បារាំង៖ អ៊ីស្លាមនិងកាតូលិកសូត្រធម៌រួមគ្នារំឭកដល់ជនរងគ្រោះដោយភេរវកម្មអ៊ីស្លាមជ្រុលនិយម
នៅថ្ងៃអាទិត្យនេះ ៥ថ្ងៃក្រោយការវាយប្រហារភេរវកម្មអ៊ីស្លាមជ្រុលនិយម ទៅលើវិហារកាតូលិកបារាំង ពិធី ជួបជុំសាសនា និងសូត្រធម៌ ត្រូវបានគេរៀបចំធ្វើឡើង នៅតាមវិហារសាសនាកាតូលិក នៅទូទាំងប្រទេសបារាំង ដើម្បីរំឭកវិញ្ញានក្ខន្ធដល់បុព្វជិតកាតូលិក ដែលត្រូវភេរវជនអារ ក សម្លាប់។ នៅក្នុងពិធីសូត្រធម៌នេះ អ្នកកាន់សាសនាអ៊ីស្លាមត្រូវបានគេអញ្ជើញឲ្យចូលរួម ដើម្បីបង្ហាញពីការមូលសំឡេងគ្នាតែមួយ រវាងកាតូលិក និងអ៊ីស្លាម ក្នុងការប្រឆាំងនឹងទង្វើជ្រុលនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ភេរវជនអ៊ីស្លាមជ្រុលនិយមស្និទ្ធនឹងក្រុមជីហាតរដ្ឋអ៊ីស្លាម វាយប្រហារទៅលើវិហារកាតូលិក អារ ក សម្លាប់បុព្វជិតកាតូលិក... នេះគឺជាអ្វីដែលបានកើតឡើង កាលពីថ្ងៃអង្គារ នៅប៉ែកខាងជើងប្រទេសបារាំង។
ភេរវកម្មអ៊ីស្លាមជ្រុលនិយមទៅលើវិហារកាតូលិកនេះបានបង្កើតឲ្យមានក្តីបារម្ភខ្លាចនាំទៅរកការបាក់បែកគ្នា ការមិនទុកចិត្តគ្នា ឬស្អប់គ្នាទៅវិញទៅមក រវាងសហគមន៍អ្នកកាន់សាសនាកាតូលិក និងអ៊ីស្លាម នៅក្នុងប្រទេសមួយ ដែលមានប្រពៃណីទំនៀមទម្លាប់ ប្រវត្តិ និងប្រជាជនភាគច្រើនជាអ្នកកាន់សាសនាកាតូលិក តែក្នុងពេលជាមួយគ្នា ក៏ជាប្រទេសដែលមានសហគមន៍អ្នកកាន់សាសនាអ៊ីស្លាមច្រើនជាងគេបង្អស់នៅក្នុងតំបន់អឺរ៉ុបផងដែរ។
ក៏ប៉ុន្តែ គេសង្កេតឃើញថា ចាប់តាំងពីថ្ងៃអង្គារនោះមក ប្រមុខដឹកនាំសាសនាអ៊ីស្លាម និងកាតូលិកបារាំង បានបង្ហាញនូវជំហររួបរួមគ្នា នៅក្នុងការប្រយុទ្ធប្រឆាំងនឹងចលនាជ្រុលនិយម ហើយសហគមន៍អ្នកកាន់សាសនាអ៊ីស្លាមថែមទាំងបានបដិសេធមិនធ្វើពិធីបញ្ចុះសពឲ្យភេរវជន ដែលវាយប្រហារលើវិហារកាតូលិក ដើម្បីបង្ហាញពីការប្រឆាំងនឹងភេរវកម្មអ៊ីស្លាមជ្រុលនិយម។
កាលពីថ្ងៃសៅរ៍ម្សិលមិញ ពិធីដើរដង្ហែក្បួនត្រូវបានគេរៀបចំធ្វើឡើង នៅទូទាំងប្រទេសបារាំង ដោយមានការចូលរួមពីសំណាក់អ្នកកាន់សាសនាកាតូលិក និងអ្នកកាន់សាសនាអ៊ីស្លាម ដើម្បីជាការកាន់ទុក្ខដល់បុព្វជិតកាតូលិក ដែលត្រូវភេរវជនអារ ក សម្លាប់។ នៅថ្ងៃអាទិត្យនេះ ទៅតាមការអំពាវនាវរបស់ក្រុមប្រឹក្សាអ៊ីស្លាមបារាំង បណ្តាអ្នកកាន់សាសនាអ៊ីស្លាមរាប់រយនាក់ បាននាំគ្នាទៅចូលរួមក្នុងពិធីសូត្រធម៌ នៅតាមបណ្តាវិហារកាតូលិក នៅទូទាំងប្រទេសបារាំង។
ប្រធានក្រុមប្រឹក្សាអ៊ីស្លាមបារាំងបានលើកឡើងថា តាមរយៈការចូលរួមក្នុងពិធីសូត្រធម៌នៅវិហារកាតូលិក អ្នកកាន់សាសនាអ៊ីស្លាមបារាំងចង់បង្ហាញពីការចូលរួមរំលែកទុក្ខដល់អ្នកកាន់សាសនាកាតូលិកជាទូទៅផង និងជាពិសេស គឺចង់បង្ហាញឲ្យគេឃើញថា អ្វីដែលបានកើតឡើងគ្រាន់តែជាទង្វើរបស់ក្រុមជ្រុលនិយមមួយក្តាប់តូចតែប៉ុណ្ណោះ មិនមែនជាសង្រ្គាម រវាងសាសនាអ៊ីស្លាម និងសាសនាកាតូលិកនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ