ការបោះឆ្នោតសភាដែលពួកស្តាំនិយមមានភ័ព្វច្រើននឹងឈ្នះ
ប្រជាជនស៊ុយអែដ នៅថ្ងៃអាទិត្យ១៩កញ្ញានេះ ត្រូវជ្រើសរើសសភាថ្មី។ ស្របតាមការស្ទង់មតិ ជ័យជំនះរបស់ពួកកណ្តាលនិយមលំអៀងទៅខាងស្តាំដែលផុតអាណត្តិ អាចត្រូវគំរាមនិងស្មុគស្មាញដោយការមកដល់សភានៃពួកស្តាំនិយមជ្រុលកំពុងរីកចម្រើនខ្លាំង។
ចុះផ្សាយនៅថ្ងៃ៖
សេចក្តី រាយការណ៍របស់វីនស្តុន រតនា
លោកនាយករដ្ឋមន្ត្រីFredrik Reinfeldt អាយុ៤៥ឆ្នាំប្រាថ្នាខ្លាំងណាស់ចង់ណែនាំបក្សសម្ព័ន្ធគាត់ផ្សំឡើងដោយ៤គណបក្ស នៅក្នុងអាណត្តិទីពីររយៈពេល៤ឆ្នាំដែលជាករណីមានជាលើកទី១ សំរាប់រដ្ឋាភិបាលស្តាំនិយមជិតមួយសតវត្សមកហើយ។
ជ័យជំនះរបស់គាត់ សំរាប់ពួកអ្នកសង្គម-ប្រជាធិបតេយ្យគឺជាការផ្តាច់ នៅក្នុងការកាន់អំណាច នៅស៊ុយអែដជាទីដែលគេបានលេចត្រដែតជាងគេ នៅលើឆាកនយោបាយ ក្នុងអំឡុងពេល៨០ឆ្នាំចុងក្រោយនេះនិងត្រូវចាត់ជាអ្នករក្សាការពាររដ្ឋស៊ុយអែដឩបត្ថម្ភដ៏ល្បីល្បាញ។
ការស្ទង់មតិបួនចុះផ្សាយ នៅថ្ងៃសៅរ៍ម្សិលមិញ ឱ្យបក្សសម្ព័ន្ធរបស់លោកនាយករដ្ឋមន្ត្រីមានប្រៀបពី៣ទៅ៩ពិន្ទុឈ្នះលើបក្សសម្ព័ន្ធឆ្វេងនិយម។
មេខ្លោងនៃពួកអ្នកសង្គម-ប្រជាធិបតេយ្យនិងជាមេដឹកនាំគណបក្សជំទាស់គឺលោកស្រីMona Sahlin អាយុ៥៣ឆ្នាំ បានអះអាងជាថ្មី នៅថ្ងៃសៅរ៍ម្សិលមិញអំពីក្តីសង្ឃឹមរបស់ខ្លួនចង់ក្លាយទៅជាស្ត្រីទី១ដែលជាប្រមុខរដ្ឋាភិបាលនៅស៊ុយអែដ។ “ សូមកុំបោះឆ្នោត ដើម្បីធ្វើឱ្យបាត់បង់ទៅ រដ្ឋស៊ុយអែដឩបត្ថម្ភ។អ្វីដែលយើងលក់និងលុបបំបាត់ចោល យើងនឹងពុំរកវាឃើញឡើងវិញជាដាច់ខាត “ នេះជាសំដីគាត់ថ្លែងតាមទូរទស្សន៍។
ជនជាតិស៊ុយអែដដែលមានសិទ្ធិបោះឆ្នោតចំនួន៧លាន១សែននាក់ដែលភាគច្រើនជាយុវជនបោះឆ្នោតជាលើកទីមួយ ត្រូវជ្រើសរើសអ្នកតំណាងរាស្ត្រ៣៤៩នាក់នៃរដ្ឋសភាRiksdag។
មានអ្នកទៅបោះឆ្នោតចំនួន៨២%លើកមុន នៅឆ្នាំ២០០៦។នៅលើកនេះ មានជនចំនួនជិត២លាន២សែននាក់បានបោះឆ្នោតជាមុន នៅល្ងាចមិញទល់នឹងចំនួន១លាន៨សែននាក់ នៅខណៈដដែល នៅឆ្នាំ២០០៦។
ប្រធានបទធំនៃយុទ្ធនាការឃោសនាបោះឆ្នោតដែលត្រូវបានបិទបញ្ចប់ទៅហើយគឺសេដ្ឋកិច្ចនិងអនាគតនៃរដ្ឋជាអ្នកឩបត្ថម្ភ។
ប៉ុន្តែលោកFredrik Reinfeldt និងលោកស្រីMona Sahlin បានសង្កត់ធ្ងន់ ជាពិសេស ទៅលើសារៈសំខាន់នៃការទទួលបានអាសនៈភាគច្រើន សំរាប់រដ្ឋាភិបាល ដើម្បីទប់ទល់ដំណើររុលទៅមុខនៃពួកស្តាំនិយមជ្រុលគឺពួកអ្នកប្រជាធិបតេយ្យស៊ុយអែដដែលការស្ទង់មតិទស្សន៍ទាយថានឹងបានទទួលសំឡេងឆ្នោតលើសពី៤%ទល់នឹង២,៦%នៅឆ្នាំ២០០៦ ដើម្បីចូលទៅក្នុងរដ្ឋសភា។
“ សូមកុំធ្វើឱ្យស៊ុយអែដទទួលរងបទពិសោធន៍នេះ។សូមធ្វើយ៉ាងណា ដើម្បីកុំឱ្យពួកគេមានអំណាចអ្វីសោះ “ -នេះជាសំណូមពររបស់លោកReinfeldtថ្លែងនៅថ្ងៃសៅរ៍ម្សិលមិញ នៅឱកាសប្រជុំmeetingចុងក្រោយ នៅរដ្ឋធានីStockholm។
ពីព្រោះ សូម្បីតែបានប៉ុន្មានអាសនៈក៏ដោយ ក៏គណបក្សស្តាំនិយមជ្រុលអាចធ្វើឱ្យរាំងស្ទះ នៅក្នុងរដ្ឋសភាដែលផ្សំឡើងដោយគណបក្សតូចតាចភាគតិច។ទាំងលោកReinfeldt ក៏ដូចជាលោកស្រីSahlin បានបដិសេធទាត់ចោលរាល់ទស្សនវិស័យព្រមព្រៀងគ្នាជាមួយពួកអ្នកប្រជាធិបតេយ្យស៊ុយអែដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ