កីឡាអូឡាំពិកឆ្នាំ២០១៤ នៅប្រទេសរុស្ស៊ី គំរាមដោយពួកភេរវជន
ក្នុងសម័យប្រជុំនៃថ្នាក់ដឹកនាំស្ថាប័នចារកិច្ច សន្តិសុខ មហាផ្ទៃ មកពីបណ្តារដ្ឋនានាដែលជាដៃគូរបស់រុស្ស៊ី ខាងប្រយុទ្ធទល់នឹងភេរវនិយម រដ្ឋមន្ត្រីក្រសួងសន្តិសុខរុស្ស៊ី ហៅកាត់ថា FSB ដែលស្នងតំណែងពីអតីត KGB សូវៀត គឺលោក Alexandre Bortnikov បានថ្លែងថា កីឡាអូឡាំពិក នៅរុស្ស៊ីអាចត្រូវគំរាមដោយពួកភេរវជន។ សម័យប្រជុំនេះ ចាប់ផ្តើមព្រឹកមិញ នៅឯក្រុង Ekaterinbourg របស់រុស្ស៊ីចម្ងាយប្រមាណ ១.៤០០គ.ម.ខាងកើតរដ្ឋធានីម៉ូស្គូ និងបន្ត រហូតដល់ថ្ងៃទី ៥មិថុនា ខានស្អែក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់កែវ ឆាយាពី ទីក្រុងម៉ូស្កូ
ដើម្បីងាយយល់អំពីគ្រោះថ្នាក់ដែលបង្ហើបឲ្យឃើញ តាមរយៈសេចក្តីថ្លែងការណ៍ថ្ងៃនេះរបស់លោកប្រធានស្ថាប័នសន្តិសុខរុស្ស៊ី គួរនិយាយជាបឋម អំពីស្ថានភាពភូមិសាស្ត្រ នៃទីកន្លែងដែលកីឡាអូឡាំពិករដូវត្រជាក់ ឆ្នាំ២០១៤ ដែលត្រូវប្រព្រឹត្តិទៅនៅ បុរីរមណីយដ្ឋាន Sochi របស់រុស្ស៊ី។
Sochiស្ថិតនៅមាត់សមុទ្ទខ្មៅជាប់នឹងតំបន់ភ្នំកូកាសខាងជើង ជាទីដែលតាមការសារភាពទទួលស្គាល់ដោយអាជ្ញាធររុស្ស៊ីផ្ទាល់ នៅមានពួកជនប្រដាប់អាវុធខុសច្បាប់ ខ្ទង់៥០០នាក់ នៅសកម្មនៅឡើយ ក្នុងសាធារណរដ្ឋចំណុះសហព័ន្ធរុស្ស៊ីបែបយ៉ាង Daguestan Ingouchie និងTchetchenie។ ជនទាំងនោះតែងត្រូវ លោកប្រធានាធិបតីរុស្ស៊ី Medvedev ហៅដោយចំៗ ថា ជាពួកភេរវជន ហើយគាត់តែងច្រានចោលដាច់អហង្កា កាលណាពួកអ្នកកាសែតបស្ចិមលោកហៅ ពួកនោះថា ជាពួកបះបោរ ពួកឧទ្ទាម។
ក្នុងអនុសាសន៍ធ្វើទៅមេសន្តិសុខជាតិរុស្ស៊ី លោក Medvedev តែងសង្កត់ធ្ងន់ថា ក្នុងប្រតិបត្តិការស្វែងរកចាប់ពួកនោះ បើសិនជាវាហ៊ានតដៃ នោះគឺ ត្រូវកំទេចចោលដោយកុំប្រណីសោះឡើយ។
ដោយរំលេចអំពីជោគជ័យនៃប្រតិបត្តិការនេះ លោក Bortnikov ប្រធានស្ថាប័នសន្តិសុខរុស្ស៊ី បានថ្លែងថ្ងៃនេះថា គិតពីដើមឆ្នាំនេះមក ក្នុងប្រទេសរុស្ស៊ីមានបញ្ចៀសកុំឲ្យប្រព្រឹត្តទៅកើត គឺ ឧក្រិដ្ឋកម្មភេរវនិយមចំនួនដល់ទៅ ២៣លើក ដោយថែមទាំង ចាប់បានពួកចោរព្រៃ និងគ្នីគ្នា សរុបទៅជាង ២៥០នាក់ទៅផង រួចតួលេខនេះ ក៏ជាផ្លែផ្កានៃពត៌មានទទួលបានទាន់ពេលវេលាពីដៃគូនានារបស់រុស្ស៊ី នៅបរទេស។ មិនតែប៉ុណ្ណោះ ស្ថាប័នសន្តិសុខរុស្ស៊ី ចេះទប់ស្កាត់មិនឲ្យដឹកមកនូវធាតុផ្ទុះTNT ដល់ទៅ ១២គីឡូក្រាម ដែលពួកភេរវជនគ្រោងបំផ្ទុះក្នុង រដ្ឋធានីម៉ូស្គូ។
តាមប្រសាសន៍ លោកBortnikov ក្រោយពីមានការគំរាមពីខាងអង្គការភេរវនិយមអន្តរជាតិ Al -Qaeda ជាលើកទី១ ក្នុងប្រវត្តិសាស្ត្រ គេបានបង្ខំចិត្តលុបទៅវិញ ការប្រណាំងរថយន្ត Rallye Dakar ឆ្នាំ ២០០៨។ ឥឡូវ ពួកភេរវជនគ្រោងលើក Scenario នេះមកអនុវត្ត នៅនឹង កីឡាអូឡាំពិករដូវត្រជាក់ ឆ្នាំ២០១៤ នៅប្រទេសរុស្ស៊ីផងដែរ។ ក្នុងផ្ទៃនេះ ដើម្បីប្រឈមមុខទល់នឹងភេរវនិយមអន្តរជាតិ តាមមតិរដ្ឋមន្ត្រីសន្តិសុខរុស្ស៊ី គឺ ទាមទារពីសហគមន៍ពិភពលោកឲ្យរួមកម្លាំងគ្នាជាធ្លុងមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ