អ៊ីតាលី ជម្រុញឲ្យបង្កើតកងកម្លាំងមួកខៀវ ដើម្បីសង្រ្គោះសម្បត្តិបេតិកភណ្ឌពិភពលោក
ចាប់ពីថ្ងៃព្រហស្បតិ៍ ទី៣០មីនា ម្សិលមិញ នៅទីត្រុងហ្វ្លូរ៉ង់ ប្រទេសអ៊ីតាលី មានការរៀបចំកិច្ចប្រជុំរដ្ឋមន្ត្រីក្រសួងវប្បធម៌ នៃប្រទេសអ្នកមានជាងគេទាំង៧ ដើម្បីរិះរកមធ្យោបាយ ការពារ និងសង្រ្គោះសម្បត្តិបេតិកភណ្ឌពិភពលោក ដែលបាន និងកំពុងតែរងគ្រោះដោយសារសង្រ្គាម រឺដោយសារគ្រោះធម្មជាតិ។ អ៊ីតាលី ដែលមានបទពិសោធន៍ និងភាពស្វាហាប់ជាងគេ បានសំណូមពរ ឲ្យបង្កើតកងកម្លាំងមួកខៀវពិសេស ក្នុងក្របខណ្ឌរបស់អង្គការយូណេស្កូ ដើម្បីស្រោចស្រង់ និងសង្រ្គោះសម្បតិ្តបេតិកភណ្ឌនានា ទូទាំងពិភពលោក។
ចុះផ្សាយនៅថ្ងៃ៖
ស្តាប់ - ០២:០៦
នេះគឺជាលើកទីមួយ ដែលរដ្ឋមន្ត្រីក្រសួងវប្បធម៌ នៃប្រទេសអ្នកមានទាំង៧ មានដូចជា បារាំង សហរដ្ឋអាមេរិក ជប៉ុន អាល្លឺម៉ង់ អង់គ្លេស កាណាដា និងអ៊ីតាលី បានជួបប្រជុំគ្នា ដោយមានកិច្ចសហការជាមួយនឹងអង្គការយូណេស្កូ។ ទីក្រុងហ្វ្លូរ៉ង់ ទីក្រុងបុរាណដ៏ល្បីរបស់អ៊ីតាលី បានទទួលធ្វើជាម្ចាស់ផ្ទះរៀបចំកិច្ចប្រជុំនេះ រយៈពេល២ថ្ងៃនេះ។ ដោយសារតែអ៊ីតាលី ជាអតីតអាណាចក្ររ៉ូម៉ាំង ទើបដែនដីអ៊ីតាលីទាំងមូល សំបូរទៅដោយសម្បតិ្តបេតិកភណ្ឌ ដែលការនេះ បានញ៉ាំងឲ្យអ៊ីតាលី មានបទពិសោធន៍ និងសមត្ថភាព ក្នុងការអភិរក្សការពារ។
លោករដ្ឋមន្ត្រីក្រសួងវប្បធម៌អ៊ីតាលី បានថ្លែងថា លោកចង់ប្រើប្រាស់សមត្ថភាព និងបទពិសោធន៍របស់អ្នកជំនាញអ៊ីតាលី យកទៅចូលរួមឲ្យបានសកម្ម ក្នុងការស្រោចស្រង់សម្បត្តិបេតិកភណ្ឌនានា ដែលកំពុងតែរងគ្រោះ មិនថាដោយសារសង្រ្គាម រឺដោយសារគ្រោះធម្មជាតិ។ ក្នុងន័យនេះ អ៊ីតាលី បានលើកជាសំណើរ ឲ្យបង្កើតក្រុមការងារពិសេសមួយ ហៅថា កងកម្លាំងមួកខៀវដើម្បីសង្រ្គោះសម្បត្តិបេតិកភណ្ឌ ដោយមានអង្គការសហប្រជាជាតិ និងអង្គការយូណេស្កូ ជាបង្អែក។
កងកម្លាំងពិសេសរបៀបនេះ អ៊ីតាលីបានបង្កើតរួចមកហើយ នៅឆ្នាំ២០១៦ ក្រោយពេលកើតគ្រោះរញ្ជួយដី នៅភាគកណ្តាលអ៊ីតាលី ដែលបានធ្វើឲ្យខូចខាតតំបន់ប្រវត្តិសាស្ត្រ និងអាគារបូរាណមួយចំនួន។ អ៊ីតាលី ចង់ពង្រីកការងារនេះ ជាមួយនឹងប្រទេសផ្សេង ដោយអ៊ីតាលី ធ្វើជាអ្នកបណ្តុះបណ្តាល ពីរបៀបធ្វើបេសកកម្ម សង្រ្គោះ និងការពារឲ្យទាន់ពេលវេលា។
គួរកត់សម្គាល់ថា មួយរយៈចុងក្រោយនេះ មតិសាធារណៈមានការចាប់អារម្មណ៍ខ្លាំង ទៅលើការបំផ្លេចបំផ្លាញសម្បត្តិបេតិកភណ្ឌពិភពលោក តួយ៉ាងដូចជាតំបន់ទីក្រុងបុរាណប៉ាល់មៀរ ដែលបានស្ថិតក្នុងដៃរបស់ក្រុមជីហាតអង្គការរដ្ឋអ៊ីស្លាម ហើយតំបន់នេះ ត្រូវបានរងខូតខាតយ៉ាងតំណំ។ ក្រៅពីនេះ នៅមានទីក្រុងបុរាណ ជាច្រើនកន្លែងនៅអ៊ីរ៉ាក់ ក៏ដូចជានៅយេម៉ែន ដែលបានរងការបំផ្លេចបំផ្លាញ ដោយស្នាដៃជនជ្រុលនិយម រឺដោយសារសង្រ្គាម។
អង្គការយូណេស្កូ ក៏ដូចជាអ៊ីតាលី មានបំណងជំរុញឲ្យកិច្ចប្រជុំ ក្រសួងវប្បធម៌នៃប្រទេសអ្នកមានទាំង៧នាពេលនេះ រួមគ្នាកំណត់គោលនយោបាយរួម ក្នុងក្របខណ្ឌអន្តរជាតិ ដើម្បីលើកជាគម្រោងការពារ ស្រោចស្រង់សម្បត្តិបេតិកភណ្ឌ ដែលបាននឹងកំពុងប្រឈមមុខនឹងការបាត់បង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ