចំពីក្រោយខ្នងតែម្តង។
ដោយឡែក ប្រភពការទូត បានឲ្យដឹងថា នៅឯក្រុមប្រឹក្សាសន្តិសុខអ.ស.ប. រុស្ស៊ី បានសុំឲ្យ លើកយកទៅពិនិត្យមើលក្រៅផ្លូវការ បញ្ហាពាក់ព័ន្ធនឹងអន្តរាគមន៍យោធានៃកងទ័ពតួកគី ចូលក្នុងដែនដី ស៊ីរី និង អ៊ីរ៉ាក់។ ជាការកត់សម្គាល់ រាល់តែកិច្ចប្រជុំក្រុមប្រឹក្សានេះ គឺ ត្រូវប្រព្រឹត្តទៅ ក្រោមអធិបតីភាព របស់ស.រ.អា. ដែលឡើងធ្វើជាប្រធានផ្លាស់វេនក្រុមប្រឹក្សា ពេញមួយខែធ្នូនេះ។ ដូចគេដឹងស្រាប់ អាមេរិក ជាសម្ព័ន្ធមិត្តតួកគីតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ