អាវុធលក់នៅឆ្នាំ២០០៩ លើពិភពលោក គិតជាទឹកប្រាក់ជាង៤០ម៉ឺនលានដុល្លារ
ក្រុមហ៊ុនធំៗបំផុតចំនួន ១០០ ផលិតអាវុធនៅលើពិភពលោក លើកលែងតែប្រទេសចិន បានលក់ទំនិញនេះ គិតជាទឹកប្រាក់ចំនួន៤០ម៉ឺន មួយពាន់លាន ដុល្លារនៅឆ្នាំ២០០៩។ ក្នុងចំណោមក្រុមហ៊ុនទាំងនេះ ក្រុមហ៊ុនអាមេរិកាំងលក់បានប្រាក់ច្រើនជាងគេ ស្របតាមរបាយការណ៍របស់វិជ្ជាឋានស្រាវជ្រាវអន្តរជាតិដើម្បីសន្តិភាពនៅ Stockholmហៅកាត់ថា Sipri។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
ស្របតាមវិជ្ជាឋានស្រាវជ្រាវអន្តរជាតិដើម្បីសន្តិភាពនៅStockholm ហៅកាត់ថា Sipri ការលក់អាវុធរបស់ក្រុមហ៊ុនធំៗបំផុតចំនួន១០០នៅលើពិភពលោកបានកើនឡើងចំនួន១ម៉ឺន៤៨០០លានដុល្លារ នៅឆ្នាំ២០០៩ បើប្រៀបធៀបទៅនឹងឆ្នាំ២០០៨គឺបានកើនឡើង៨%។ក្នុងទឹកប្រាក់៤០ម៉ឺន១០០០លានដុល្លារបានមកពីការលក់អាវុធនៅឆ្នាំ២០០៩ ២៤ម៉ឹន៧ពាន់លានដុល្លារគឺ៦១,៥%ជារបស់ក្រុមហ៊ុន៦៥តាំងនៅស.រ.អា.។
“ការចាយវាយជាទ្រព្យសម្បត្តិនិងសេវាយោធានៃរដ្ឋាភិបាលអាមេរិកាំងគឺជាកត្តាមួយដែលកំណត់កំណើននៃការលក់អាវុធនៃសហគ្រាសអាមេរិកាំងនិងសហគ្រាសនៅអឺរ៉ូបខាងលិចមានមុខនៅលើទីផ្សារអាមេរិកាំង “ -នេះជាសំដីរបស់អ្នកឯកទេសម្នាក់នៃវិជ្ជាឋាន Sipri។
ក្នុងចំណោមក្រុមហ៊ុនធំៗបំផុត១០ខាងលក់អាវុធ មាន៧ក្រុមហ៊ុនអាមេរិកាំងគឺក្រុមហ៊ុនLockheed Martin, Boeing, Northrop Grumman, General Dynamics, Raytheon, L-3 CommunicationsនិងUnited Technologies។
ក្រុមហ៊ុនធំៗបំផុតបីទៀតគឺក្រុមហ៊ុនអង់គ្លេស BAE Systems ,ក្រុមហ៊ុនអឺរ៉ូប EADS និងក្រុមហ៊ុនអីតាលី Finmeccanica។
ក្នុងចំណោមក្រុមហ៊ុនធំៗបំផុត ទាំង១០០នៅលើពិភពលោក មានក្រុមហ៊ុន អឺរ៉ូបចំនួន៣៣ តាំងនៅ៩ ប្រទេសអឺរ៉ូប គឺអាល្លឺម៉ង់ Espagne, Finlande, បារាំង, អ៊ីតាលី, Norvège, អង់គ្លេស, Suède,និង Suisse ។
វិជ្ជាឋាន Sipri ពុំបានចុះផ្សាយអំពីក្រុមហ៊ុនចិន ដោយហេតុតែគ្មានទិន្នន័យអាចប្រៀបធៀបបាន ហើយទិន្នន័យទាំងនេះ ពុំមានលក្ខណៈជាក់លាក់ទេ។
អាស៊ី ត្រូវតំណាងដោយ ១០ ក្រុមហ៊ុនគឺ ៤នៅជប៉ុន ៣នៅឥណ្ឌា ២ នៅកូរ៉េខាងត្បូង និង ១ នៅសិង្ហបុរី។ មជ្ឈិមបូព៌ា ត្រូវតំណាងដោយ៥ ក្រុមហ៊ុន គឺ ៣ នៅអ៊ីស្រាអែល ១ នៅ Koweït និង ១ នៅ Turquie។
វិជ្ជាឋាន Sipri ឲ្យនិយមន័យអំពីការលក់អាវុធ ថាជាការលក់ទ្រព្យសម្បត្តិនិងសេវាយោធាទៅឲ្យអតិថិជនយោធា ទៅលើទីផ្សារផ្ទៃក្នុងក៏ដូចជាសំរាប់នាំចេញទៅក្រៅប្រទេស។
ត្រូវបានបង្កើតនៅឆ្នាំ១៩៦៦ វិជ្ជាឋាន Sipri គឺជាវិជ្ជាឋានអន្តរជាតិ ឯករាជ្យម្ចាស់ការតាំងនៅទីក្រុង Stockholm ទទួលហិរញ្ញប្បទាន៥០% ពីរដ្ឋ Suède និង មាន ឯកទេសកម្មខាងអធិករណ៍ សព្វាវុធ ត្រួតពិនិត្យ មើលលើអាវុធ និងលើការរំសាយអាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ