ក្នុង១៥ឆ្នាំទៀត ប្រជាជន២ភាគបីនៃភពផែនដីអាចនឹងខ្វះទឹកស្អាតប្រើប្រាស់
នៅក្នុងពិភពលោកបច្ចុប្បន្ន ការកើនឡើងនៃទឹកកខ្វក់កំពុងដើរទន្ទឹមគ្នានឹងការខ្វះទឹកស្អាត។ បញ្ហានេះនឹងត្រូវគេលើកយកទៅពិភាក្សានៅក្នុងសន្និសីទ “សប្តាហ៍ទឹកក្នុងភពផែនដី” ដែលត្រូវរៀបចំចាប់ពីថ្ងៃអាទិត្យទី ៥ ដល់ថ្ងៃទី ១១កញ្ញានេះ នៅទីក្រុងស្តុកខូម Stockholmប្រទេសស៊ុយអែដ។ អ្នកជំនាញខាងទឹកមកពីប្រទេស ១៣០ ចំនួន ២៥០០នាក់ នឹងចូលរួមនៅក្នុងសន្និសីទលើកទី ២០។
ចុះផ្សាយនៅថ្ងៃ៖
សេចក្តីរាយការណ៍របស់ឈាង បុប្ផា
ការឡើងកំដៅនៃភពផែនដី តម្រូវការទឹកខ្ពស់សម្រាប់វិស័យកសិកម្ម និងឧស្សាហកម្ម កំពុងតែធ្វើឲ្យទឹកសម្រាប់ប្រជាជនប្រើប្រាស់កាន់តែហោចទៅៗ ពីមួយថ្ងៃ ទៅមួយថ្ងៃ។ សម្រាប់អ្នកជំនាញ និងអ្នករៀបចំសន្និសីទ ស្ថានភាពនេះ កាន់តែគួរឲ្យព្រួយបារម្ភ ជាពិសេស នៅពេលដែលគេសង្កេតឃើញថា ទឹកកខ្វក់ដោយសារវិស័យឧស្សាហកម្មកើនឡើង មិនឈប់ ក្នុងពិភពលោកទាំងមូល។
វិទ្យាស្ថានទឹកអន្តរជាតិដែលមានមូលដ្ឋាន នៅទីក្រុងស្តុកខូម បានវាយតម្លៃថា ក្នុងមួយថ្ងៃ សំរាមជាង២លានតោនដែលមនុស្សប្រើប្រាស់ ត្រូវគេចាក់ចោលទៅក្នុងទឹកស្ទឹង ទន្លេ បឹងបួរ និងសមុទ្រ។ ស្ថានភាពកាន់តែអាក្រក់ទៅទៀត នៅក្នុងប្រទេសកំពុងអភិវឌ្ឍន៍។ ប្រទេសដែលកំពុងមានឧស្សាហកម្មឈានមុខទាំងនេះបាន និងកំពុងបោះចោល ៧០ភាគរយនៃសំរាមឧស្សាហកម្មរបស់ខ្លួនទៅក្នុងទឹក ដោយមិនបានឆ្លងការច្រោះចម្រាញ់ ទៅតាមខ្នាតអន្តរជាតិ។
ម្យ៉ាងទៀត អ្នកជំនាញរកឃើញថា ការឡើងកំដៅនៃភពផែនដីបច្ចុប្បន្នបានធ្វើឲ្យអាកាសធាតុប្រែប្រួល គឺ បណ្តាលឲ្យមានទឹកជំនន់នៅតំបន់ខ្លះ ចំណែកតំបន់ខ្លះទៀតជួបប្រទះនឹងគ្រោះរាំងស្ងួតយ៉ាងខ្លាំង។
ទឹកកខ្វក់កើនឡើងបានធ្វើឲ្យប្រជាជនអាចទទួលទឹកស្អាតប្រើប្រាស់តិចតួច និងជួបប្រទះបញ្ហាសុខភាព។ អង្គការចំណីអាហារ និងកសិកម្មរបស់អង្គការសហប្រជាជាតិ បានប្រមើលមើលទុកមុនថា ក្នុងរយៈពេល១៥ឆ្នាំទៀត ប្រជាជនជិត២ពាន់ (១,៨) លាននាក់នៅតំបន់ខ្លះ នឹងអាចខ្វះខាតទឹកប្រើប្រាស់យ៉ាងធ្ងន់ធ្ងរ។ ចំណែក ២ភាគ៣នៃប្រជាជនក្នុងភពផែនដីនឹងអាចខ្វះទឹកប្រើប្រាស់ជាទូទៅ។
អ្នកជំនាញមិនទាន់បានលើកឡើងពីដំណោះស្រាយណាមួយនៅឡើយទេ ដូច្នេះ គេនៅរង់ចាំមើលលទ្ធផលក្រោយការពិភាក្សាគ្នា ថា តើអ្នកជំនាញនឹងផ្តល់អនុសាសន៍យ៉ាងណាខ្លះដើម្បីកុំឲ្យពិភពលោកជួបគ្រោះខ្វះទឹកប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ