លោកប្រធានាធិបតី Loukachenko ឈ្នះឆ្នោតទៀតហើយ ឈ្នះជាលើកទី៤
ប៉ុន្តែពួកបេក្ខជនខាងបក្សប្រឆាំង នាំគ្នាចាត់ទុកជ័យជំនះនេះ ថាជាការក្លែងបន្លំសន្លឹកឆ្នោត ហើយទាមទារឲ្យធ្វើការបោះឆ្នោតថ្មី ដោយគ្មានរូបលោក Loukachenko ចូលប្រឡូកទៀតឡើយ។ បាតុកម្មល្ងាចមិញ បានត្រូវកម្លាំងរបស់អាជ្ញាធរបង្ក្រាបគ្មានប្រណីហើយចាប់ឃុំឃាំងនរណាដែលហ៊ានតដៃ។ ចំណែកបេក្ខជនខាងបក្សប្រឆាំងប៉ុន្មាននាក់ក៏បានត្រូវចាប់ឃុំឃាំងតាមបទព្រហ្មទណ្ឌទៅផង ចោទថាជាមេនាំអាទិ៍បង្ខូចរង្គាលសណ្តាប់ធ្នាប់សង្គម។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីម៉ូស្គូ
ម្សិលមិញនៅសាធារណរដ្ឋបេឡូរុស្ស៊ី ការបោះឆ្នោតប្រធានាធិបតីបានប្រព្រឹត្តទៅ។ បានចូលប្រឡូកជាថ្មីទៀត គឺលោកប្រធានាធិបតីសព្វថ្ងៃ ឈ្មោះ Loukachenko ព្រមទាំងបេក្ខជន៩នាក់ទៀត។ ជាលទ្ធផលនៃការរាប់សន្លឹកឆ្នោតបាន១០០% ព្រឹកមិញគ.ជ.ប.បានប្រកាសថា លោក Loukachenko ទទួលការគាំទ្រដោយសំឡេងច្រើនលើសលប់ដល់ទៅ៧៩,៧% ហើយត្រូវចាត់ទុកថា ឈ្នះឆ្នោតតាំងពីជុំទី១ម៉្លេះ។ គួររំលឹកថា លោក Loukachenko កាន់តំណែងកំពូលនេះ តាំងពីឆ្នាំ ១៩៩៤មក ហើយ ការឈ្នះឆ្នោតលើកនេះគឺមានន័យថា គាត់នឹងបន្តកាន់អំណាច ៥ឆ្នាំទៀត អំណាចដែលត្រូវបស្ចិមលោកដាក់ឈ្មោះថាជាអំណាច ផ្តាច់ការ។
ការដែលគួរឲ្យកត់សំគាល់គឺថា សហភាពអឺរ៉ុបដោយឃើញនាពេលចុងក្រោយ ទំនាក់ទំនងរបស់បេឡូរុស្ស៊ីដែលល្បីជាសម្ព័ន្ធមិត្តរបស់រុស្ស៊ីក្នុងលំហអតីតសហភាពសូវៀត បែរទៅស្រុតចុះអាក្រក់ទៅ គឺចង់អន្ទងប្រទេសនេះ ឲ្យខិតចូលជិតខ្លួន តាមផ្លូវសន្យាថាបើការបោះឆ្នោតលើកនេះប្រព្រឹត្តទៅ ដោយយុត្តិធម៌ត្រឹមត្រូវ នោះបេឡូរុស្ស៊ីនឹងទទួលជំនួយសេដ្ឋកិច្ច ក្នុងទឹកប្រាក់ ដល់៣.០០០លានដុល្លារអាមេរិក។ ចំពោះរឿងនេះ បេក្ខជនម្នាក់ខាងបក្សប្រឆាំង លោក Neklyaiev ដែលត្រូវនគរបាលវ៉ៃបែកមុខយប់មិញហើយព្រឹកមិញថែមទាំងត្រូវបានអូសចេញពីមន្ទីរពេទ្យយកទៅឃុំឃាំងជាមួយបេក្ខជន៤នាក់ទៀតបានបញ្ចេញយោបល់ទិតៀនថាតើគេអាចប្រែអ្នកកាន់អំណាចផ្តាច់ការ ទៅជាអ្នកប្រជាធិបតេយ្យដែរឬ។
ពួកប្រឆាំង ដែលសុទ្ធតែដាក់ទិសឲ្យបេឡូរុស្ស៊ីភ្ជាប់ខ្លួន ទៅនឹងសហភាពអឺរ៉ុប ទន្ទឹមនឹងបាតុកម្មប្រឆាំងដែលតាមតួលេខគេគឺមានគ្នាដល់២ម៉ឹនាក់ ប៉ុន្តែតាមតួលេខនគរបាល គឺតែម្តុំ ៤ឫ៥ពាន់នាក់ នាំគ្នាចោទអាជ្ញាធរថាក្លែងបន្លំសន្លឹកឆ្នោត ពីព្រោះតាមការបូកគុណឃើញរបស់គេលោក Loukachenko ក្នុងជុំទី១ម្សិលមិញ ទទួលបានសំឡេងគាំទ្រតែ ៣៨% ប៉ុណ្ណោះ ចំណែក ខាងបក្សប្រឆាំងវិញសរុបទៅគឺប្រមូលបានសំឡេងគាំទ្រ ដល់៤២%ឯណោះ។ ក្នុងបាតុកម្មតវ៉ាឲ្យធ្វើការបោះឆ្នោតថ្មី ដែលបានពន្យារទៅ ៣ម៉ោង គេថែមទាំងបានប្រកាស បង្កើតឡើង ជា “រដ្ឋាភិបាលសង្គ្រោះជាតិ “រួចបន្ទាប់មកគេបានលើកគ្នាទៅវាយសម្រុកយកអគាររដ្ឋាភិបាលទៅផងដោយមុនដំបូងនាំគ្នាវាយបំផ្លាញទ្វារនិងកញ្ចក់អគារនោះ ឃើញដូច្នេះ ទ័ពមហាផ្ទៃនិង នគរបាលពិសេសខាងបង្ក្រាបការបះបោរ ក៏បានអន្តរាគមន៍ប្រើធម៌ក្តៅយ៉ាងចាស់ដៃបង្ក្រាបតែ២០នាទីសោះឲ្យលឹបទៅ រួចចាប់ពួកបាតុករបោះចូលឡានទ្រុងមិនតិចជាង១០០នាក់ឡើយ និងចាប់ទាំង បេក្ខជនខាងបក្សប្រឆាំងអស់៥នាក់ដែរ ដោយចោទគេថាជាមេនាំអាទិ៍បង្ខូចរង្គាល សណ្តាប់ធ្នាប់សង្គម ទាល់តែអាចត្រូវកាត់ទោសឲ្យជាប់ពន្ធនាគារដល់ ១៥ឆ្នាំឯណោះ។
មកទល់ឥឡូវ នៅមិនទាន់មានប្រតិកម្មពីខាងពួកអ្នកសង្កេតការណ៍បស្ចិមលោកនៅឡើយ។ ប៉ុន្តែ លោក Lebedev ប្រធានក្រុមអ្នកសង្កេតការណ៍ តំណាងឲ្យសហគមន៍រដ្ឋឯករាជ្យ ហៅកាត់ថា CEI បានថ្លែងព្រឹកមិញថា ការបោះឆ្នោតកន្លងទៅ នៅបេឡូរុស្ស៊ីបានប្រព្រឹត្តទៅក្នុងបរិយាកាសសេរីភាពហើយមានលក្ខណៈប្រជាធិបតេយ្យពេញទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ