ផែនការសង្រ្គោះក្នុងទឹកប្រាក់ ៧៥ម៉ឺនលានអឺរ៉ូ ដើម្បីស្រោចស្រង់រូបិយវត្ថុអឺរ៉ុប
ទីបំផុតទៅ សហភាពអឺរ៉ុបបានអនុម័តផែនការសង្គ្រោះមួយដែលទឹកប្រាក់៧៥ម៉ឺនលានអឺរ៉ូ ដើម្បីស្រោចស្រង់រូបិយវត្ថុអឺរ៉ុប។គឺជា ប្រាក់បម្រុងទុកសម្រាប់ជួយសង្គ្រោះប្រទេសសមាជិក នៅក្នុងតំបន់ចាយប្រាក់អឺរ៉ូដែលជួបវិបត្តិសេដ្ឋកិច្ច ដូចករណីប្រទេសក្រិកនាពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគន៍របស់ គួច គន្ធារ៉ា
កិច្ចព្រមព្រៀងទើបតែបានអនុម័ត នៅប្រមាណជាម៉ោង ២ភ្លឺ យប់ថ្ងៃអាទិត្យ ទី៩ ឧសភា ឆ្លងចូលថ្ងៃច័ន្ទ ទី១០ ឧសភានេះ។ ជាកិច្ចព្រមព្រៀងដែលបានអនុម័តឡើង ក្រោយពីបានជជែក ដេញដោលគ្នាអស់រយៈពេលជាង ៨ម៉ោងរវាងរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុនៃប្រទេសសមាជិកអឺរ៉ុបទំាង ២៧ប្រទេស។ នៅក្នុងចំនួនទឹកប្រាក់ទំាង ៧៥ម៉ឺនលានអឺរ៉ូហ្នឹង មាន ៥០ម៉ឺនលានអឺរ៉ូ ជាការរួមចំណែករបស់ប្រទេសសមាជិកសហភាពអឺរ៉ុប និងនៅសល់ ២៥ម៉ឺនលានអឺរ៉ូទៀត ជាការរួមចំណែករបស់មូលនិធិរូបិយវត្ថុអន្តរជាតិ ដែលយើងហៅកាត់ជាភាសាបារំាងថា FMI។
នៅក្នុងមូលនិធិរួមរបស់សហភាពអឺរ៉ុបដែលមានទឹកប្រាក់ចំនួន ៥០ម៉ឺនលានអឺរ៉ូ មាន៦ម៉ឺនលានអឺរ៉ូជាប្រាក់កម្ចីរបស់គណៈកម្មការអឺរ៉ុប និងនៅសល់ចំនួន ៤៤ម៉ឺនលានអឺរ៉ូទៀត គឺជាការរួមចំណែករបស់ប្រទេសសមាជិកនៅក្នុងតំបន់ចាយប្រាក់អឺរ៉ូ។
នៅក្នុងចំណោមសមាជិកសហភាពអឺរ៉ុបទំាង ២៧ប្រទេស មានតែ១៦ប្រទេសប៉ុណ្ណោះដែលចាយប្រាក់អឺរ៉ូ។ ប្រាក់បម្រុងរបស់គណៈកម្មការអឺរ៉ុបមានតំាងពីយូរមកហើយ និងមានទឹកប្រាក់ជាប្រចំាចំនួន ៥០ម៉ឺនលានអឺរ៉ូ។ ប្រាក់នេះទុកសម្រាប់ជួយប្រទេសសមាជិកណាមួយដែលជួបការលំបាកផ្នែកហិរញ្ញវត្ថុដោយមិនកំណត់ពេលវេលាទេ តែមិនមែនសម្រាប់ជួយប្រទេសដែលនៅក្នុងតំបន់ចាយប្រាក់អឺរ៉ូឡើយ។ តែចាប់ពីពេលនេះតទៅ សហភាពអឺរ៉ុបបានសម្រេចដំឡើងទឹកប្រាក់ជាប្រចំារហូតដល់ចំនួន ១១ម៉ឺនលានអឺរ៉ូ និងទុកសម្រាប់ជួយគ្រប់សមាជិកទំាងអស់ ដោយរួមទំាងប្រទេសក្នុងតំបន់ចាយប្រាក់អឺរ៉ូដែរ។ នេះជាចំនុចថ្មីដែលបានបន្ថែមលើលក្ខខណ្ឌនៃប្រាក់កម្ចីរបស់គណៈកម្មការអឺរ៉ុប។
និយាយពីប្រាក់បម្រុងចំនួន ៤៤ម៉ឺនលានអឺរ៉ូវិញ គឺជាហិបប្រាក់រួមមួយដែលទើបបង្កើតថ្មី និងចូលរួមដោយប្រទេសសមាជិកណាដែលចាយប្រាក់អឺរ៉ូ ដោយកំណត់រយៈពេល៣ឆ្នំាម្តង។ គោលដៅនៃការបង្កើតហិបប្រាក់រួមនេះឡើង គឺដើម្បីជួយស្រោចស្រង់ប្រទេសសមាជិកណាមួយនៅក្នុងតំបន់ចាយប្រាក់អឺរ៉ូដែលកំពុងជួបវិបត្តិហិរញ្ញវត្ថុ។ ជាការជួយស្រោចស្រង់ ក្រោមទ្រង់ទ្រាយជាប្រាក់កម្ចី មានការប្រាក់ និងមានលក្ខខណ្ឌត្រឹមត្រូវ។
ធនាគារកណ្តាលអឺរ៉ុបចេញមុខការពាររូបិយវត្ថុអឺរ៉ុប
រហូតមកទល់ពេលនេះ និងតំាងពីវិបត្តិហិរញ្ញវត្ថុបានផ្ទុះឡើងនៅក្នុងប្រទេសក្រិកមក ធនាគារបានបិទមាត់ មិននិយាយអ្វីទំាងអស់។ តែប៉ុន្មាននាទី ក្រោយពីសហភាពអឺរ៉ុបបានអនុម័តផែនការសង្គ្រោះភ្លាម ធនាគារកណ្តាលអឺរ៉ុបបានចេញមុខប្រកាសថា ខ្លួននឹងចាត់វិធានការមួយចំនួនដើម្បីការពាររូបិយវត្ថុអឺរ៉ុប។
វិធានការទំាងនោះរួមមាន ការទិញយកបំណុលសាធារណៈ និងឯកជនរបស់ប្រទេសណាមួយ នៅក្នុងតំបន់ចាយប្រាក់អឺរ៉ូដែលគ្មានលទ្ធភាពសងបំណុលគេ។ ជាក់ស្តែងប្រទេសក្រិក តែគេនៅមិនទាន់ដឹងអំពីចំនួនទឹកប្រាក់ដែលធនាគារកណ្តាលអឺរ៉ុបត្រូវទិញពីប្រទេសក្រិកនោះទេ។ អ្វីដែលគេដឹង នេះជាលើកទីមួយហើយដែលធនាគារកណ្តាលអឺរ៉ុបបានចេញមុខជួយប្រទេសក្រិកផង និងធានាឲ្យទីផ្សារភាគហ៊ុនមានស្ថិរភាពផង។
នៅថ្ងៃនេះ និងក្រោយពីស្គាល់ភាពច្របូកច្របល់ នាប៉ុន្មានថ្ងៃចុងក្រោយនេះមក តម្លៃភាគហ៊ុននៅអាស៊ី និងនៅអឺរ៉ុបបានចាប់ផ្តើមស្ទុះឡើងគួរឲ្យកត់សម្គាល់។ ជាក់ស្តែងទីក្រុងតូក្យូ ប្រទេសជប៉ុន តម្លៃភាគហ៊ុនបានកើន ១,៦ % នៅពេលបិទទ្វារ។ ចំណែកឯហាងឆេងតម្លៃប្រាក់អឺរ៉ូវិញ ១អឺរ៉ូដូរបាន ១ដុលា្លរ ៣០សេន កាលពីព្រឹកថ្ងៃច័ន្ទ ទី១០ ឧសភានៅទីផ្សារក្នុងទីក្រុង New York។
កាលពីថ្ងៃសុក្រ ទី៧ ឧសភាកន្លងមក ១អឺរ៉ូដូរបានតែ១ដុល្លារ ២៧សេនប៉ុណ្ណោះ។ នៅទ្វីបអឺរ៉ុប គ្រាន់តែទីផ្សារភាគហ៊ុនបានបើកទ្វារភ្លាម តម្លៃភាគហ៊ុនបានស្ទុះឡើងយ៉ាងគំហុកតែម្តង នៅទីក្រុងឡុង ប្រទេសអង់គ្លេសបានកើនឡើង ៥ % នៅទីក្រុងបារីស ប្រទេសបារំាង និងទីក្រុងប្រ៊ុចសែល ប្រទេស Belgique តម្លៃភាគហ៊ុនបានកើនជាង ៨ %។ ប្រសើរជាងគេគឺនៅទីផ្សារភាគហ៊ុនក្នុងទីក្រុង Lisbonne ប្រទេស Portugal ដែលតម្លៃភាគហ៊ុនបានកើនឡើងជិត ១០%។ ឃើញថា ទោះបីជាគេនូវមិនទាន់ដឹងអំពីប្រសិទ្ធិភាពនៃផែនការសង្គ្រោះរបស់សហភាពអឺរ៉ុបក៏ដោយ ក៏យ៉ាងហោចណាស់បានរំងាប់ភាពច្របូលច្របល់នៅលើទីផ្សារភាគហ៊ុនក្នុងពិភពលោកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ