ប្រមុខការទូតអង់គ្លេស ទទួលបន្ទុកចរចាBrexit ជាមួយអឺរ៉ុប លាលែងចេញពីតំណែង
កាលពីព្រឹកថ្ងៃទី៤មករា សហភាពអឺរ៉ុបមួយទាំងមូល បានភ្ញាក់ផ្អើលយ៉ាងខ្លាំង ដោយសារលោក Ivan Rogers អគ្គរាជទូតអង់គ្លេសប្រចាំសហភាពអឺរ៉ុប បានលាលែងពីតំណែង។ គឺលោកប្រមុខការទូតរូបនេះហើយ ដែលមានតួនាទីចរចាជាមួយសហភាពអឺរ៉ុប ក្នុងសំណុំរឿងនៃការដកសមាជិកភាព របស់អង់គ្លេស ចេញពីសហភាពអឺរ៉ុប។ សូមបញ្ជាក់ថា នៅតែជាង២ខែទៀតប៉ុណ្ណោះ រដ្ឋាភិបាលអង់គ្លេស ត្រូវតែចាប់ផ្តើមនីតិវិធីផ្តាច់ខ្លួន ចេញពីសហភាពអឺរ៉ុប ហើយការចរចាគ្នាដ៏ស្មុគស្មាញ ដ៏ច្រើនជំពូកកំពុងតែរងចាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
លោក Ivan Rogers បានចូលកាន់តំណែង ជាប្រមុខការទូតចក្រភពអង់គ្លេស ប្រចាំសហភាពអឺរ៉ុប នៅខែវិច្ឆិកា ឆ្នាំ២០១៣។ គ្រប់គ្នាបានទទួលស្គាល់ពីសមត្ថភាព និងថ្វីមាត់ក្នុងការចរចារបស់លោក។ តាមធម្មតា គឺលោកនេះហើយ ដែលត្រូវទទួលបន្ទុក ចរចាជាមួយសហភាពអឺរ៉ុប ស្តីពីនីតិវីធីផ្តាច់ខ្លួន របស់អង់គ្លេស ចេញពីសហភាពអឺរ៉ុប។
ស្រាប់តែនៅព្រឹកថ្ងៃពុធទី ៤ មករា គ្រប់គ្នាមានការភ្ញាក់ផ្អើល បន្ទាប់ពីបានឮដំណឹងថា លោក Ivan Rogers បានសម្រេចចិត្តលាលែងពីតំណែង។ លោកបានសរសេរសារអ៊ីមែល ដ៏វែង ផ្ញើរទៅកាន់បុគ្គលិក និងក្រុមការងារលោក ប្រចាំនៅសហភាពអឺរ៉ុប។ តាមរយៈសារអ៊ីមែលនេះ គឺអាចយល់យ៉ាងច្បាស់ ពីហេតុផលនៃការលាលែងពីតំណែងរបស់លោក។ នោះគឺភាពមិនត្រូវគ្នា ការមានទស្សនៈវិស័យផ្សេងគ្នា រវាងលោក និងរដ្ឋាភិបាលថ្មីរបស់អង់គ្លេស ដែលដឹកនាំដោយលោកស្រី Theresa May ស្តីពីការផ្តាច់ខ្លួនរបស់អង់គ្លេស។
លោក បានសរសេរជាអាទិ៍ថា “នៅក្នុងចំណោមសមាជិកគណរដ្ឋមន្ត្រីអង់គ្លេស លោកមិនឃើញមាននរណាម្នាក់ ដែលមានបទពិសោធន៍ និងសមត្ថភាពគួរឲ្យទុកចិត្តបានទេ ជុំវិញការចរចាអន្តរភាគី ក្នុងសំណុំរឿងផ្តាច់បេក្ខភាពរបស់អង់គ្លេស ចេញពីសហភាពអឺរ៉ុប”។ លោកបន្តថា “រហូតមកទល់ពេលនេះ សូម្បីតែលោកខ្លួនឯង ដែលជាអ្នកទៅចរចា មិនទាំងដឹងថា តើអ្វីទៅជាទស្សនៈវិស័យ ជាកម្មវត្ថុពិតប្រាកដរបស់រដ្ឋាភិបាលអង់គ្លេស ស្តីពីទំនាក់ទំនងរវាងអង់គ្លេស និងសហភាពអឺរ៉ុប បន្ទាប់ពីផ្តាច់ខ្លួនចេញហើយ”។
ដោយឡែក បើផ្អែកតាមការផ្សាយរបស់កាសែត The Telegraph បានឲ្យដឹងថា ប្រភពពីរដ្ឋាភិបាលអង់គ្លេស គឺគេមិនមានអ្វីភ្ញាក់ផ្អើល និងការចុះចេញពីតំណែងរបស់លោក Ivan Rogers ទេ។ ការលាលែងនេះ ត្រូវបានគណរដ្ឋមន្ត្រីអង់គ្លេសត្រៀមទុកមុនរួចហើយ ព្រោះរដ្ឋាភិបាលអង់គ្លេស ដឹងថាIvan Rogers មិនចង់ឲ្យអង់គ្លេសដើរចេញពីអឺរ៉ុប។ រដ្ឋាភិបាលលោកស្រី Theresa May ចង់ដាក់មនុស្សថ្មី ដែលមាននិន្នាកាជឿទុកចិត្តលើកម្លាំងរបស់អង់គ្លេស ក្រោយពេលដកខ្លួនពីសហភាពអឺរ៉ុប ជាអ្នកចរចាវិញ ទើបប្រសើរ។
ក្នុងន័យនេះ គឺអាចមានន័យថា គឺរដ្ឋាភិបាលអង់គ្លេស ដែលជាអ្នកធ្វើគ្រប់យ៉ាង ដើម្បីបង្ខំឲ្យលោក Ivan Rogers លាលែងពីតំណែង។ យ៉ាងណាមិញ លោក Nick Clegg អ្នកនយោបាយអង់គ្លេសមួយរូប បានបញ្ជាក់ថា លោកគ្មានអ្វីចំលែកក្នុងចិត្តទេ ព្រោះលោកសម្លឹងឃើញថា អ្នកណាដែលមិនពេញចិត្តនឹងការដកខ្លួនរបស់អង់គ្លេសចេញពីសហភាពអឺរ៉ុប គឺត្រូវរដ្ឋាភិបាលអង់គ្លេស កំចាយចោល មិនឲ្យមានមុខក្នុងការចរចាទេ។
សូមបញ្ជាក់ថា នៅចុងខែមីនាខាងមុខនេះ គឺជាឱសានុវាទចុងក្រោយ ដែលរដ្ឋាភិបាលអង់គ្លេស ត្រូវប្រកាសចាប់ផ្តើមនីតិវិធីដកខ្លួន។ បន្ទាប់មក អង់គ្លេស និងសហភាពអឺរ៉ុបមានពេល២ឆ្នាំដើម្បីចរចាគ្នា។ បញ្ហាជាច្រើនជំពូកដែលត្រូវដោះស្រាយ ជាពិសេសទាក់ទិនទៅនឹងបញ្ហាសេដ្ឋកិច្ច ទីផ្សារដោះដូរពាណិជ្ជកម្ម រវាងអឺរ៉ុប និងអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ