សហភាពអឺរ៉ុប នៅលើផ្លូវដាក់ទណ្ឌកម្មជាថ្មី ទល់នឹងបេឡូរុស្ស៊ី
បញ្ហានេះ កំពុងស្ថិតនៅក្នុងការពិនិត្យមើលរបស់ថ្នាក់ដឹកនាំបណ្តាប្រទេសសហភាព អឺរ៉ុប ក្រោយពីបេឡូរុស្ស៊ី បានបិទឲ្យឈប់ដំណើរការទៅ ការិយាល័យរបស់ “ អង្គការដើម្បីសន្តិសុខ និងសហប្រតិបត្តិការនៅទ្វីបអឺរ៉ុប “ ហៅកាត់ថា OSCE។ មូលហេតុនៃការបិទនេះ គឺមកពី OSCE ដែលមានឯកទេសកម្មខាងតាមដានអំពីការបោះឆ្នោតនៅតាមប្រទេសសមាជិក ខ្លួន បានសន្និដ្ឋានថា ការបោះឆ្នោតប្រធានាធិបតីនៅបេឡូរុស្ស៊ី ក្នុងខែធ្នូកន្លងទៅ មិនបានឆ្លើយស្របនឹងស្តង់ដារប្រជាធិបតេយ្យទេ៕
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
នៅដើមឡើយ គួររំលឹកថា ជាលទ្ធផលនៃការបោះឆ្នោតនោះ គឺលោក Alexandre Loukachenko ដែលកាន់អំណាចកំពូលនៅបេឡូរុស្ស៊ីតាំងពីឆ្នាំ១៩៩៤មក កាន់នេះ គឺដោយកណ្តាប់ដៃដែក បង្ក្រាបពួកប្រឆាំងគ្មានប្រណីឡើយ ត្រូវបានប្រកាសថា ឈ្នះឆ្នោតទៀតហើយ ឈ្នះដោយសឡេងគាំទ្រដល់ទៅជិត ៨០%ឯណោះ សំរាប់អាណត្តិ៥ឆ្នាំទៅមុខទៀត។ ពីក្នុងចំណោមបាតុករប្រមាណ ៥ពាន់នាក់ដែលបានចុះថ្នល់សំដែងការតវ៉ាទល់នឹងលទ្ធផលនេះ ជាង៦០០នាក់ បូកទាំងបេក្ខជនប្រធានាធិបតីខាងបក្សប្រឆាំងចំនួន ៧នាក់ផង បានត្រូវប៉ូលីសវាយធ្វើបាបយ៉ាងដំណំ ហើយចាប់ឃុំឃាំង រួចទោះបីសឹងពាក់កណ្តាលពេលថ្មីៗ បានត្រូវព្រលែងឲ្យមានសេរីភាពក្តី ក៏អ្នកដែលនៅជាប់ឃុំ កំពុងរង់ចាំការកាត់ទោសដោយតុលាការ ដែលស្របនឹងបទចោទប្រកាន់”បង្ខូចសណ្តាប់ធ្នាប់សង្គម” គឺអាចជាប់គុករហូតដល់ ១៥ឆ្នាំឯណោះ។
ដោយបំផុសមកនូវសំណើឲ្យដាក់ទណ្ឌកម្មទល់នឹងរូបលោក Loukachenko និងពួកមន្ត្រីរបស់គាត់ រដ្ឋមន្ត្រីក្រសួងការបរទេសSuede លោក Karl Bildt បានថ្លែងថា ឥឡូវពួកអ្នកទោសនយោបាយនៅបេឡូរុស្ស៊ី ស្រាប់តែកើនឡើង ច្រើនជាងមុនឆ្ងាយ ដូច្នេះសហភាពអឺរ៉ុបគប្បីលើកយកមកអនុវត្តវិញ ទណ្ឌកម្មក្នុងទម្រង់ជាការហាមប្រាមកុំឲ្យមន្ត្រីមួយចំនួនរបស់បេឡូរុស្ស៊ី បូកទាំងរូបលោកប្រធានាធិបតី Loukachenkoផង ធ្វើដំណើរចូលក្នុងគ្រប់តែ២៧ប្រទេសសហភាពអឺរ៉ុប។ ប្រមុខការទូត Suede កត់សំគាល់ថា កាលពីឆ្នាំ ២០០៨ សហភាពអឺរ៉ុបបានលុបទៅវិញទណ្ឌកម្មបែបនេះ ដែលមានអនុវត្តអស់២ឆ្នាំជាប់ លុបនេះគឺក្រោយពីឃើញអាជ្ញាធរបេឡូរុស្ស៊ីបានព្រលែងចេញពីពន្ធនាគារ នូវមេដឹកនាំមួយចំនួនខាងបក្សប្រឆាំង។
កាលណោះ ក្នុងបញ្ជីហាមប្រាមរបស់សហភាពអឺរ៉ុប គឺមានរូបលោក Loukachenko ផ្ទាល់ និងមន្ត្រី៣៥នាក់ទៀតដែលនាំមុខគេដោយរូបលោកស្រីប្រធានឝ.ជ.ប.បេឡូរុស្ស៊ី ល្បីខាងប្រកាសឲ្យលោក Loukachenko ឈ្នះឆ្នោតជាប្រធានាធិបតិ ពីមួយអាណត្តិ ទៅមួយអាណត្តិ លើកនេះ ជាអាណត្តិទី៤។ តាមសំដីរដ្ឋមន្ត្រីការបរទេស Suede ទណ្ឌកម្មលើកនេះ ប៉ះមិនគ្រាន់លើបំរាមហាមមិនឲ្យថ្នាក់ដឹកនាំបេឡូរុស្ស៊ី ធ្វើដំណើរចូលសហភាពអឺរ៉ុបប៉ុណ្ណោះទេ តែក៏ប៉ះលើការព្យួរទុកសិន ជំនួយសេដ្ឋកិច្ចដែលសហភាពអឺរ៉ុបគ្រោងផ្តល់ទៅបេឡូរុស្ស៊ី ក្នុងទំហំ ៣.០០០លានអឺរ៉ូ សំរាប់៣ឆ្នាំចំពោះមុខ។
រដ្ឋាភិបាលអាល្លឺម៉ង់ ប្រទេសជាក្បាលម៉ាស៊ីនសហភាពអឺរ៉ុបក៏បានប្រកាសឲ្យដឹងទៅហើយថា ខ្លួនកំពុងពិនិត្យមើលបញ្ហាដាក់ទណ្ឌកម្មជាថ្មីទល់នឹងរដ្ឋអំណាចលោក Loukachenko។ ក៏ប៉ុន្តែ ប្រធានាធិបតី Lituanie បានថ្លែងថា គឺជាកំហុសទេតើ ដែលអស់ជាង១០ឆ្នាំមកហើយ បង្ខាំងប្រទេសបេឡូរុស្ស៊ីឲ្យស្ថិតនៅឯកាតែឯង ពីព្រោះនយោបាយបង្ខាបង្ខាំងនេះរឹតតែពង្រឹងអំណាច លោក Loukachenko ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ