ស្វីស៖ ក្រោយការវាយប្រហារលើរថភ្លើង អាជ្ញាធរមិនជឿថាវាជាអំពើភេរវកម្ម
កាលពីរសៀលថ្ងៃសៅរ៍ទី១៣សីហា មានករណីវាយប្រហារមួយបានកើតឡើង ក្នុងទូរ រថភ្លើងមួយខ្សែរក្នុងប្រទេសស្វីស ដោយបុរសម្នាក់បានយកសាំងទៅចាក់បង្កជាអគ្គីភ័យ និងបានយកកាំបិតចាក់អ្នកដំណើរជាច្រើននាក់។ អ្នកធ្វើដំណើរម្នាក់ រួមទាំងជនដៃដល់ បានស្លាប់នៅក្នុងហេតុការណ៍នេះ។ ឆ្លងកាត់ការស៊ើបអង្កេត អាជ្ញាធរស្វីស បានទាត់ចោលមូលហេតុដែលថាអំពើនេះ ជាអំពើភេរវកម្មធ្វើឡើងដោយជនជ្រុលនិយមអ៊ីស្លាម។
ចុះផ្សាយនៅថ្ងៃ៖
ករណីវាយប្រហារក្នុងរថភ្លើង គឺជាករណីដ៏កម្រក្នុងប្រទេសស្វីស ហើយការវាយប្រហារបែបភេរវកម្ម រឹតតែកម្រទៅទៀតក្នុងប្រទេសនេះ។ កាលពីរសៀលថ្ងៃសៅរ៍ ទី១៣ សីហា ក្នុងរថភ្លើងស្វីសមួយខ្សែរ ពេលដែលរថភ្លើងធ្វើដំណើរជិតទៅដល់ស្ថានីយ៍ Salez ក្នុងតំបន់Saint-Gall ភាគឦសានស្វីស ស្រាប់តែមានបុរសម្នាក់ យកប្រេងសាំងមកជះទៅលើអ្នកដំណើរ នៅក្នុងទូរថភ្លើង ហើយបានកេះដែកកេះបង្កជាអគ្គីភ័យ។ បន្ទាប់មកទៀត ជនដៃដល់ បានស្ទុះយកកាំបិត ទាំងខ្លួនត្រូវភ្លើងឆេះ ទៅចាក់អ្នកដំណើរជាច្រើននាក់ ឲ្យរបួស។
តាមការផ្តល់ដំណឹងពីនគរបាលស្វីស ស្ត្រីអ្នកដំណើរម្នាក់ អាយុ៣៤ឆ្នាំ បានទទួលមរណភាព ដោយសារភ្លើងឆេះ រឺឯជនដៃដល់ត្រូវបានអ្នកដំណើរម្នាក់ដែលឈរចាំរថភ្លើងនៅស្ថនីយ៍ បានស្ទុះទៅទាញចេញមកខាងក្រៅ បន្ទាប់ពីបានឃើញភ្លើងឆេះសន្ធោសន្ធៅ ពេញខ្លួន។ ជនដៃដល់បានស្លាប់នៅមន្ទីរពេទ្យ កាលពីព្រឹកថ្ងៃអាទិត្យទី១៤សីហា។ យ៉ាងហោចណាស់ មានអ្នករបួសចំនួន៥នាក់ ដែលក្នុងនោះមានកុមារីម្នាក់អាយុ៦ឆ្នាំ ដែលរងរបួសធ្ងន់ដោយភ្លើងឆេះ និងដោយស្នាមចាក់នឹងកាំបិត។
ឆ្លងកាត់ការស៊ើបអង្កេត នគរបាលស្វីសបានឈានទៅឆែកឆេរផ្ទះរបស់ជនដៃដល់។ ជនដៃដល់ភេទប្រុស អាយុ២៧ឆ្នាំ ជាជនជាតិស្វីស ហើយមិនមានដើមកំណើតបរទេសទេ។ នគរបាលស្វីសបានបញ្ជាក់ផងដែរថា ជននេះមិនដែលធ្លាប់ប្រព្រឹត្តិបទល្មើសអ្វីទេពីមុនមក។ ដោយបានពិនិត្យទៅក្នុងរូបភាពកាមេរ៉ាសុវត្ថិភាពក្នុងរថភ្លើង ជននេះបានធ្វើសកម្មភាពតែម្នាក់ឯង ហើយទំនងមិនមានជាប់ពាក់ព័ន្ធនឹងក្រុមជ្រុលនិយមណាទេ។ មកដល់ដំណាក់កាលនេះ នគរបាលស្វីស បានទាត់ចោល ហេតុផលភេរវកម្ម ហើយសន្និដ្ឋានថា ជនដៃដល់មិនមានបំណងសម្លាប់អ្នកដំណើរណាម្នាក់ ដោយចំពោះនោះទេ។
លោក Bruno Metzger អ្នកនាំពាក្យនគរបាលជាតិស្វីស បានបញ្ជាក់ប្រាប់អ្នកយកព័ត៌មានថា ក្រុមស៊ើបអង្កេត មិនជឿថារឿងនេះជាអំពើភេរវកម្មទេ។ ផ្ទុយទៅវិញ ក្រុមការងារកំពុងផ្តោតការចាប់អារម្មណ៍ ទៅលើកត្តាចិត្តសាស្ត្រ សុខភាពផ្លូវចិត្ត និងប្រវតិ្តរបស់ជនដៃដល់ ដែលជម្រុញឲ្យជននេះ ឈានទៅធ្វើអំពើវាយប្រហារបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ