ភេរវកម្មនៅព្រុចសែល៖ ដល់ពេលត្រូវបន្ទោសគ្នាទៅវិញទៅមក
ភេរវកម្មដែលបានកើតឡើងនៅក្រុងព្រុចសែល កាលពីថ្ងៃទី២២ មីនា បានធ្វើឲ្យរញ្ជួយប្រទេសបែលហ្ស៊ិក និងសហភាពអឺរ៉ុបទាំងមូល។ ភេរវកម្មនេះ បានបង្ហាញពីភាពខ្វះចន្លោះ ការធ្វើការមិនប្រទាក់ក្រឡាគ្នា រវាងអាជ្ញាធរមានសមត្ថកិច្ច ទាំងបែលហ្ស៊ិក ទាំងបារាំង និងទាំងសហភាពអឺរ៉ុបទាំងមូលតែម្តង។ លោកនាយករដ្ឋមន្ត្រីបារាំងខំសម្តែងការសហការជាមួយបែលហ្ស៊ិក ក្នុងកិច្ចការស៊ើបអង្កេត ខណៈដែលមន្រ្តីធំៗមួយចំនួនរបស់ប្រទេសទាំងពីរបានបន្ទោសគ្នាទៅវិញទៅមក។ ក្រុមស៊ើបអង្កេតប្រឆាំងភេរវកម្មបែលហ្ស៊ិក កំពុងតែត្រូវគេរិះគន់ ថាធ្វើការធ្វេសប្រហែស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
លោក Michel Sapin រដ្ឋមន្ត្រីក្រសួងហិរញ្ញវត្ថុបារាំងបានថ្លែងកាលពីថ្ងៃទី ២៣មីនា ថាភេរវកម្មនៅព្រុចសែល គឺដោយសារតែកន្លងមក បែលហ្ស៊ិកមានការធ្វេសប្រហែសពេក មើលស្រាសពួកជ្រុលនិយមអ៊ីស្លាម ទុកឲ្យពួកនេះធ្វើសំបុកក្នុងសង្កាត់ម៉ូលិនបិក។ ភ្លាមៗនោះ ស្របពេលដែលប៊ែលហ្ស៊ិក កំពុងតែកាន់ទុក្ខ មន្រ្តីមួយចំនួនរបស់បែលហ្ស៊ិក បានឆ្លើយមកវិញថា បារាំងមុននឹងមកផ្តល់មេរៀនឲ្យគេ គួរមើលចំណុចអសកម្មរបស់ខ្លួនឯង ជាមុនសិនទៅ។
ការបន្ទោសគ្នាទៅវិញទៅមក មិនមែនធ្វើឡើងតែរវាងបារាំងនិងបែលហ្ស៊ិកទេ សូម្បីតែនៅក្នុងផ្ទៃក្នុងរដ្ឋាភិបាលបែលហ្ស៊ិក ក៏មានការស្តីបន្ទោសគ្នាដែរ ជុំវិញចំណាត់ការបង្រ្កាបបណ្តាញភេរវកម្ម។ ទោះចង់មិនចង់ ហេតុការណ៍ភេរវកម្មបានកើតឡើង វាបង្ហាញពីចំណុចខ្វះចន្លោះក្នុងបេសកកម្មរបស់អាជ្ញាធរបែលហ្ស៊ិក។ ជាក់ស្តែង កាលពីថ្ងៃទី ២៣ មីនា ក្រោយភេរវកម្មមួយថ្ងៃ មានការផ្តល់ដំណឹងដោយភ័នច្រឡំ ជុំវិញអត្តសញ្ញាណភេរវករ ដែលដាក់គ្រាប់បែកបំផ្ទុះនៅព្រលានយន្តហោះ និងនៅក្នុងរថភ្លើងក្រោមដីនៅព្រុចសែល។
សូមបញ្ជាក់ថា យោងតាមការស៊ើបអង្កេតចុងក្រោយ ភេរវជនពីរនាក់ដែលបំផ្ទុះគ្រាប់បែកអត្តឃាតនៅព្រលានយន្តហោះឈ្មោះ Ibrahim El BakraouiនិងNajim Laachraoui ចំណែកជនទីបី ដែលពាក់អាវសប្រផេះ បានយកគ្រាប់បែកទៅបំផ្ទុះចោល នៅក្បែរនោះដែរ តែក្រោយពេលបន្តិច មុននឹងគេចខ្លួនបាត់។ ចំណែកភេរវជននៅក្នុងរថភ្លើងក្រោមដីឈ្មោះ Khalid El Bakraoui។ដោយឡែកនគរបាលកំពុងតាមចាប់ជនម្នាក់ទៀត ដែលគេសង្ស័យថាបានជូនជនឈ្មោះ Khalid El Bakraoui ជិះរថភ្លើងក្រោមដីដើម្បីធ្វើភេរវកម្ម។
ទាក់ទងទៅនឹងជនឈ្មោះ Ibrahim El Bakraoui ខាងអាជ្ញាធរតួកគី បានផ្តល់ដំណឹងថាគេបានបណ្តេញជននេះ ចេញពីតួកគីពីរដងរួចមកហើយ ដោយគេសង្ស័យថាជននេះ មានជាប់ពាក់ព័ន្ធជាមួយនឹងក្រុមជីហាដអង្គការរដ្ឋអ៊ីស្លាម។ តួកគី ថែមទាំងបានផ្តល់ដំណឹងនេះ ទៅឲ្យអាជ្ញាធរបែលហ្ស៊ិកទៀតផង ប៉ុន្តែនគរបាលបែលហ្ស៊ិកជាអ្នកដោះលែងជននេះ។
ដំណឹងទាំងអស់នេះ បានធ្វើឲ្យមានការងឿងឆ្ងល់ ក្នុងជួរថ្នាក់ដឹកនាំរបស់បែលហ្ស៊ិក។ នៅថ្ងៃទី២៤ មីនា ម្សិលមិញ រដ្ឋមន្រ្តីក្រសួងមហាផ្ទៃ និងរដ្ឋមន្ត្រីក្រសួងយុត្តិធម៌បែលហ្ស៊ិក បានដាក់ពាក្យសុំចុះចេញពីតំណែង។ ប៉ុន្តែសំណូមពរនេះ ត្រូវបានលោក Charles Michel នាយករដ្ឋមន្ត្រីបែលហ្ស៊ិកបដិសេធ ដោយបានសន្យាថា នឹងរកការពិតជុំវិញចំណុចនេះឲ្យឃើញ។
ជាការពិតពេលនេះ មិនមែនជាពេលត្រូវបន្ទោសគ្នាទេ។ បារាំងនិងបែលហ្ស៊ិក ត្រូវខិតខំចាប់ដៃគ្នាធ្វើកិច្ចការនេះរួមគ្នា ដើម្បីបំបែកបណ្តាញភេរវកម្មអ៊ីស្លាម។ ឆ្លងតាមការស៊ើបអង្កេត ភេរវកម្មនៅក្រុងប៉ារីសកាលពីថ្ងៃទី១៣វិច្ឆិកា ២០១៥ និងភេវរវកម្មនៅព្រុចសែល គឺធ្វើឡើងដោយក្រុមមនុស្សតែមួយ។ ដោយឡែក ជន សាឡា អាបដេស្លាម ដែលកំពុងតែជាប់ឃុំ បានប្តូរចិត្តសុំឲ្យគេឆាប់បញ្ជូនខ្លួនទៅកាន់បារាំង ឲ្យបានឆាប់ជាទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ