ប្រធានាធិបតីបារាំងភ្ជាប់រឿងបទល្មើសទៅនឹងបញ្ហាអន្តោប្រវេសន៍
ប្រមុខរដ្ឋបារាំងបានប្រកាសចំណាត់ការកណ្តាប់ដៃដែកថ្នាក់ជាតិប្រឆាំង នឹងក្រុមជនពាល ដោយសន្យាពង្រឹងវិធានការក្តៅបង្រ្កាបអំពើបទល្មើសទាំងឡាយក្នុង ប្រទេសបារាំង។ ការថ្លែងដូច្នេះរបស់ប្រធានាធិបតី បារាំងធ្វើឡើងឆ្លើយតបទៅនឹងការគម្រាមសម្លាប់ប៉ូលិសដែលធ្វើឡើង ដោយជនពាលក្នុងខេត្តGrenoble។ នៅក្នុងឱកាសតែងតាំងចៅហ្វាយខេត្តGrenoble កាលពីថ្ងៃសុក្រម្សិលមិញ ប្រធានាធិបតីបារាំងបានសំដែងការខកចិត្តផងដែចំពោះបរាជ័យនយោបាយ សមាហរណកម្មរបស់ជនអន្តោប្រវេសន៍ក្នុងសង្គមបារាំងក្នុងរយៈពេល ៥០ឆ្នាំចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
ប្រធានាធិបតីបារាំង លោក នីកូឡា សាកូហ្សី Nicolas Sarkozyមិនចង់ទៅខេត្ត Grenoble ដោយឥតប្រយោជន៍ទេ។ អមទៅដោយរដ្ឋមន្រ្តីសំខាន់ៗខាងផ្នែកយុត្តិធម៌ និងមហាផ្ទៃ ប្រមុខរដ្ឋបារាំងបានថ្លែងថា លោកសុំឲ្យគេដកសញ្ញាតិបារាំងពីជនបរទេសណាដែលហ៊ានប៉ះពាល់ដល់ជីវិតប៉ូលិស កងអាវុធហត្ថដែលកំពុងធ្វើការតាមតួនាទីរបស់ខ្លួន។ ជនពាល ពួកយូកូងជាពាក្យដែលប្រធានាធិបតីបារាំងប្រើនៅសំដៅពួកក្រុមដែលបានបង្កហិង្សានៅ Grenoble។
សង្រ្គាមថ្នាក់ជាតិប្រឆាំងពួកឧក្រិដ្ឋជនបានធ្វើឡើង បន្ទាប់ពីមានក្រុមជនពាលបានប្រកាសគំរាមសម្លាប់ប៉ូលិស នៅGrenoble។ Grenobleជាទីដែលមានព្រឹត្តិការណ៍ហិង្សាដុតឡាន ក្នុងក្រុងអស់រយៈពេល៣ថ្ងៃ ក្រោយពីមានចោរប្លន់កាស៊ីណូម្នាក់ត្រូវប៉ូលិសបាញ់សម្លាប់ កាលពីពាក់កណ្តាលខែកក្កដា។
មួយវិញទៀត ប្រធានាធិបតី បារាំងបានបញ្ជាក់ថា នៅបវេសនកាលខាងមុខនេះ សភានឹងពិភាក្សាលើអត្ថបទស្តីពីទោសជាប់ពន្ធនាគារចំនួន ៣០ឆ្នាំ ដោយមិនមានការបន្ថយទោស សម្រាប់ជនណាដែលបានសម្លាប់ប៉ូលិស។
ម្យ៉ាងទៀត ដោយថ្លែងពីការដកសញ្ជាតិនេះ ប្រធានាធិបតីបារាំងហាក់កំពុងចង់ភ្ជាប់សកម្មភាពបទល្មើសទៅនឹងបញ្ហាជនអន្តោប្រវេសន៍ក្នុងប្រទេសបារាំង។ សម្រាប់ប្រធានាធិបតីបារាំង នយោបាយធ្វើសមាហរណកម្មជនអន្តោប្រវេសន៍ក្នុងសង្គមបារាំងបានទទួលបរាជ័យ។ លោកនីកូឡា សាកូហ្សីបានថ្លែងថា ក្មេងជំនាន់ក្រោយដែលកើត ក្នុងប្រទេសបារាំង ចេញពីឪពុកម្តាយអន្តោប្រវេសន៍ មានអារម្មណ៍តិចណាស់ថា ពួកគេមិនមែនជាជនជាតិបារាំង។ហើយបើតាមរូបលោក យុវជនដែលជាកូនរបស់ជនអន្តោប្រវេសន៍ក្នុងប្រទេសបារាំង មិនត្រូវទទួលបានកាតសញ្ជាតិបារាំង នៅអាយុ១៨ឆ្នាំទេ ប្រសិនបើពួកគេបានប្រព្រឹត្តិបទល្មើស។
វាជាលើកទី មួយក្នុងអាណត្តិរបស់ខ្លួន ដែលលោកនីកូឡា សាកូហ្សី Nicolas Sarkozyបានថ្លែងចំៗដោយភ្ជាប់បញ្ហាអន្តោប្រវេសន៍ ទៅនឹងអំពើបទល្មើស ក្នុងប្រទេសបារាំង។ ការថ្លែងបែបនេះ បានបង្កឲ្យមានការរិះគន់ពីគណបក្សប្រឆាំង និងក្រុមសិទ្ធិមនុស្សដែលយល់ថា វិធានការនេះនឹងបង្កឲ្យមានការរើសអើងទៅលើជនអន្តោប្រវេសន៍ដែលកំពុងរស់នៅក្នុងប្រទេសបារាំង។ សម្រាប់គណបក្សប្រឆាំង លោកនីកូឡា សាកូហ្សីកំពុងកេងចំណេញធ្វើយុទ្ធនាការដើម្បីគណបក្សខ្លួនសម្រាប់ការបោះឆ្នោតឆ្នាំ ២០១២ខាងមុខនេះ។ គណបក្សប្រឆាំងនិយាយបែបចំអកថា តើរដ្ឋាភិបាលអាចប្រយុទ្ធប្រឆាំងនឹងក្រុមជនពាលយ៉ាងម៉េច បើរដ្ឋាភិបាលនៅតែកាត់បន្ថយចំនួនប៉ូលិសក្នុងទូទាំងប្រទេសនោះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ